.jpg)
ក្រុមជនសង្ស័យដែលសម្ថកិច្ចទើបចាប់បាន។ រូបថត សហការី
តាកែវ/ភ្នំពេញៈ ចៅក្រមស៊ើបសួរនៃសាលាដំបូងខេត្តតាកែវបានឃុំខ្លួនបុរសសង្ស័យ ៤ នាក់ពីថ្ងៃទី ២១ មីនាពាក់ព័ន្ធករណីសម្លាប់យុវជនម្នាក់នៅឃុំត្រពាំងធំខាងត្បូង ស្រុកត្រាំកក់ ខណៈជនសង្ស័យម្នាក់ទៀតត្រូវបានបញ្ជូនទៅសាលាដំបូងរាជធានីភ្នំពេញនៅថ្ងៃទី ២២ មីនា បន្ទាប់ពីចាប់ខ្លួនករណីចាក់សម្លាប់កងសន្តិសុខម្នាក់នៅភ្នំពេញ។
ជុំវិញការឃុំខ្លួនជន ៤ នាក់ ខាងលើលោក ជីវ ច័ន្ទតារា ព្រះរាជអាជ្ញានៃសាលាដំបូងខេត្តតាកែវមិនអាចសុំការអត្ថាធិប្បាយបានទេពីម្សិលមិញដោយលោកថាជាប់រវល់។ ប៉ុន្តែលោក សែម សុជាតិ នាយការិយាល័យព្រហ្មទណ្ឌកម្រិតធ្ងន់ខេត្តតាកែវប្រាប់ពីម្សិលមិញថា ជនសង្ស័យឈ្មោះ ឈិន លី ហៅអឺត អាយុ ៣២ ឆ្នាំ ជាជនដៃដល់ប្រើចម្ពាមបាញ់គូទំនាស់ធ្លាក់ពីលើម៉ូតូ និងស្លាប់ពេលនាំទៅពេទ្យត្រូវបានចៅក្រមស៊ើបសួរលោក ហុង សុងហៀង សម្រេចឃុំខ្លួន ក្រោយចោទបទឃាតកម្មតាមមាត្រា ១៩៩ ឯបក្ខពួក ៣ នាក់ទៀតចោទបទហិង្សាមានស្ថានទម្ងន់ទោសតាមមាត្រា ២១៨ នៃក្រមព្រហ្មទណ្ឌ»។
ពាក់ព័ន្ធនឹងឃាតកម្មនេះលោក ឌុក ធីយ៉ា អធិការនគរបាលស្រុកត្រាំកក់បានរំឭកប្រាប់ថា រឿងនេះកើតពីទំនាស់គ្នារវាងក្មេងទំនើង ២ ក្រុមកាលពីយប់ថ្ងៃទី ២២ ខែកុម្ភៈឆ្នាំនេះនៅភូមិ-ឃុំខាងលើដោយឈ្មោះ ឈិន លី បានបាញ់ចម្ពាមកៅស៊ូត្រូវក្បាលភាគីម្ខាងឈ្មោះ ឌឿន ម៉ៅ ហៅ ចិន អាយុ ១៩ ឆ្នាំពេលជិះម៉ូតូធ្វើឲ្យដួលសន្លប់ និងស្លាប់ពេលបញ្ចូនទៅពេទ្យស្រុកត្រាំកក់។ រីឯឈ្មោះ ណុប ប៊ុនធី អាយុ ១៥ ឆ្នាំដែលជិះពីក្រោយត្រូវក្រុមជនសង្ស័យព្រួតគ្នាវាយរហូតបាក់ដៃម្ខាងរួចគេចខ្លួនបាត់។
លោកបន្តថាក្រោយកើតហេតុបានប៉ុន្មានថ្ងៃសមត្ថកិច្ចបានចាប់ខ្លួនឈ្មោះ ឈិន លី នៅក្នុងភូមិឃុំកើត។ រីឯបក្ខពួក ៣ នាក់ទៀតចាប់ខ្លួនបាននៅខណ្ឌកំបូល ភ្នំពេញ។ ឯ ៤ នាក់ទៀតកំពុងតាមចាប់បន្តទៀត។
ដោយឡែកករណីឃាតកម្មលើសន្តិសុខឯកជនម្នាក់ឈ្មោះ ប៊ុន សុខ ចំរើន អាយុ ៤៦ ឆ្នាំនៅសង្កាត់ទួលស្វាយព្រៃ២ ខណ្ឌបឹងកេងកងនៅរាជធានីភ្នំពេញ កាលពីថ្ងៃ ១៩ មីនានោះ ជនសង្ស័យឈ្មោះ ឈី ប៊ុនណៃ អាយុ ២២ ឆ្នាំ ត្រូវបានសមត្ថកិច្ចបញ្ជូនទៅសាលាដំបូងរាជធានីភ្នំពេញហើយកាលពីថ្ងៃទី ២២ មីនា បន្ទាប់ពីឃាត់ខ្លួននៅល្ងាចកើតហេតុ។
លោកថា អ្នកទាំង ២ ជាបុគ្គលិកសន្តិសុខក្រុមហ៊ុនឯកជនឈ្មោះ CSC ជាមួយគ្នា។ ទំនាស់នេះដោយសារជនសង្ស័យខឹងជនរងគ្រោះថា ខ្លួនមុខដូចអ្នកជក់ថ្នាំញៀនក៏យកកាំបិតមកចាក់ស្លាប់តែម្ដង៕
