ព្រះសីហនុៈ ជនសង្ស័យជនជាតិចិនម្នាក់ត្រូវបានតុលាការសម្រេចឃុំខ្លួនដោយចោទប្រកាន់ពីបទ «ចាប់ និងបង្ខាំងមនុស្សដោយខុសច្បាប់» បន្ទាប់ពីឃាត់ខ្លួននៅថ្ងៃទី ៥ កញ្ញា ពាក់ព័ន្ធការចាប់ជំរិតទារប្រាក់ពីជនរងគ្រោះជាជនជាតិចិនម្នាក់នៅភូមិ ២ សង្កាត់ ៣ ក្រុង-ខេត្តព្រះសីហនុ ខណៈសមត្ថកិច្ចកំពុងស្រាវជ្រាវរកបក្ខពួកបន្ថែមទៀត។
លោក លឹម ប៊ុនហេង អ្នកនាំពាក្យសាលាដំបូងខេត្តព្រះសីហនុថ្លែងពីម្សិលមិញថា ចៅក្រមនៃសាលាដំបូងខេត្តព្រះសីហនុសម្រេចឃុំខ្លួនជនសង្ស័យជាជនជាតិចិនឈ្មោះ ZHANG KUN DUAN ភេទប្រុស អាយុ ២១ ឆ្នាំ នៅពន្ធនាគារខេត្តនៅល្ងាចថ្ងៃទី ៦ ខែកញ្ញា។
លោកថា៖ «គឺត្រូវបានឃុំខ្លួនបណ្តោះអាសន្នតាមនីតិវិធីរួចរាល់ ហើយដោយចោទប្រកាន់ពីបទចាប់ និងបង្ខាំងមនុស្សដោយខុសច្បាប់ ប៉ុន្ដែខ្ញុំចាំមិនច្បាស់មាត្រាទេ»។
លោក កុល ផាលី ស្នងការរងនគរបាលខេត្តព្រះសីហនុទទួលបន្ទុកផ្នែកព្រហ្មទណ្ឌប្រាប់ពីម្សិលមិញថា សមត្ថកិច្ចបានបញ្ជូនជនសង្ស័យជាជនជាតិចិននោះទៅសាលាដំបូងខេត្តព្រះសីហនុកាលពីថ្ងៃទី ៦ ខែកញ្ញាហើយ។
លោកថា ក្រៅពីជនសង្ស័យម្នាក់នេះសមត្ថកិច្ចបាននិងកំពុងស៊ើបអង្កេត និងស្រាវជ្រាវរកជនសង្ស័យដែលពាក់ព័ន្ធករណីនេះបន្ថែមទៀត។ ជនសង្ស័យសារភាពថា នៅមានបក្ខពួកពាក់ព័ន្ធនឹងសំណុំរឿងនេះ។
លោក ផាលី ប្រាប់ថា នៅថ្ងៃទី ៥ កញ្ញា ជនជាតិចិនម្នាក់បានទូរស័ព្ទរាយការណ៍មកសមត្ថកិច្ចថា មានជនជាតិចិនម្នាក់កំពុងជួញដូរគ្រឿងញៀននៅលើភ្នំ ១ កន្លែងស្ថិតក្នុងភូមិ ២ សង្កាត់ ៣ ក្រុង-ខេត្តព្រះសីហនុ។ ក្រោយពីទទួលព័ត៌មានសមត្ថកិច្ចបានរៀបចំកម្លាំងចុះទៅទីតាំងនោះភ្លាមៗ ដើម្បីបង្ក្រាប។
លោកថា៖ «ពេលទៅដល់សមត្ថកិច្ចបានឃើញជនជាតិចិនម្នាក់ដៃមានជាប់ចំណងទាំង ២ ត្រូវគេរុំស្កុតដោយមានស្នាមរបួស ហើយមានម្សៅសមួយថង់នៅក្នុងកាបូបរបស់ជនជាតិចិននោះ។ បន្ទាប់មកសមត្ថកិច្ចយើងបាននាំមកស្នងការដ្ឋាននគរបាលខេត្តដើម្បីសួរនាំ»៕