ព្រះសីហនុៈ សមត្ថកិច្ចកងរាជអាវុធហត្ថស្រុកកំពង់សីលាខេត្តព្រះសីហនុ និងកងរាជអាវុធហត្ថនៅស្នាក់ការសន្តិសុខ ៤០២ សហការជាមួយគណៈបញ្ជាការឯកភាពរដ្ឋបាលស្រុកកំពង់សីលាបានឃាត់រថយន្តធុនធំ ១ គឿងកាលពីម្សិលមិញ ខណៈរថយន្តនេះបានលួចបង្កប់ដឹកក្រុមកម្មករ ៤៨ នាក់ (ស្រី ១៧ នាក់) ពីស្រុកបរសេដ្ឋខេត្តកំពង់ស្ពឺទៅកាន់ខេត្តកោះកុង ក្នុងពេលរដ្ឋាភិបាលដាក់បម្រាមឆ្លងកាត់ខេត្ត-ក្រុង ដើម្បីបញ្ចៀសការឆ្លងជំងឺកូវីដ ១៩។
ការឃាត់រថយន្តនេះបានធ្វើឡើងចំណុចផ្លូវបំបែកស្រែអំបិល (ផ្លូវជាតិលេខ ៤៨) ក្នុងភូមិចម្ការហ្លួង ឃុំចម្ការហ្លួង ស្រុកកំពង់សិលា ខេត្តព្រះសីហនុជាប់ព្រំប្រទល់ជាមួយស្រុកស្រែអំបិល ខេត្តកោះកុងស្របពេលដែលអ្នកធ្វើដំណើរឆ្លងកាត់ខេត្តនានាកាលពីម្សិលមិញត្រូវបានមន្ត្រីនគរបាលជាតិអះអាងថា មាន ៩ ៧៤៧ នាក់។
ទោះជាយ៉ាងណាក្រោយពីឃាត់រថយន្តនេះ សមត្ថកិច្ចគ្រាន់តែបានណែនាំរួចបានអនុញ្ញាតឱ្យពួកគេឡើងជិះរថយន្តដដែលវិលត្រឡប់ទៅមូលដ្ឋានដើមវិញ ដោយសមត្ថកិច្ចបានជូនពួកគេទៅដល់ព្រំប្រទល់ខេត្តកំពង់ស្ពឺ។ នេះបើយោងតាមរបាយការណ៍របស់សមត្ថកិច្ច។
លោក ឃាង ភារម្យ អ្នកនាំពាក្យរដ្ឋបាលសាលាខេត្ដព្រះសីហនុថ្លែងកាលពីម្សិលមិញថា សម្រាប់ខេត្ដព្រះសីហនុការអនុវត្ដបទបញ្ជារបស់រាជរដ្ឋាភិបាលនេះគឺបានដាក់គោលដៅប្រចាំការនៅច្រកព្រំប្រទល់ខេត្ដចំនួន ៣ គឺជាប់ខេត្ដកំពង់ស្ពឺជាប់ខេត្ដកោះកុង និងព្រំប្រទល់ជាមួយខេត្ដកំពត។
លោកបញ្ជាក់ថា៖ «គោលដៅនីមួយៗគឺយើងបានអនុវត្ដដោយហ្មត់ចត់ទៅតាមបទបញ្ជារបស់រាជរដ្ឋាភិបាល។ ក្នុងនោះក៏មានករណីលើកលែងចំពោះរថយន្តដឹកទំនិញគ្រប់ប្រភេទ រថយន្តធ្វើដំណើររបស់មន្ដ្រីរាជការដែលមានបេសកកម្ម រថយន្តពេទ្យ រថយន្តពន្លត់អគ្គិភ័យ និងរថយន្ដដឹកកាកសំណល់សំរាម និងរថយន្តដឹកកម្មករទៅធ្វើការ។ ប៉ុន្ដែករណីដែលមានការលួចលាក់ដឹកកម្មករគឺយើងបានណែនាំឱ្យពួកគាត់ត្រឡប់ថយក្រោយទៅកាន់គោលដៅរបស់ពួកគាត់វិញ។ យើងមិនអនុញ្ញាតឱ្យពួកគាត់ចេញចូលបានទេទាល់តែថ្ងៃទី ១៦ ខែមេសាទើបផុតបម្រាម»។
ទាក់ទងនឹងបញ្ហានេះដែរកាលពីថ្ងៃអង្គារម្សិលមិញមានពលរដ្ឋចំនួន ៩ ៧៤៧ នាក់បានធ្វើដំណើរឆ្លងកាត់ខេត្ដនានាដែលជាចំនួនតិចជាងកាលពីថ្ងៃដំបូង។ នេះបើតាមលោក សុខ ផល រដ្ឋលេខាធិការក្រសួងមហាផ្ទៃបានបញ្ជាក់ប្រាប់ភ្នំពេញប៉ុស្ដិ៍ពីម្សិលមិញ។
លោក សុខ ផល ដែលជាអនុប្រធានក្រុមប្រចាំការអនុវត្ដបទបញ្ជារបស់រាជរដ្ឋាភិបាលស្ដីពីការដាក់កំហិតធ្វើដំណើរឆ្លងកាត់ខេត្តផងនោះបានបញ្ជាក់ថា៖ «កាលពីថ្ងៃដំបូង (ថ្ងៃ ១០ ខែមេសា) មានពលរដ្ឋចេញពីភ្នំពេញទៅតាមបណ្ដាខេត្ដច្រើនបន្តិច ប៉ុន្ដែមកដល់ថ្ងៃអង្គារនេះមិនមានអ្នកចេញច្រើនទៀតទេ។ ការចេញចូលរបស់ពលរដ្ឋនេះគឺមានការច្រឡូកច្រឡំគ្នាជាមួយបងប្អូនពលរដ្ឋចេញទៅកម្សាន្ដ និងចេញទៅធ្វើការងារពី ១ កន្លែងទៅ ១ កន្លែងដែលមិនអាចចៀសរួចបានទេ។ ប៉ុន្ដែចំពោះបងប្អូនកម្មកររោងចក្រពេលយើងឃើញគាត់ចេញទៅតាមខេត្ដ គឺយើងបានឱ្យគាត់ត្រឡប់ទៅវិញ។ ប៉ុន្ដែចំពោះអ្នកធ្វើដំណើរវិលល្ងាចចុះឡើងនោះយើងមិនហាមឃាត់គាត់ទេ។ ដូច្នេះរឿងនេះបានធូរស្រាលហើយ»។
លោក សុខ ផល បានបន្តថា ការត្រួតពិនិត្យការធ្វើដំណើរកាលពីថ្ងៃទី ១៤ ខែមេសា ក្នុងគោលដៅ ១០ នៃមុខព្រួញធំៗជាលទ្ធផលសរុបចំនួនពលរដ្ឋចេញ ៩ ៧៤៧ នាក់។ ទន្ទឹមនឹងនោះដែរ ចំពោះលំហូរចេញរបស់កម្មករពុំមានអ្វីកើតឡើងគួរឱ្យកត់សម្គាល់ឡើយ ខណៈសមត្ថកិច្ចក៏បានអប់រំណែនាំពីវិធានការបង្ការការពារប្រឆាំងជំងឺកូវីដ១៩ ដល់ប្រជាពលរដ្ឋ និងកម្មករដែលបានឆ្លងកាត់ផងដែរ។
បើតាមលោក សុខ ផល ពលរដ្ឋដែលចេញ-ចូលក្រុងភាគច្រើនជាបុគ្គលិក អាជីវករ ជាងសំណង់បានធ្វើដំណើរទៅបំពេញការងារ មុខរបរ អាជីវកម្មនៅខេត្តកណ្តាល និងនៅភ្នំពេញ (ប្រចាំថ្ងៃ)។ លោកថា សមត្ថកិច្ចនៅបន្តយកចិត្តទុកដាក់បំពេញភារកិច្ច និងតាមដានសភាពការណ៍ទៀត។
កាលពីថ្ងៃទី ៩ ខែមេសា លោកនាយករដ្ឋមន្ដ្រី ហ៊ុន សែន បានដាក់កំហិតលើការធ្វើដំណើរឆ្លងកាត់ខេត្តក្រុង ដើម្បីទប់ស្កាត់ការរាតត្បាតជំងឺកូវីដ ១៩ ចាប់ពីម៉ោង ២៤:០០ យប់ថ្ងៃទី ៩ ខែមេសា រហូតដល់ម៉ោង ២៤:០០ ថ្ងៃទី ១៦ ខែមេសា។ លោកនាយករដ្ឋមន្ដ្រីបញ្ជាក់ថា ការដាក់បទបញ្ជានេះក្នុងកាលៈទេសៈពិសេសដើម្បីកុំឱ្យជំងឺនេះរីករាលដាលក្នុងសហគមន៍នៅក្នុងប្រទេស៕