.jpg)
ទីតាំងកប់សពស្រ្តីរងគ្រោះ ដែលត្រូវបានប្ដីជាទាហានសម្លាប់។ រូបថត នគរបាល
ព្រះវិហារៈ មន្ត្រីយោធាម្នាក់ដែលសម្លាប់ប្រពន្ធចុងរបស់ខ្លួនត្រូវបានតុលាការខេត្តព្រះវិហារសម្រេចចោទប្រកាន់ និងឃុំខ្លួនក្នុងពន្ធនាគារខេត្តកាលពីថ្ងៃទី ២៦ កញ្ញា បន្ទាប់ពីសមត្ថកិច្ចចាប់ខ្លួនបាន ១ ថ្ងៃ ក្រោយប្រព្រឹត្តនៅភូមិស្ទឹងខៀវតេជោ ឃុំស្រអែម ស្រុកជាំក្សាន្ត ខេត្តព្រះវិហារ។
លោកស្រី ប្រាំង ធីតា ស្នងការរងនគរបាលខេត្តព្រះវិហារឱ្យដឹងម្សិលមិញថា ជនសង្ស័យឈ្មោះ ស៊ិន ស៊ឹម អាយុ ៥២ ឆ្នាំ ជាយោធាពាក់ស័ក្តិ ៣ បម្រើការនៅអង្គភាពវរៈ ៣៨២ ចំណុះឱ្យកងពលតូចអន្តរាគមន៍លេខ ៨ ឈរជើងនៅលើភ្នំប្រាសាទព្រះវិហារ។ រីឯប្រពន្ធជាស្ត្រីរងគ្រោះឈ្មោះ ហួយ ផល្លា អាយុ ៥៥ ឆ្នាំ។
លោកស្រីថ្លែងថា រឿងនេះតុលាការឃុំខ្លួនជនសង្ស័យក្នុងពន្ធនាគារហើយ។ ជនសង្ស័យត្រូវបានចៅក្រមស៊ើបសួរលោក ជៀន ស្រស់ ចោទពីបទឃាតកម្មតាមមាត្រា ១៩៩ នៃក្រមព្រហ្មទណ្ឌ។
យោងតាមមាត្រា ១៩៩ នៃក្រមព្រហ្មទណ្ឌ បទឃាតកម្មត្រូវជាប់ពន្ធនាគារពី ១០ ទៅ ១៥ ឆ្នាំ។
លោកស្រីថា៖ «បទល្មើសរបស់ជនសង្ស័យជាបទល្មើសជាក់ស្តែង ដោយសារគាត់សារភាព និងសមត្ថកិច្ចរកឃើញកន្លែងដែលគាត់កប់សាកសព។ ប៉ុន្តែគាត់ត្រូវផ្តន្ទាទោសយ៉ាងណានោះអាស្រ័យខាងតុលាការទេ»។
លោក ហ៊ុយ សុផុន នាយនគរបាលប៉ុស្តិ៍ ឃុំស្រអែម ប្រាប់តាមសម្តីជនសង្ស័យដែរថា ស្ត្រីរងគ្រោះជាស្ត្រីមេម៉ាយកូន ៣ នាក់ ប្រុសម្នាក់អាយុ ១៦ ឆ្នាំ និងកូនស្រី ២ នាក់ទៀតមានប្តី។ ពួកគេទាំង ៣ នាក់រស់នៅខេត្តកំពង់ឆ្នាំង។ ឯស្ត្រីរងគ្រោះមករួមរស់ជាមួយជនសង្ស័យនៅកន្លែងកើតហេតុខាងលើ។ មុនកើតហេតុម៉ោងជាង ២ រសៀលថ្ងៃទី ១៧ កញ្ញា ស្ត្រីរងគ្រោះហាមជនសង្ស័យចាយលុយផ្តេសផ្តាសហើយក៏មិនឱ្យលុយជននោះកាន់ដែរទើបបណ្តាលឱ្យឈ្លោះគ្នា។
លោកថា ពេលឈ្លោះគ្នាជនសង្ស័យចាប់ជើងស្ត្រីរងគ្រោះទាំង ២ ឱ្យដួលផ្ងារក្រោយបោកក្បាលនឹងកម្រាលឥដ្ឋបណ្តាលឱ្យសន្លប់ ហើយជនសង្ស័យចាប់ក្បាលស្ត្រីរងគ្រោះបោកនឹងកម្រាលឥដ្ឋបន្ថែមទៀតរហូតស្លាប់៕
