ព្រះសីហនុៈ មនុស្ស ៥៦ នាក់ និងម៉ាស៊ីនហ្គេមអេឡិចត្រូនិកជាច្រើនគ្រឿងត្រូវបានសមត្ថកិច្ចនគរបាលខេត្តព្រះសីហនុឃាត់ខ្លួន និងរឹបអូសពីបនល្បែងអត់ច្បាប់របស់ជនជាតិចិន ៤ កន្លែង នៅក្នុងភូមិ ១ សង្កាត់លេខ ៣ ក្រុងព្រះសីហនុកាលពីថ្ងៃទី ១២ ខែមករា ប៉ុន្តែក្នុងចំណោមនោះមាន ៤ នាក់ ត្រូវបានបញ្ជូនទៅតុលាការ។
លោក ជួន ណារិន្ទ ស្នងការនគរបាលខេត្តព្រះសីហនុបានប្រាប់ភ្នំពេញប៉ុស្តិ៍ពីម្សិលមិញថា ក្នុងចំណោមមនុស្ស ៥៦ នាក់ដែលត្រូវបានឃាត់ខ្លួននៅទីតាំងបនល្បែងជ្រកក្រោមស្លាកយីហោមណ្ឌល និងក្លិបកម្សាន្តទាំងនោះមាន ៣៦ នាក់ជាជនជាតិចិន ឯ ២០ នាក់ទៀតជាខ្មែរ។
លោកបានបន្តថា ជនជាតិចិន ៤ នាក់ ក្នុងចំណោម ៣៦ នាក់រួមមាន ឈ្មោះ NENG CHUN PING អាយុ ២៨ ឆ្នាំ ជាអ្នកគ្រប់គ្រងមណ្ឌលកម្សាន្ដតាចុងហ័រ, MENG YAO PENG អាយុ ២៥ ឆ្នាំ ជាអ្នកគ្រប់គ្រងក្លិបកម្សាន្តតាកវិនផៃ, XU YI BIAO អាយុ ២១ ឆ្នាំ ជាអ្នកគ្រប់គ្រងបនល្បែង (គ្មានយីហោ) និងឈ្មោះ Eng Guan អាយុ ៣៦ ឆ្នាំ ជាអ្នកគ្រប់គ្រងក្លិបកម្សាន្តហៃទុនវ៉ានត្រូវបានមន្ត្រីនគរបាលកសាងសំណុំរឿងបញ្ជូនទៅសាលាដំបូងខេត្តព្រះសីហនុ ដោយចោទពីបទ «លួចលាក់បើកបនល្បែងស៊ីសងខុសច្បាប់» ដើម្បីបន្តតាមនីតិវិធីច្បាប់។
លោកបានថ្លែងថា៖ «ប៉ុន្តែពួកគេមិនត្រូវបានតុលាការខេត្តព្រះសីហនុបង្គាប់ឲ្យឃុំខ្លួនទេ គ្រាន់តែដាក់ឲ្យស្ថិតក្រោមការត្រួតពិនិត្យតាមផ្លូវតុលាការពាក់ព័ន្ធការបើកបនល្បែងស៊ីសងអត់ច្បាប់។ ក្នុងករណីពួកគេនៅតែបន្តលួចលាក់បើកបនល្បែងស៊ីសងខុសច្បាប់ទៀតនោះពួកគេនឹងត្រូវប្រឈមការចាប់ឃុំខ្លួនដាក់ពន្ធនាគារ ឬនឹងត្រូវបណ្ដេញចេញពីកម្ពុជា»។
លោក ណារិន្ទ បានបន្តថា ចំណែកបុគ្គលិក និងភ្ញៀវ ៥២ នាក់ទៀតដែលភាគច្រើនជាជនជាតិចិនត្រូវបានដោះលែងវិញ បន្ទាប់ពីសមត្ថកិច្ចអប់រំណែនាំ និងបង្គាប់ឲ្យពួកគេធ្វើកិច្ចសន្យាបញ្ឈប់ការលេងល្បែងស៊ីសងខុសច្បាប់តទៅទៀត។
លោកបានឲ្យដឹងផងដែរថា ក្នុងប្រតិបត្តិការបង្ក្រាបបនល្បែងអត់ច្បាប់ទាំងនោះ សមត្ថកិច្ចបានរឹបអូសទូហ្គេមបាញ់ត្រីចំនួន ១៥ គ្រឿង ម៉ាស៊ីនស្លុតហ្គេមចំនួន ៦០ គ្រឿង លុយដុល្លារចំនួន ១៨ ៩៣៨ $ លុយខ្មែរ ២ ៨៣០ ០០០ រៀល ម៉ូតូ ៣ គ្រឿង ទូរស័ព្ទដៃ ៣៩ គ្រឿង កាក់ហ្គេម ១ ៣០០ កាក់ សៀវភៅគល់បញ្ជី ៥ ក្បាល និងឯកសារមួយចំនួនព្រមទាំងកាតបញ្ជូលពង់ (ពិន្ទុ) លេងហ្គេមមួយចំនួនធំ។ វត្ថុតាងទាំងនោះត្រូវបានតំណាងអយ្យការអមសាលាដំបូងខេត្តព្រះសីហនុចាក់សោប្លុំបេទុកនៅក្នុងទីតាំងដែលបានពិនិត្យជាក់ស្ដែង ដើម្បីមានចំណាត់ការបន្ដនៅពេលក្រោយទៀត៕