មណ្ឌលគិរីៈ យុវជនម្នាក់ត្រូវបានតុលាការសម្រេចឃុំខ្លួនដាក់ពន្ធនាគារបណ្ដោះអាសន្នពាក់ព័ន្ធករណីលួចដាក់អន្ទាក់សត្វព្រៃក្នុងតំបន់ដែនជម្រកសត្វព្រៃស្រែពក។ នេះបើតាមការអះអាងរបស់លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីពីម្សិលមិញ។ ប៉ុន្តែប្រធានសហគមន៍អះអាងថា ជនជាប់ចោទជាមនុស្សមិនគ្រប់លក្ខណៈដែលអាចត្រូវបានគេនាំចូលព្រៃដើម្បីប្រយោជន៍អ្វីមួយ។
លោក សុភគ៌និយាយថា ជនសង្ស័យឈ្មោះ ហក វ៉ាន់ អាយុ ១៩ ឆ្នាំ រស់នៅភូមិកោះម្យើលក្រោម ឃុំណងឃីលឹក ស្រុកកោះញែក ខេត្តមណ្ឌលគិរី។ បុរសសង្ស័យនេះត្រូវបានក្រុមមន្ត្រីឧទ្យានុរក្សដែនជម្រកសត្វព្រៃស្រែពកចាប់ឃាត់ខ្លួនក្នុងអំឡុងពេលប្រព្រឹត្តបទល្មើសដាក់អន្ទាក់សត្វព្រៃក្នុងតំបន់ស្នូលនៃដែនជម្រកសត្វព្រៃស្រែពកកាលពីរសៀលថ្ងៃ ២៧ ខែមករា ឆ្នាំ ២០២០។
លោកបន្តថា ក្នុងអំឡុងពេលនៃការចាប់ឃាត់ខ្លួននោះ ក្រុមមន្ត្រីឧទ្យានុរក្សបានស្រាវជ្រាវ និងរឹបអូសបានវត្ថុតាងមួយចំនួនរួមមាន រំសេវផ្ទុះចំនួន ០,៥ គីឡូក្រាម លួសឆក់ចំនួន ៣ ដុំ អង្គប់រ៉ឺស័រនាំចូលពីប្រទេស វៀតណាម ចំនួន ៣ និង ខ្សែអន្ទាក់ជាច្រើនទៀតដែលជនសង្ស័យបានដាក់បង្កៃ និងបង្កប់នៅក្នុងព្រៃនៃតំបន់ការពារ និងអភិរក្សខាងលើនេះ។
លោក សុភគ៌ បញ្ជាក់ថា៖ «ជនសង្ស័យត្រូវបានតុលាការខេត្តមណ្ឌលគិរី សម្រេចឃុំខ្លួនដាក់ពន្ធនាគារជាបណ្ដោះអាសន្នកាលពីរសៀលថ្ងៃទី ២៨ ខែ មករា ឆ្នាំ ២០២០ ដោយចោទប្រកាន់ពីបទដាក់អន្ទាក់បង្កៃចាប់សត្វព្រៃ ប្រព្រឹត្តក្នុងតំបន់ការពារធម្មជាតិនៃដែនជម្រកសត្វព្រៃស្រែពកតាមបញ្ញត្តិមាត្រា ៦១ ត្រង់ចំណុចទី ៥ និងទី ៦ នៃច្បាប់ស្ដីពីតំបន់ការពារធម្មជាតិ»។
យោងចំណុចទី ៥ និងទី ៦ នៃមាត្រា ៦១ នៃច្បាប់ស្ដីពីតំបន់ការពារធម្មជាតិ ជនសង្ស័យនឹងត្រូវប្រឈមការផ្ដន្ទាទោសក្រោមបទល្មើសធនធានធម្មជាតិថ្នាក់ទី ៣ ដែលនឹងត្រូវជាប់ពន្ធនាគារពី ១ ឆ្នាំទៅ ៥ ឆ្នាំ ឬនឹងត្រូវផាកពិន័យជាប្រាក់ពី ១៥ លានរៀលដល់ ១០០ លានរៀល។
ជុំវិញការឃុំខ្លួនជនសង្ស័យនេះបានបង្កឲ្យមានការភ្ញាក់ផ្អើលពេញក្នុងសហគមន៍ ភូមិកោះម្យើលក្រោម ដោយអ្នកភូមិជាច្រើននិយាយថា ជនសង្ស័យជាមនុស្សស្មោះត្រង់ស្លូតបូត និងមានស្មារតីមិនពេញលក្ខណៈ។
លោក កែវ សុធា ប្រធានសហគមន៍ព្រៃឈើកោះម្យើល ប្រាប់ភ្នំពេញប៉ុស្តិ៍ពីម្សិលមិញថា ជនសង្ស័យមិនធ្លាប់ចូលទៅក្នុងព្រៃដោយម្នាក់ឯងនោះទេ។ ព្រោះគេជាមនុស្សមានសតិមិនគ្រប់លក្ខណៈ ហើយគ្រួសាររបស់គេក្រីក្រ គ្មានលទ្ធភាពទិញឧបករណ៍ អន្ទាក់ ឬអង្គប់ សម្រាប់បង្កៃចាប់សត្វព្រៃ ដែលមានតម្លៃថ្លៃបែបនោះឡើយ។
លោកបានថ្លែងថា៖ «ខ្ញុំហ៊ានអះអាងថា វា [ជនសង្ស័យ] ជាមនុស្សមានសតិស្មារតីមិនគ្រប់លក្ខណៈ ហើយខ្ញុំជឿថា វាចូលទៅដាក់អន្ទាក់នៅក្នុងតំបន់ស្នូលនៃដែនជម្រកសត្វព្រៃស្រែពកនោះទំនងជាមានក្រុមមនុស្សទុច្ចរិតណាមួយនាំគេទៅដើម្បីជាប្រយោជន៍អ្វីមួយ ព្រោះវាមិនដែលហ៊ានចូលទៅក្នុងព្រៃជ្រៅតែម្នាក់ឯងនោះទេតាំងពីមុនមក។ ម្យ៉ាងទៀតគ្រួសាររបស់វាក្រីក្រខ្លាំងណាស់ គ្មានលទ្ធភាពទិញនូវឧបករណ៍ អន្ទាក់ និងអង្គប់ចាប់សត្វព្រៃដូចដែលមន្ត្រីជំនាញបានចាប់រឹបអូសបានជាវត្ថុតាងនោះទេ»៕