ភ្នំពេញៈ ជនសង្ស័យ ៦ នាក់ក្នុងចំណោម ៩ នាក់ ត្រូវបានតុលាការឃុំខ្លួនក្នុងពន្ធនាគារ ខណៈ ៣ នាក់ បញ្ជូនទៅមណ្ឌលបន្សាបគ្រឿងញៀន ក្រោយពីសមត្ថកិច្ចឃាត់ខ្លួនមនុស្សចំនួន ១០១ នាក់ ក្នុងក្លិបខារ៉ាអូខេ Go១៨ នៅសង្កាត់ផ្សារដេប៉ូទី ១ ខណ្ឌទួលគោកកាលពីថ្ងៃទី ២៦ សីហា ពាក់ព័ន្ធនឹងការរក្សាទុក ជួញដូរ និងប្រើប្រាស់គ្រឿងញៀន។
លោក គុជ គឹមឡុង អ្នកនាំពាក្យសាលាដំបូងរាជធានីភ្នំពេញថ្លែងពីម្សិលមិញថា មនុស្ស ៩ នាក់ក្នុងចំណោម ១០១ នាក់ ត្រូវបានបញ្ជូនមកដល់តុលាការកាលពីថ្ងៃទី ១ ខែកញ្ញា។ លោក មុត ដារ៉ា ព្រះរាជអាជ្ញារងនៃសាលាដំបូងរាជធានីភ្នំពេញបានចោទប្រកាន់ចំនួន ៦ នាក់ពីបទជួញដូរ ចាត់ចែងឲ្យប្រើប្រាស់ និងសមគំនិតក្នុងអំពើជួញដូរគ្រឿងញៀន។ រីឯ ៣ នាក់ទៀតចោទប្រកាន់ពីបទប្រើប្រាស់គ្រឿងញៀន។
លោកថា៖ «ក្រោយពីសាកសួរពួកគាត់ទាំង ៩ នាក់នេះ ត្រូវបានលោក មុត ដារ៉ា បញ្ជូនទៅឲ្យចៅក្រមស៊ើបសួរលោក អ៊ឹម វណ្ណៈ បន្តនីតិវិធី។ លោក អ៊ឹម វណ្ណៈ បានសម្រេចឃុំខ្លួន ៦ នាក់ កាលពីថ្ងៃទី ២ ខែកញ្ញា។ រីឯជនសង្ស័យ ៣ នាក់ ដែលជាប់បទចោទប្រើប្រាស់ គ្រឿងញៀនត្រូវបានបញ្ជូនទៅមណ្ឌលអប់រំ ដើម្បីធ្វើការបន្សាបគ្រឿងញៀន»។
លោក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញថ្លែងពីម្សិលមិញថា មន្ត្រីនគរបាលការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញបានបញ្ជូនជនសង្ស័យទៅសាលាដំបូង កាលពីព្រឹកថ្ងៃទី ៣០ ខែសីហា ដើម្បីសាកសួរ និងធ្វើការចោទប្រកាន់ជាផ្លូវការពាក់ព័ន្ធនឹងករណីខាងលើ។
លោកបន្តថា មនុស្សចំនួន ៩ នាក់នេះមាន ទី១- ឈ្មោះ Huang Fei Xiong ភេទប្រុស អាយុ ៣០ ឆ្នាំ ជនជាតិចិន ទី២- ឈ្មោះ Huang Fei Hao ភេទប្រុស អាយុ ២៣ ឆ្នាំ ជនជាតិចិន ទី៣ ឈ្មោះ Lin Kang Lai ភេទប្រុស អាយុ ៤៧ ឆ្នាំ ជនជាតិចិន ទី៤- ឈ្មោះ Zhang Jin Wei ភេទប្រុស អាយុ ៣០ ឆ្នាំជនជាតិចិន ទី៥- ឈ្មោះ វី សាលបុត្រ ភេទប្រុស អាយុ ៤១ ឆ្នាំ ជនជាតិខ្មែរប្រធានសន្តិសុខ ទី៦- ឈ្មោះ Ngoc Giau ភេទស្រី អាយុ ២០ ឆ្នាំ ជនជាតិវៀតណាម ទី៧- ឈ្មោះ យ៉ាយ វុធថា ភេទប្រុស អាយុ ៣៤ ឆ្នាំជនជាតិខ្មែរ ទី៨- ឈ្មោះ សៅ សុខគា ភេទប្រុស អាយុ ១៩ ឆ្នាំ ជនជាតិខ្មែរ និងទី៩- ឈ្មោះ ទិត្យ ចាន់កក្កដា ភេទប្រុស អាយុ ២២ ឆ្នាំ ជនជាតិខ្មែរ។
លោកបន្ថែមថា សមត្ថកិច្ចបានរឹបអូសវត្ថុតាងដូចជា ដបថ្នាំទឹកចំនួន ១៩ ដប សង្ស័យជាសារធាតុញៀនដបថ្នាំពណ៌ផ្កាឈូក ១៤ ដប ដបថ្នាំទឹកម៉ាក Rel deil ១ ដប ម្សៅក្រាមពណ៌សថ្លា ២៧- កញ្ចប់តូច ថ្នាំគ្រាប់ពណ៌បៃតង ២៣ កញ្ចប់តូច ដបថ្នាំចម្រុះពណ៌មានអក្សរចិន ៦៣ ដប ម្សៅកញ្ចប់ម៉ាក Sidomuucul binary stawlna ពណ៌បៃតង ១៦ កញ្ចប់តូច ម្សៅកញ្ចប់ពណ៌តែ ២០ កញ្ចប់តូច ម្សៅកញ្ចប់រូបផ្លែឈើ ១០- កញ្ចប់ កញ្ចប់ថ្នាំរូបផ្លែប៉ោមពណ៌ខៀវ ៦ កញ្ចប់ និងថ្នាំគ្រាប់ពណ៌ក្រហម ៥ គ្រាប់។
លោកថា៖ «យើងបានបញ្ជូនទៅតុលាការទាំងអស់ហើយ គឺទាំងមនុស្ស ៩ នាក់ និងវត្ថុតាងទាំងអស់ហ្នឹង តែតុលាការសម្រេចយ៉ាងណា ខ្ញុំអត់ដឹងទេ អាស្រ័យលើតុលាការចាត់ចែងតាមច្បាប់»៕