The Phnom Penh Post Search

Search form

Logo of Phnom Penh Post newspaper Phnom Penh Post - ឃាត់​ទំនិញ​គេច​ពន្ធ​របស់​ផ្កាយ​បី​យោធា​៤​រថយន្ត




ឃាត់​ទំនិញ​គេច​ពន្ធ​របស់​ផ្កាយ​បី​យោធា​៤​រថយន្ត

ឃាត់​ទំនិញ​គេច​ពន្ធ​របស់​ផ្កាយ​បី​យោធា​៤​រថយន្ត

ព្រះសីហនុៈ សមត្ថកិច្ច​ចម្រុះ​កាលពី​ម្សិលមិញ​បាន​បង្កើត​គណៈ​កម្មការ​ពិនិត្យ​ទំនិញ​ចំនួន​៧​មុខ ដែល​រក​ឃើញ​ផ្ទុក​ក្នុង​រថយន្ត​យី​ឌុប​៤​គ្រឿង ដឹក​ចេញពី​កំពង់ផែ​ស្រែ​អំបិល និង​ត្រូវ​បាន​ឃាត់​ទុក​នៅ​ស្រុក​កំពង់​សិលា កាល​ពី​ថ្ងៃ​ទី៣ ខែ​មីនា ដើម្បី​ឲ្យ​ម្ចាស់​ចូល​មក​បង់​ពន្ធ។

លោក ទូច គង្គា នាយការិយាល័យ​ព័ត៌មាន​ទូទៅ​និង​សន្តិសុខ​កងរាជ​អាវុធហត្ថ​លើ​ផ្ទៃ​ប្រទេស​ពី​ម្សិលមិញ​បាន​ឲ្យ​ដឹង​ថា ទំនិញ​ដែល​សមត្ថកិច្ច​ចម្រុះ​ឃាត់​បាន​ចំនួន​៤​ឡាន​យីឌុប កាលពី​ថ្ងៃទី​៣​មីនា នៅ​ក្នុង​ស្រុក​កំពង់​សិលា ខេត្ត​ព្រះសីហនុ ត្រូវ​គណៈកម្មការ​ចម្រុះ​មាន​កងរាជ​អាវុធហត្ថ​លើ​ផ្ទៃ​ប្រទេស មន្ត្រី​គយ​ស្រុក​កំពង់​សិលា និង​ព្រះរាជអាជ្ញា​បើក​ការ​ស៊ើប​អង្កេត​រួច​រាល់​ពី​ម្សិលមិញ។

លោក​បន្ត​ថា៖​«ទំនិញ​ទាំង​នោះ​ក្រុមហ៊ុន​លោក​ផ្កាយ​៣ ឡុង ម៉េង​បាន​នាំ​ចូល​មក ក្នុង​ទំនិញ ៨ មុខ មាន​៧​មុខ មិន​ទាន់​បង់ពន្ធ​ទេ។ដូច្នេះ បន្ទាប់​ពី​គណៈកម្មការ​ចម្រុះ​ពិនិត្យ​ហើយ ក៏​បាន​រក្សា​ទុក​នៅ​ស្នាក់​ការ​គយ​ក្នុង​ស្រុក​ស្រែ​អំបិល ដើម្បី​ឲ្យ​ខាង​ក្រុមហ៊ុន​ចូល​បង់ពន្ធ​ទៅ​តាម​នីតិវិធី​ច្បាប់»។

មន្ត្រី​ប៉េអឹម​ស្រុក​កំពង់​សិលា​បាន​ឲ្យ​ដឹង​ថា លោក ឡុង ម៉េង​ជា​ឧត្តម​សេនីយ៍​យោធា តែ​គេ​មិន​ដឹង​ថា លោក​នៅ​អង្គភាព​ណា​ប្រាកដ​ទេ​។ ចំណែក​រថយន្ត​យីឌុប ចំនួន​៤គ្រឿង​ដែល​សង្ស័យ​ថា​មាន​ទំនិញ​គេច​ពន្ធ ត្រូវ​សមត្ថកិច្ច​ឃាត់​កាល​ពី​រសៀល​ថ្ងៃ​ទី៣ ខែ​មីនា នៅ​ផ្លូវ​ជាតិ​លេខ​៤ មុខ​ស្នាក់​ការ​សន្តិសុខ​លេខ​៤០២ ស្ថិត​ក្នុង​ភូមិ-ឃុំ​ចម្ការ​ហ្លួង ស្រុក​កំពង់​សិលា ខេត្ត​ព្រះសីហនុ។

លោក​បន្ត​ឲ្យ​ដឹង​ថា បន្ទាប់​ពី​ពិនិត្យ​មើល​ទំនិញ​លើ​រថយន្ត ផ្ទៀងផ្ទាត់​នឹង​ឯកសារ​នាំ​ចូល ក្នុង​ឯកសារ​ថត​ចម្លង​ទំនិញ​នៅ​ក្នុង​រថយន្ត​ទាំង​បួន​គ្រឿង​នេះ គឺ​មាន​ឯកសារ​ឲ្យ​ដឹក​ទឹក​ដោះ​គោ​សញ្ញា​ប៉ារ៉ា​ចំនួន​៤០០​កេស​ប៉ុណ្ណោះ។ ប៉ុន្តែ តាម​ជាក់​ស្តែង​ក្នុង​រថយន្ត​ទាំង​៤គ្រឿង​នេះ ដែល​រថយន្ត​ខ្លះ​មាន​ប្រើ​ស្លាក​លេខ​ក្លែងក្លាយ​ផង មាន​ផ្ទុក​មាន​ទំនិញ​ចំនួន​៨​មុខ គឺ​មាន​ស្រា​បៀរ​លីអូ ៥.៦០០​កេស​ទូរស័ព្ទ​ម៉ាក​សាំស៊ុង​កាឡាក់ស៊ី ១២​ប្រភេទ មាន​១.៥៥៩​គ្រឿង​ទឹក​ដោះ​គោ​ប៉ារ៉ា​២.៦៦០​កេស​ត្រី​ខ​២០​កេស​(២​ពាន់​កំប៉ុង)  ក្រណាត់​វាំងនន​៦​ដុំ គ្រប​ជ័រ​ប្លាស្ទិក​១៦០បេ ម្សៅ​ជ័រ​ពណ៌​ស​៦៦៩​បេ និង​ទឹក​ថ្នាំ​ប្រភេទ​គីមី ២​ប៊ី​ដុង​ធំ និង ៤​ប៊ី​ដុង​តូច។

សមត្ថកិច្ច​ឲ្យ​ដឹង​ដែរ​ថា ក្នុង​ទំនិញ​ទាំង​៨​មុខ មាន​ប្រមាណ​ជិត​១០០​តោន ឯកសារ​បង់ពន្ធ​នាំ​ចូល​ទឹកដោះ​គោ​៤០០​កេស​ស្មើ​នឹង​ទឹក​ប្រាក់​តែ​ជាង​៣​លាន​រៀល។ ចំណែក​ទំនិញ​មិន​ទាន់​បង់ពន្ធ​មន្ត្រី​ស្នាក់ការ​គយ​និង​រដ្ឋាករ​ស្រែ​អំបិល អះអាង​ថា បើ​គិត​ត្រួសៗ​ត្រូវ​បង់ពន្ធ​មិន​តិច​ជាង​៥០០​លាន​រៀល នេះ​នៅ​មិន​ទាន់​គិត​ពី​ការ​ផាក​ពិន័យ​ផង​ទេ ដូច្នេះ ម្ចាស់​ទំនិញ​ត្រូវ​ចូល​មក​បង់ពន្ធ​តាម​កំណត់​ផ្លូវ​ច្បាប់ ។

មិន​អាច​ទាក់ទង​លោក​ឧត្តម​សេនីយ៍​ផ្កាយ​បី ឡុង ម៉េង ដែល​មន្ត្រី​កង​រាជអាវុធហត្ថ​អះអាង​ថា​ម្ចាស់​ទំនិញ​គេច​ពន្ធ​នេះ​បាន​ទេ​កាលពី​ម្សិលមិញ៕

អត្ថបទគួរចាប់អារម្មណ៍