.jpg)
មន្ត្រីអង្គការ Wildlife និងបរិស្ថានពេលចាប់វត្ថុតាង។ រូប Wildlife Alliance
ពោធិ៍សាត់: មន្ត្រីឧទ្យានុរក្សនៃក្រសួងបរិស្ថាន និងអង្គការសម្ព័ន្ធមិត្តសត្វព្រៃ (Wildlife Alliance) បានឃាត់ខ្លួនបុរស ២ នាក់ និងដកហូតឈើខុសច្បាប់ ៧៣ ម៉ែត្រគុប, រថយន្ត ៨ គ្រឿង រណារយន្ត ៣២ គ្រឿងសត្វបក្សី ៣៦ ក្បាល និងសម្ភារបម្រើឲ្យបទល្មើសមួយចំនួនទៀតក្នុងអំឡុងចុះល្បាតព្រៃនៅជួរភ្នំក្រវាញខាងត្បូងពេញ ១ សប្ដាហ៍មុន។
អង្គការ (WildlifeAlliance) បានបង្ហាញរបាយការណ៍ចុះល្បាតពេញ ១ សប្ដាហ៍បានឲ្យដឹងកាលពីថ្ងៃទី ២៤ ខែមីនាថាទោះបីមានករណីផ្ទុះការឆ្លងវីរុសកូរ៉ូណាក៏ដោយ ប៉ុន្តែមន្ត្រីឧទ្យានុរក្សក្រសួងបរិស្ថាន និងមន្ត្រីអង្គការសម្ព័ន្ធមិត្តសត្វព្រៃនៅតែបន្តប្រយុទ្ធប្រឆាំងសកម្មភាពកាប់ឈើ និងបរបាញ់សត្វខុសច្បាប់ដោយឥតឈប់ឈរឡើយ ដើម្បីការពារតំបន់ព្រៃទឹកភ្លៀងដ៏ធំជាងគេចុងក្រោយក្នុងតំបន់អាស៊ីអាគ្នេយ៍នេះ។
របាយការណ៍បន្តថាពេញ ១ សប្តាហ៍មុន ក្រុមមន្ត្រីឧទ្យានុរក្ស និងមន្ត្រីអង្គការបានចុះល្បាតតំបន់ទេសភាពព្រៃទឹកភ្លៀងជួរភ្នំក្រវាញខាងត្បូងដោយលទ្ធផលទទួលបាន រួមមាន៖ ឃាត់ខ្លួនជនល្មើសបាន ២ នាក់,ដកហូតឈើខុសច្បាប់ ៧៣ ម៉ែត្រគុប និងឈើហុប ១៥ ដុំ,ដកហូតរថយន្តបាន ៨ គ្រឿងនិងរណារយន្ត ៣២ គ្រឿង។
ក្រៅពីនោះមន្ត្រីក៏បានដកហូតវត្ថុតាងមួយចំនួនទៀតផងដែរក្នុងនោះមានសត្វបក្សី ៣៦ ក្បាល,ម៉ូតូ ៤ គ្រឿង,រថយន្តMi-nivans ១ គ្រឿង,សំណាញ់ចាប់សត្វបក្សី ២ ដុំ,អន្ទាក់ចំនួន ១០,ឧបករណ៍អគ្គិសនីសម្រាប់នេសាទត្រី ១ គ្រឿង,ត្រាក់ទ័រធុនតូច ៣ គ្រឿង និងបានបង្ក្រាបសកម្មភាពទន្ទ្រានយកដីព្រៃ ២ ករណី។ នេះបើតាមរបាយការណ៍ដដែល។
ជាមួយគ្នានេះរបាយការណ៍បានបង្ហាញទៀតថា ការចុះល្បាតនេះបានពន្លត់ភ្លើងឆេះព្រៃចំនួន ១ កន្លែង,ដកហូតរទេះគោបាន ៧ គ្រឿង,រឹបអូសជំរំខុសច្បាប់បាន ៥ កន្លែង,ដកហូតកាំភ្លើងច្នៃបាន ៣ ដើម,ដកហូតធ្យូងបានទម្ងន់ ៣ តោន,ដកហូតគោយន្តបាន ១ គ្រឿង, រឹបអូសរោងដោល/ផ្ទះខុសច្បាប់ ១២ កន្លែង, ដកហូតឧបករណ៍ឆក់ត្រីខុសច្បាប់បាន ១ គ្រឿង, បំណែករបស់សត្វអណ្តើកចំនួន ៥ បំណែក និងសាច់ប្រើសទម្ងន់ ២,៥ គីឡូក្រាម។
លោក ចាន់ សុខា មេបញ្ជាការកងរាជអាវុធហត្ថស្រុកភ្នំក្រវាញខេត្តពោធិ៍សាត់ បានថ្លែងពីម្សិលមិញថា សមត្ថកិច្ចលោកធ្លាប់បានចូលរួមក្នុងប្រតិបត្តិការបង្ក្រាបបទល្មើសព្រៃឈើជាញឹកញាប់ជាមួយក្រុមមន្ត្រីជំនាញឧទ្យានុរក្សក្រសួងបរិស្ថាន និងមន្ត្រីអង្គការសម្ព័ន្ធមិត្តសត្វព្រៃ។ ប៉ុន្ដែក្នុងករណីដំណើរចុះល្បាតធម្មតាដែលគ្មានបទល្មើសកើតឡើងគឺក្រុមអង្គការមិនបានស្នើសុំកម្លាំងពីលោកទេ។
លោកបញ្ជាក់ថា៖ «បើបង្ក្រាបបទល្មើសធំៗមានឃាត់ខ្លួនជនសង្ស័យ ឬមានវត្ថុតាងច្រើនគឺក្រុមអង្គការ និងមន្ត្រីឧទ្យានុរក្សគាត់ស្នើសុំកម្លាំងពួកខ្ញុំ ប៉ុន្ដែត្រឹមដើរល្បាតព្រៃធម្មតា គាត់មិនស្នើទេ។ កម្លាំងខ្ញុំធ្លាប់បានបង្ក្រាបបទល្មើសជាហូរហែ ទោះគ្មានការស្នើសុំពីកម្លាំងជំនាញផ្សេងក៏ដោយ ជាពិសេសគោរពតាមបទបញ្ជាគណៈកម្មការជាតិប្រយុទ្ធប្រឆាំងបទល្មើសព្រៃឈើដោយមានការដុតរថយន្តដែលបង្ក្រាបបានមានបង្ក្រាបរថយន្តដឹកជញ្ជូនឈើតាមផ្លូវ និងបង្ក្រាបដេប៉ូឈើខុសច្បាប់ជាច្រើនទៀត»។
លោក គុជ វេង តំណាងសហគមន៍ការពារព្រៃឈើខេត្តពោធិ៍បានថ្លែងពីម្សិលមិញថាសកម្មភាពកាប់បំផ្លាញព្រៃឈើនៅតែមានជាហូរហែ ដោយក្រុមជនល្មើសឈប់ប្រើរថយន្តធំៗទៅដឹកឈើក្នុងព្រៃទៀតហើយ តែពួកគេបានមកដឹកតាមគោយន្តវិញ។ រីឯសកម្មភាពកាប់ឈើក៏ផ្លាស់ប្ដូរដែរគឺពួកគេងាកមកកាប់ឈើពេលយប់វិញ ព្រោះពេលថ្ងៃតែងមានមន្ត្រី និងប្រជាសហគមន៍ចុះល្បាតរំខានដល់ពួកគេ។
លោកបញ្ជាក់ថា៖ «ខ្ញុំពេលនេះមិនសូវហ៊ានធ្វើសកម្មភាពចុះល្បាតព្រៃឈើដូចមុនទេព្រោះខ្ញុំមានជាប់រឿងក្ដីនៅតុលាការចំនួន ៣ បណ្ដឹង។
ដូច្នេះខ្ញុំមិនហ៊ានចុះល្បាតព្រៃ ឬចេញក្រៅទៅប្រកបការងារឆ្ងាយពីផ្ទះទេ សូម្បីនិយាយអ្វីច្រើន ក៏មិនហ៊ាននិយាយដែរ ព្រោះខ្ញុំកំពុងស្ថិតនៅក្រោមការឃ្លាំមើលពីតុលាការ»។
គួររំឭកថា រាជរដ្ឋាភិបាលកម្ពុជាបានចេញអនុក្រឹត្យស្ដីពីការបង្កើតឧទ្យានជាតិជួរភ្នំក្រវាញខាងត្បូងចាប់តាំងពីខែ ឧសភា ឆ្នាំ ២០១៦ ដែលមានផ្ទៃដីទំហំ ៤១ ០៣៩២ ហិកតាស្ថិតនៅក្នុងភូមិសាស្ត្រខេត្តកោះកុង ខេត្តពោធិ៍សាត់ ខេត្តកំពង់ស្ពឺ និងខេត្តព្រះសីហនុ។
ក្នុងអនុក្រឹត្យនោះបានតម្រូវឲ្យក្រសួងបរិស្ថានសហការជាមួយដៃគូពាក់ព័ន្ធ ក្នុងនោះមានរដ្ឋបាលខេត្ត និងអាជ្ញាធរដែនដី ដើម្បីធានាកិច្ចគាំពារបរិស្ថានការអភិរក្សជីវចម្រុះ និងការប្រើប្រាស់ធនធានធម្មជាតិប្រកបដោយនិរន្តរភាព៕
