.jpg)
គ្រូដោះអំពើក្រោយចាប់ខ្លួន។ ហ្វេសប៊ុក
សៀមរាបៈ បុរស ៣ នាក់ ត្រូវបានតុលាការខេត្តសៀមរាបសម្រេចឃុំខ្លួនកាលពីថ្ងៃ ១៦ ឧសភា ករណីរំលោភសេពសន្ថវៈទៅលើក្មេងស្រីជាអនីតិជន។ នេះបើតាមលោកស្រី ដួង ថាវរី ស្នងការរងខេត្តសៀមរាបទទួលបន្ទុកប្រឆាំងការជួញដូរមនុស្ស និងការពារអនីតិជនពីម្សិលមិញ។
លោកស្រី ថាវរី បានថ្លែងថា ជនសង្ស័យឈ្មោះ ពិន អ៊ឹម អាយុ ៤៦ ឆ្នាំ មានលំនៅភូមិ-សង្កាត់ក្របីរៀល ក្រុង-ខេត្តសៀមរាប និងបក្ខពួក ២ នាក់ទៀត រួមមានឈ្មោះ សយ សំប៊ុន អាយុ ៣៤ ឆ្នាំ និង ឈ្មោះ ស៊ាន កុសល អាយុ ៣៦ ឆ្នាំ ត្រូវបាននគរបាលខេត្តចាប់ខ្លួនកាលពីថ្ងៃទី ១៤ ខែឧសភា តាមបណ្ដឹងនារីរងគ្រោះម្នាក់។
លោកស្រីបានបន្តថា តាមការរៀបរាប់របស់នារីរងគ្រោះថា នៅរសៀលថ្ងៃទី ៩ ខែឧសភា ឆ្នាំនេះនាងបាននាំម្ដាយទៅផ្ទះឈ្មោះ ពិន អ៊ឹម ដែលជាគ្រូដោះអំពើឲ្យជួយពិនិត្យជំងឺម្ដាយព្រោះសង្ស័យត្រូវអំពើគេ។ លុះទៅដល់ជនសង្ស័យបានឲ្យថ្នាំទៅម្ដាយនាងផឹករួចក៏បានយកដៃអង្អែលក្បាលនាង ហើយថា កុំឲ្យបារម្ភ ម្ដាយនាងនឹងធូរក្រោយផឹកថ្នាំគាត់ ២-៣ ថ្ងៃ។
អ្នកស្រី ថាវរី ថាក្នុងបណ្ដឹងបញ្ជាក់ថា៖ «បន្ទាប់មកលោកគ្រូ ពិន អ៊ឹម បានយកទឹក ១ កែវមកឲ្យខ្ញុំផឹក។ លុះផឹករួចបានប្រមាណ ១៥ នាទីខ្លួនខ្ញុំមានអារម្មណ៍ចម្លែកគឺស្រើបស្រាលពេញទាំងខ្លួនហើយទន់ដៃជើង។
ពេលនោះគាត់ក៏បានបីខ្ញុំចូលបន្ទប់ហើយរួមភេទជាមួយខ្ញុំបានសម្រេចម្ដងហើយម្ដងទៀត។ ថ្ងៃបន្ទាប់គាត់ក៏បានធ្វើដូច្នេះទៀត ប៉ុន្តែលើសពីថ្ងៃដំបូងគឺគាត់ហៅសិស្សគាត់ ២ នាក់ទៀតមករួមភេទជាមួយនាងខ្ញុំរហូតបានសម្រេចម្នាក់ម្ដងថែមទៀត»។
លោកស្រី ថាវរី បានឲ្យដឹងទៀតថា បន្ទាប់ពីទទួលបណ្ដឹងនៅថ្ងៃទី ១៤ ខែឧសភា មន្ត្រីនគរបាលដោយមានការសម្របសម្រួលពីតំណាងអយ្យការអមសាលាដំបូងខេត្តបានចុះឆែកផ្ទះឈ្មោះ ពិន អ៊ឹម ហើយបានរកឃើញសម្បកថ្នាំញៀន Viagra ច្រើនបន្ទះ និងឃើញរូបភាព និងវីដេអូអាសអាភាសក្នុងទូរស័ព្ទដៃជនទាំង ៣ នាក់នោះផង។
លោកស្រី បញ្ជាក់ថា៖ «តាមរយៈរូបភាព និងវីដេអូនោះសមត្ថកិច្ចយើងបានរកឃើញជនរងគ្រោះ ២ នាក់ផ្សេងទៀតក្នុងនោះមានម្នាក់ជាកូនស្រីបង្កើតគ្រូដោះអំពើនោះគឺនាងមានអាយុ ១៧ និងក្មេងស្រីអាយុ ១៣ ឆ្នាំម្នាក់ទៀតជាកូនស្រីអ្នកជំងឺ»។
តាមចម្លើយកូនស្រីគ្រូដោះអំពើនោះថា នាងត្រូវបានកូនសិស្សឪពុកនាង ឈ្មោះ សយ សំប៊ុន និងឈ្មោះ ស៊ាន កុសល ចាប់រំលោភតាំងពីនាងអាយុ ១៤ ឆ្នាំមកម្ល៉េះ និងបានយកទូរស័ព្ទថតរូបអាក្រាតរបស់នាងទៀត។ «លុះបន្ទាប់មក ពួកបានយករូបភាពនោះមកគំរាមនាងដើម្បីបង្ខំនាងរួមរ័កជាមួយពួកគេបានសម្រេចជាច្រើនដងថែមទៀត»។
ចំណែកកុមារីម្នាក់ទៀតថានាងត្រូវបានឈ្មោះ ពិន អ៊ឹម ច្របាច់ដោះ និងលេងប្រដាប់ភេទនាងញឹកញាប់ ហើយថ្ងៃខ្លះគ្រូនោះឲ្យនាងលេងប្រដាប់ភេទគាត់រហូតចេញទឹកកាម ប៉ុន្តែមិនបានរួមភេទទេ។ ករណីនេះកើតឡើងពេលនាងទៅស្នាក់នៅថែជំងឺម្ដាយកាលពីខែមេសាកន្លងទៅ។
លោកស្រី ថាវរី បានបន្តថា តាមរយៈបណ្ដឹង និងចម្លើយនារីរងគ្រោះ សមត្ថកិច្ចបានបញ្ជូនក្រុមជនសង្ស័យទៅតុលាការខេត្តកាលពីថ្ងៃសៅរិ៍ដើម្បីចាត់វិធានការបន្តតាមនីតិវិធីច្បាប់។
ជុំវិញករណីនេះលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តសៀមរាបបានប្រាប់ភ្នំពេញប៉ុស្តិ៍ថា ជនសង្ស័យទាំង ៣ នាក់ ត្រូវបានតុលាការឃុំខ្លួនក្នុងពន្ធនាគារខេត្តពីល្ងាចថ្ងៃ ១៦ ឧសភា ដោយចោទម្នាក់ៗ ២ បទល្មើសរួមមាន បទ «រំលោភសេពសន្ថវៈលើអនីតិជន» តាមមាត្រា ២៣៩ នៃក្រមព្រហ្មទណ្ឌ និងបទ «ផលិតរូបភាពអាសអាភាស» តាមមាត្រា ៣៩ នៃច្បាប់ស្តីពីការបង្ក្រាបការជួញដូរមនុស្ស៕
