សៀមរាបៈ ស្ត្រី ៣ នាក់ ត្រូវបានសមត្ថកិច្ចរដ្ឋបាលព្រៃឈើខេត្តសៀមរាបឃាត់ខ្លួនកាលពីថ្ងៃ ១៨ វិច្ឆិកា នៅទីតាំងផ្សេងគ្នាពាក់ព័ន្ធករណីជួញដូរសត្វត្រចៀកកាំខុសច្បាប់ចំនួន ២៥០ ក្បាល ខណៈសត្វប្រភេទនេះមានប្រយោជន៍ច្រើនដល់សេដ្ឋកិច្ច និងជួយបំផ្លាញសត្វចង្រៃផ្សេងៗ។ នេះបើតាមលោក ម៉ុង ប៊ុនលីម នាយខណ្ឌរដ្ឋបាលព្រៃឈើខេត្តសៀមរាប។
លោក ប៊ុនលីម បានថ្លែងពីថ្ងៃទី ១៨ វិច្ឆិកា ថា ស្ត្រីសង្ស័យទាំង ៣ នាក់នោះ រួមមាន ឈ្មោះ រៀម ស៊ីណាត អាយុ ៣៣ ឆ្នាំ រស់នៅភូមិគោកថ្មី ឃុំដូនកែវ ស្រុកពួក ខេត្តសៀមរាប ត្រូវបានឃាត់ខ្លួននៅផ្សារដើមក្រឡាញ់ ជាមួយនឹងវត្ថុតាងសត្វត្រចៀកកាំ ១៥ ក្បាល។ រីឯស្ត្រីឈ្មោះ សុខ ស្រីនាថ អាយុ ៣០ ឆ្នាំ រស់នៅភូមិកន្ត្រក សង្កាត់ស្វាយដង្គុំ ក្រុងសៀមរាប ត្រូវបានឃាត់ខ្លួននៅទីតាំងតែមួយជាមួយនឹងវត្ថុតាងសត្វត្រចៀកកាំ ១២៥ ក្បាល។ ចំណែកស្ត្រីម្នាក់ទៀតឈ្មោះ ម៉ន សាវឿន អាយុ ២៩ ឆ្នាំ រស់នៅភូមិកន្ត្រក សង្កាត់ស្វាយដង្គុំ ក្រុងសៀមរាប ត្រូវបានឃាត់ខ្លួននៅផ្សារលើជាមួយវត្ថុតាងសត្វត្រចៀកកាំ ១១០ ក្បាល។
លោកថា៖ «ក្រោយសាកសួរ និងអប់រំណែនាំឱ្យធ្វើកិច្ចសន្យាបញ្ឈប់ការជួញដូរសត្វព្រៃ មន្ត្រីជំនាញយើងបានសម្រេចផាកពិន័យអន្តរកាលទៅតាមនីតិវិធីច្បាប់ ចំណែកវត្ថុតាងសត្វត្រចៀកកាំ [បោចរោមរួច] សរុប ២៥០ ក្បាលត្រូវបាននាំយកទៅដុតបំផ្លាញចោល»។
តាមចម្លើយរបស់ស្ត្រី ឈ្មោះ ម៉ន សាវឿន ដែលបានប្រាប់មន្ត្រីជំនាញនៅពេលសាកសួរថា សត្វត្រចៀកកាំទាំងនោះគឺគាត់បានទិញពីពលរដ្ឋនៅក្នុងមូលដ្ឋាន ដែលពួកគេខ្លះបានប្រើលប់ ខ្លះប្រើមង រាយប៉ប្រះលើផ្ទៃទឹកដើម្បីចាប់វា ព្រោះវាចូលចិត្តហើរឆ្វែលលើផ្ទៃទឹក។
លោក ប៊ុនលីម បានបន្តថា៖ «តាមរយៈការបំភ្លឺរបស់ស្ត្រីសង្ស័យ កម្លាំងមន្ត្រីជំនាញយើងនឹងបន្តកិច្ចសហការជាមួយអាជ្ញាធរមូលដ្ឋានចុះបង្ក្រាបករណីរាយមង ឬសំណាញ់ចាប់សត្វត្រចៀកកាំ ទៅដល់មូលដ្ឋានតែម្ដង។ បើមិនដូច្នោះទេ សត្វត្រចៀកកាំនឹងឈានទៅរកភាពផុតពូជមិនខាន»។
បើតាមលោក ប៊ុនលីម សត្វត្រចៀកកាំ គឺជាប្រភេទសត្វស្លាបព្រៃដែលចូលចិត្តរស់នៅជាហ្វូងតាមតំបន់ទីវាលទំនាប ដែលមានទឹកដក់ច្រើន និងចូលចិត្តស៊ីសត្វល្អិតជាអាហារ ហើយតែងបង្ហាញខ្លួននៅរដូវរំហើយ។
ជាទូទៅសត្វត្រចៀកកាំចូលចិត្តទំលើដើមកក់ ដើមត្រែង ហើយក្នុងចន្លោះពីខែឧសភា ដល់ខែមិថុនាគឺជារដូវកាលនៃការបង្កាត់ពូជរបស់វា។
ជុំវិញការឃាត់ខ្លួននេះ ក្រុមអ្នកធ្វើអាជីវកម្មផ្ទះសត្វត្រចៀកកាំបានសាទរ និងបានអំពាវនាវសុំឱ្យពលរដ្ឋបញ្ឈប់ការចាប់សត្វត្រចៀកកាំយកមកលក់ដូរ ឬយកមកបំពងលក់ ព្រោះសត្វប្រភេទនេះមានតម្លៃខ្ពស់ក្នុងវិស័យកសិកម្មផង និងពាណិជ្ជកម្មផង។
លោក ឃី សុខសាន្ត អ្នកប្រកបអាជីវកម្មផ្ទះសត្វត្រចៀកកាំម្នាក់នៅខេត្តសៀមរាប បានប្រាប់ ភ្នំពេញ ប៉ុស្តិ៍ ថា សត្វត្រចៀកកាំ មិនស៊ីដំណាំទេ តែវាស៊ីសត្វល្អិតដែលបំផ្លាញដំណាំរបស់កសិករ។ ដូច្នេះក្នុងវិស័យកសិកម្មវាដើរតួនាទីជាភ្នាក់ងារកម្ចាត់ពួកសត្វចង្រៃ។ រីឯក្នុងវិស័យពាណិជ្ជកម្មវិញសត្វប្រចៀកកាំអាចរកចំណូលបានរាប់លានដុល្លារក្នុង ១ ឆ្នាំៗជូនជាតិ តាមរយៈការនាំចេញទឹកមាត់របស់វា។
បើតាមលោក សុខសាន្ត សត្វត្រចៀកកាំ ១ ក្បាលអាចរកចំណូលបាន ១០ ដុល្លារ ក្នុង ១ ឆ្នាំ ហើយសត្វនេះមានអាយុរហូតដល់ ១៥ ឆ្នាំ តែបើចាប់វាបោចលក់ ១ ក្បាលថ្លៃត្រឹមតែ ២ ០០០ រៀលប៉ុណ្ណោះ។ ដូច្នេះមានការខាតបង់ខ្លាំងណាស់ ហើយនេះមិនទាន់គិតពីផលដែលវាត្រូវបន្តពូជក្នុងរយៈពេល ១៥ ឆ្នាំនៃការរស់នៅផង។
លោកថា៖ «សូមបញ្ឈប់ការចាប់សម្លាប់សត្វត្រចៀកកាំធ្វើជាម្ហូបអាហារ ហើយត្រូវតែរួមគ្នាការពារ និងអភិរក្សសត្វត្រចៀកកាំឱ្យបានកាន់តែច្រើនឡើងថែមទៀត»។
លោកបន្តថា នៅពេលខាងមុខនេះ កម្ពុជានឹងបង្កើតរោងចក្រកែច្នៃទឹកមាត់សត្វត្រចៀកកាំដើម្បីនាំចេញទៅទីផ្សារចិនហើយពេលនោះនឹងត្រូវការកម្លាំងពលកម្មច្រើនដើម្បីបម្រើការងារនៅក្នុងរោងចក្រនោះ។ ដូច្នេះបើគ្មានសត្វត្រចៀកកាំ នោះវិស័យមួយនេះនឹងត្រូវរាំងស្ទះ ឬខាតបង់ទាំងស្រុង៕