.jpg)
លោក គឹម សុវណ្ណ ដែលត្រូវបានតុលាការឃុំខ្លួន។ រូបថត ហ្វេសប៊ុក
កណ្ដាលៈ សាលាដំបូងខេត្តកណ្ដាលកាលពីថ្ងៃពុធទី ១៨ ខែមីនា បានសម្រេចឃុំខ្លួនលោក គឹម សុវណ្ណ មេបញ្ជាការតំបន់ប្រតិបត្ដិការសឹករងស្រុកកៀនស្វាយ ខេត្ដកណ្ដាល បន្ទាប់ពីសមត្ថកិច្ចចាប់ខ្លួនតាមដីការបស់តុលាការពាក់ព័ន្ធនឹងបទ «លួចលក់អចលនវត្ថុរបស់អ្នកដទៃ» ប្រព្រឹត្តនៅស្រុកកៀនស្វាយ ខេត្តកណ្ដាលកាលពីពាក់កណ្ដាលខែធ្នូ ឆ្នាំ ២០១៦។
លោក ទិន សុចិត្រា ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងខេត្តកណ្តាលបានប្រាប់ភ្នំពេញប៉ុស្ដិ៍កាលពីម្សិលមិញថាឈ្មោះ គឹម សុវណ្ណ ភេទប្រុស អាយុ ៥២ ឆ្នាំ ជនជាតិខ្មែរមុខរបរជាយោធាមានតួនាទីជាមេបញ្ជាការតំបន់ប្រតិបត្ដិការសឹករងស្រុកកៀនស្វាយ ខេត្ដកណ្ដាល ទីកន្លែងកំណើតនៅសង្កាត់លេខ ៣ ក្រុងភ្នំពេញ និងលំនៅបច្ចុប្បន្ននៅភូមិទួលត្នោត ឃុំគគីរ ស្រុកកៀនស្វាយ ខេត្ដកណ្ដាល។
លោកបានបញ្ជាក់ថា៖ «យើងបានបញ្ជូនគាត់ទៅឃុំខ្លួននៅពន្ធនាគារខេត្ដកណ្ដាលហើយកាលពីម្សិលមិញ (ថ្ងៃពុធ)»។
ឈ្មោះ គឹម សុវណ្ណ ត្រូវបានផ្ដន្ទាទោសដាក់ពន្ធនាគារចំនួន ១ ឆ្នាំ ពីបទលួចលក់អចលនវត្ថុរបស់អ្នកដទៃប្រព្រឹត្ដនៅភូមិខ្សុំ ឃុំបន្ទាយដែក ស្រុកកៀនស្វាយខេត្ដកណ្ដាលកាលពីថ្ងៃទី ១៤ ខែ ធ្នូ ឆ្នាំ ២០១៦ តាមបញ្ញត្ដិមាត្រា ២៥៥ នៃច្បាប់ភូមិបាលតាមអំណាចសាលក្រមព្រហ្មទណ្ឌលេខ ១៨៣ «គ» ចុះថ្ងៃទី ២៦ ឧសភា ២០១៨ របស់សាលាដំបូងខេត្ដកណ្ដាល»។
បើតាមលោក សុចិត្រា សំណុំរឿងនេះត្រូវបានលោក គឹម សុវណ្ណ ប្ដឹងឧទ្ធរណ៍កាលពីថ្ងៃទី ២០ ខែ មករា ឆ្នាំ ២០២០ ក្រោយពេលសាលក្រមចូលជាស្ថាពរ ក៏ប៉ុន្តែគាត់ត្រូវបានចាប់ខ្លួនកាលពីថ្ងៃទី ១៨ ខែ មីនា ឆ្នាំ ២០២០ តាមដីកាបង្គាប់ឱ្យចាប់ខ្លួនលេខ ៦៤ ចុះថ្ងៃទី ២៧ ខែមករា ឆ្នាំ ២០២០ របស់ចៅក្រមជំនុំជម្រះនៃសាលាដំបូងខេត្ដកណ្ដាល។
លោក ង៉េង ជួ ប្រធាននាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃបានបញ្ជាក់កាលពីម្សិលមិញដែរថា កម្លាំងសមត្ថកិច្ចនៃនាយកដ្ឋាននគរបាលព្រហ្មទណ្ឌបានអនុវត្ដតាមសាលដីកាបង្គាប់ឱ្យឃាត់ខ្លួនឈ្មោះ គឹម សុវណ្ណ របស់តុលាការខេត្ដកណ្ដាលទើបសមត្ថកិច្ចចុះស្រាវជ្រាវរហូតឈានដល់ការឃាត់ខ្លួនបានកាលពីថ្ងៃទី ១៨ ខែមីនា រួចបានបញ្ជូនទៅកាន់តុលាការ។
លោកថ្លែងថា៖ «ករណីនេះយើងអនុវត្ដដីកាចាប់ខ្លួនរបស់ចៅក្រមជំនុំជម្រះខេត្ដកណ្ដាល ក្រោយពេលយើងឃាត់ខ្លួនឈ្មោះ គឹម សុវណ្ណ បានភ្លាមយើងបានបញ្ជូនគាត់ទៅតុលាការខេត្ដកណ្ដាលតែម្ដងកាលពីថ្ងៃទី ១៨ ខែមីនា»។
លោក ឈឿន សុចិត្ដ ស្នងការនគរបាលខេត្តកណ្ដាលបានឱ្យដឹងថា កម្លាំងសមត្ថកិច្ចខេត្ដកណ្ដាលមិនបានចូលរួមអនុវត្ដតាមដីកាបង្គាប់ឱ្យចាប់ខ្លួននេះទេ ព្រោះជាសមត្ថកិច្ចរបស់នាយកដ្ឋាននគរបាលព្រហ្មទណ្ឌ។ ប៉ុន្ដែលោកថា ករណីនេះខាងសមត្ថកិច្ចយោធាបានស្នើសុំយកទៅកាត់ក្ដីនៅតុលាការយោធា ប៉ុន្ដែមិនត្រូវបានអនុញ្ញាតទេ ព្រោះជារឿងបុគ្គលមិនពាក់ព័ន្ធនឹងកិច្ចការយោធាទេ។
លោកបានបញ្ជាក់ថា៖ «ខាងយោធាបានស្នើសុំយកសំណុំរឿងនេះទៅកាត់ទោសនៅតុលាការយោធា ប៉ុន្តែករណីនេះវាមិនមែនជាបទល្មើសយោធានោះទេ តែជាបទល្មើសឯកជនរបស់គាត់ទេ ហើយខាងតំណាងអយ្យការក៏បានជូនដំណឹងទៅខាងក្រសួងការពារជាតិដែរថា ករណីនេះជាករណីបុគ្គលទេជារឿងទាក់ទងនឹងការងាររកស៊ីឯកជនរបស់គាត់។ ឥឡូវលោក គឹម សុវណ្ណ ត្រូវបានបង្គាប់ឲ្យឃុំខ្លួនបណ្ដោះអាសន្ននៅពន្ធនាគារខេត្ដកណ្ដាល»៕
