សៀមរាប/មណ្ឌលគិរីៈ សាលាដំបូងខេត្តសៀមរាបបានសម្រេចឃុំខ្លួនបុរសម្នាក់នៅថ្ងៃទី ៣១ ខែមករា បន្ទាប់ពីសមត្ថកិច្ចឃាត់ខ្លួនពាក់ព័ន្ធនឹងការចូលទៅបាញ់សត្វព្រៃ និងកាប់ព្រៃឈើនៅក្នុងសហគមន៍ទឹកធ្លាក់ចង្ក្រានរយនៅភូមិបាយដុត ឃុំស្វាយស ស្រុកវ៉ារិន ខេត្តសៀមរាប ខណៈបុរសម្នាក់ទៀតក៏កំពុងត្រូវបានសាកសួរពាក់ព័ន្ធការដឹកជញ្ជូនឈើប្រណីតខុសច្បាប់។
លោក យិន ស្រាង អ្នកនាំពាក្យសាលាដំបូងខេត្តសៀមរាបបានថ្លែងពីម្សិលមិញថា ចៅក្រមនៃសាលាដំបូងខេត្តបានសម្រេចឃុំខ្លួនបុរសម្នាក់បណ្ដោះអាសន្ននៅពន្ធនាគារ។ បុរសជាជនជាប់ចោទរូបនេះត្រូវបានចោទប្រកាន់ពីបទ «ប្រមូលផលអនុផលព្រៃឈើដោយគ្មានការអនុញ្ញាត» តាមមាត្រា ៩៨ កថាខណ្ឌ ២ និងចំណុច ៥ ស្ដីពីច្បាប់ព្រៃឈើ។
លោកបញ្ជាក់ថា៖ «តុលាការសៀមរាបបានសម្រេចឃុំខ្លួនគាត់ហើយកាលពីថ្ងៃទី ៣១ ខែមករា ដោយចោទពីបទប្រមូលផលអនុផលព្រៃឈើដោយគ្មានការអនុញ្ញាត។ ឥឡូវនេះតុលាការឃុំខ្លួនបណ្ដោះអាសន្នសិន ហើយតុលាការលើកយកមកបើកសវនាការពេលណាទៀត គឺជារឿងតុលាការ ខ្ញុំអត់ទាន់ដឹងទេ»។
លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាបក៏បានថ្លែងពីម្សិលមិញថា បុរសជាជនសង្ស័យម្នាក់ (មិនចាំឈ្មោះ) ត្រូវបានមន្ត្រីជំនាញបញ្ជូនខ្លួនទៅសាលាដំបូងខេត្តសៀមរាប ដើម្បីចាត់វិធានការតាមផ្លូវច្បាប់។ សមត្ថកិច្ចឃាត់ខ្លួនបុរសនោះកាលពីព្រឹកថ្ងៃទី ៣១ ខែ មករា ឆ្នាំ ២០២០ ដែលពាក់ព័ន្ធការលួចចូលទៅដាក់អន្ទាក់សត្វព្រៃ និងកាប់ព្រៃឈើនៅក្នុងព្រៃសហគមន៍ទឹកធ្លាក់ចង្ក្រានរយស្ថិតនៅភូមិសាស្ត្រ ភូមិបាយដុត ឃុំស្វាយស ស្រុកវ៉ារិន ខេត្តសៀមរាប។
លោកបន្តថា ការឃាត់ខ្លួននេះនៅពេលមន្ត្រីចម្រុះរួមមាន កម្លាំងអធិការដ្ឋាននគរបាលស្រុកវ៉ារិនសហការជាមួយគណៈបញ្ជាការឯកភាពស្រុកវ៉ារិន មន្ត្រីជំនាញ និងសមត្ថកិច្ចមូលដ្ឋានបានចុះល្បាតក្នុងព្រៃសហគមន៍ទឹកធ្លាក់ចង្ក្រានរយក៏ប្រទះឃើញសកម្មភាពកាប់ព្រៃឈើ និងការដាក់អន្ទាក់សត្វព្រៃ។ ពេលនោះជនល្មើសមានគ្នាប្រមាណ ៥ នាក់ ប៉ុន្ដែសមត្ថកិច្ចបានឃាត់ខ្លួនម្នាក់រីឯ ៤ នាក់ទៀតបានរត់ចូលព្រៃគេចខ្លួនបាត់អស់។
លោកបន្ថែមថា ប្រតិបត្តិការនេះបានទទួលលទ្ធផលដោយរឹបអូសវត្ថុតាងមួយចំនួន ដូចជា រណារយន្តចំនួន ៥ គ្រឿង កាំភ្លើងកែច្នៃចំនួន ៥ ដើម អន្ទាក់សត្វចំនួន ១០ ខ្សែ ឈើក្តារអារចំនួន ២៣០ សន្លឹក ចំនៀរឈើចំនួន ៦៧ សន្លឹក ឃាត់ខ្លួនជនសង្ស័យម្នាក់សរុបចំនួនឈើ ២៩៧ សន្លឹក ស្មើនឹង ៧.៦១៧ ម៉ែត្រគុប។
លោក គឹមសុទ្ធ បញ្ជាក់ថា៖ «បច្ចុប្បន្នជនសង្ស័យត្រូវបានបញ្ជូនទៅតុលាការ រីឯវត្ថុតាងទាំងអស់បញ្ជូនយកទៅរក្សាទុកនៅសង្កាត់រដ្ឋបាលព្រៃឈើស្រែណូយ ដើម្បីអនុវត្តទៅតាមនីតិវិធីច្បាប់ស្តីពីព្រៃឈើ»។
ករណីស្រដៀងគ្នាដែរ សមត្ថកិច្ចជំនាញខេត្តមណ្ឌលគិរីបាននិងកំពុងសាកសួរជនសង្ស័យម្នាក់ឈ្មោះ ស៊ូ ចាន់រិត ភេទប្រុស អាយុ ៦១ ឆ្នាំ បានបើកបររថយន្ត (កាមរី) ១ គ្រឿង ដឹកឈើនាងនួនចំនួន ៥៤ ដុំ នៅចំណុចភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី។
លោក អ៊ុំ សុវណ្ណសុភៈ នាយខណ្ឌរដ្ឋបាលព្រៃឈើខេត្តមណ្ឌលគិរីថ្លែងថា លោកបានទទួលព័ត៌មាននេះហើយ ដោយសមត្ថកិច្ចជំនាញនៃដែនជម្រកសត្វព្រៃកែវសីមាកំពុងធ្វើការសាកសួរ។ លោកប្រាប់ថា៖ «មន្រី្តជំនាញយើងកំពុងសាកសួរ តែលទ្ធផលយ៉ាងណា ខ្ញុំអត់ទាន់បានដឹងទេ»។
លោក ឌឹម ប៊ុនធឿន អនុប្រធានមន្ទីរបរិស្ថានខេត្តមណ្ឌលគិរី និងជាប្រធានដែនជម្រកសត្វព្រៃកែវសីមាពីម្សិលមិញមិនអាចទាក់ទងសុំការបញ្ជាក់ជុំវិញករណីនេះតាមទូរស័ព្ទបានទេ។
តាមរបាយការណ៍របស់កងរាជអាវុធហត្ថលើផ្ទៃប្រទេសដែលបង្ហាញលើហ្វេសប៊ុកពីម្សិលមិញឲ្យដឹងថាកាលពីថ្ងៃទី ៣០ ខែ មករា ២០២០ កម្លាំងអាវុធហត្ថខេត្តមណ្ឌលគិរី និងកម្លាំងអាវុធហត្ថស្រុកកែវសីមាបានបង្ក្រាបរថយន្ត (កាមរី) ១ គ្រឿង ដឹកឈើនាងនួនចំនួន ៥៤ ដុំ នៅចំណុចភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី៕