.jpg)
ជនជាប់ចោទជួញគ្រឿងញៀន (កណ្ដាល) ក្រោយនាំខ្លួនពីឥណ្ឌូនេស៊ី។ រូបថត ប៉ូលិស
ភ្នំពេញៈ មេខ្លោងរត់ពន្ធគ្រឿងញៀនម្នាក់ឈ្មោះ លី ហុងហ្វី (Li Hong Phi) ជនជាតិកាណាដាដើមកំណើតវៀតណាម ដែលត្រូវបានប៉ូលិសឥណ្ឌូនេស៊ីចាប់ខ្លួនប្រគល់ឲ្យសមត្ថកិច្ចកម្ពុជាតាមនិវេទន៍ក្រហមរបស់ប៉ូលិសអាំងទែរប៉ូល (Interpol) នោះត្រូវបានបញ្ជូនទៅឃុំខ្លួននៅពន្ធនាគារព្រៃសកាលពីថ្ងៃ ២ វិច្ឆិកាដែលជាការអនុវត្តទោស ១ ជីវិតពាក់ព័ន្ធករណីរត់ព័ន្ធគ្រឿងញៀនជាង ១ តោន ចូលមកប្រទេស កម្ពុជា កាលពីឆ្នាំ ២០១៦ ។
លោក ម៉ក់ ជីតូ អគ្គស្នងការរងនគរបាលជាតិបានប្រាប់ភ្នំពេញប៉ុស្ដិ៍កាលពីម្សិលមិញថា មេខ្លោងរត់ពន្ធគ្រឿងញៀនរូបនេះត្រូវបានប៉ូលិសឥណ្ឌូនេស៊ីចាប់ខ្លួនកាលពីថ្ងៃទី ២៥ តុលា នៅកោះបាលី ហើយត្រូវបានបញ្ជូនមកដល់កម្ពុជាកាលពីថ្ងៃទី ១ វិច្ឆិកា ក្នុងចំណោមបក្ខពួក ៤ នាក់ ខណៈដែលសំណុំរឿងពួកគេត្រូវបានតុលាការកម្ពុជាសម្រេចផ្ដន្ទាទោសអស់ ១ ជីវិត ។
លោកថា៖ «នៅកាណាដា ប៉ូលិសគេអត់ចាប់ឱ្យយើងទេ ព្រោះជាជនជាតិរបស់គេ។ ប៉ុន្តែនៅពេលវាមកប្រទេសឥណ្ឌូនេស៊ី ប៉ូលិសឥណ្ឌូនេស៊ីបានឃាត់ហើយបានផ្ដល់ដំណឹងមកយើង។ អ៊ីចឹង!បានយើងទៅយកនៅថ្ងៃទី ១ ហើយម្នាក់ហ្នឹងត្រូវបានតុលាការកាត់ទោសរួចហើយអស់ជីវិតតាំងពីឆ្នាំ ២០១៦»។
លោកបន្តថាកាលពីឆ្នាំ ២០១៦ គ្រឿងញៀនប្រភេទកូកាអ៊ីនចំនួន ១ ១០០ គីឡូក្រាម ត្រូវគេលួចបង្កប់ជាមួយត្រីក្នុងទូកុងតឺន័រចំនួន ២ ដឹកតាមនាវាពីប្រទេស អេក្វាទ័រ សំដៅមកកាន់កំពង់ផែព្រះសីហនុ ដើម្បីចូលមកទឹកដីកម្ពុជា។ ប៉ុន្តែកាលនោះត្រូវប៉ូលិសចិនបង្ក្រាបបាននៅកំពង់ផែទីក្រុងស៊ាងហៃ ហើយបានបញ្ជូនកប៉ាល់ដែលដឹកគ្រឿងញៀននោះ មកឱ្យប៉ូលិសកម្ពុជាស្រាវជ្រាវបន្ត។
លោកបន្ថែមថា ប៉ូលិសកម្ពុជាបានស្រាវជ្រាវរកឃើញក្រុមហ៊ុនខ្យល់មួយមានឈ្មោះមិនច្បាស់លាស់បើកដំណើរការនៅកម្ពុជាដែលមានម្ចាស់ជាជនជាតិវៀតណាមឈ្មោះ ង្វៀន វៀនហ្គួង ដើម្បីរង់ចាំទទួលយកគ្រឿងញៀនទាំងនោះ ហើយក្រោយមកប៉ូលិសបានចាប់ខ្លួនជនជាតិវៀតណាមរូបនេះនៅព្រំដែនបាវិត នៅពេលកំពុងព្យាយាមរត់គេចពីកម្ពុជាចូលទៅវៀតណាមវិញ ។
លោក ម៉ក់ ជីតូ អះអាងទៀតថាក្រោយពីចាប់បានបុរសឈ្មោះ ង្វៀន វៀនហ្គួង ប៉ូលិសក៏បានបន្តស្រាវជ្រាវ និងរកឃើញមនុស្សចំនួន ៤ នាក់ទៀត ដែលមានដើមកំណើតវៀតណាម និងមានសញ្ជាតិកាណាដាដែលជាមេខ្លោងរត់ពន្ធគ្រឿងញៀនជាង ១ តោន ចូលកម្ពុជានេះ ប៉ុន្តែពួកគេទាំង ៤ នាក់ បានដឹងខ្លួនមុននិងរត់គេចខ្លួនត្រឡប់ទៅកាណាដាវិញអស់។
លោកអះអាងថា រយៈពេលកន្លងមកមានតែបុរសជនជាតិវៀតណាមឈ្មោះ ង្វៀន វៀនហ្គួង ត្រូវឃុំឃាំងតាមការសម្រេចផ្ដន្ទាទោសដាក់ពន្ធនាគារអស់ ១ ជីវិត របស់តុលាការតាំងពីឆ្នាំ ២០១៦ ខណៈមេខ្លោងទាំង ៤ នាក់ ត្រូវបានដាក់ឈ្មោះក្នុងនិវេទន៍ក្រហមរបស់ប៉ូលិសអន្តរជាតិអាំងទែរប៉ូល ដើម្បីតាមចាប់ខ្លួនហើយរហូតមកទល់ពេលនេះ ទើបចាប់បានម្នាក់ប៉ុណ្ណោះ។
លោកថា៖ «កាលយើងចាប់បានអា ១ ហ្នឹង (ង្វៀន វៀនហ្គួង) យើងក៏មិនដឹងថា មានពួកនេះដែរ (មេខ្លោងទាំង ៤ នាក់)។ ដល់ពេលយើងចាប់បាន និងសួរចម្លើយ ង្វៀន វៀនហ្គួង ទើបយើងដឹងថា មានបក្ខពួកចំនួន ៤ នាក់ទៀត ដល់ពេលស្រាវជ្រាវរកលិខិតឆ្លងដែនចេញចូលពួកវាបានទៅបាត់ហើយ។ ពួកនេះជាជនជាតិវៀតណាមទាំងអស់ហ្នឹង ប៉ុន្តែអា ៤ នាក់ទៅនៅកាណាដាយូរបានចូលសញ្ជាតិកាណាដាទៅ»។
ជាមួយគ្នានេះកាលពីថ្ងៃទី ១ វិច្ឆិកា នគរបាលខេត្តស្ទឹងត្រែងក៏បានឃាត់ខ្លួនជនសង្ស័យរត់ព័ន្ធគ្រឿងម្នាក់ជាជនជាតិឥណ្ឌូនេស៊ីនៅក្នុងឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង ខណៈជនសង្ស័យនេះបានរត់ពន្ធគ្រឿងញៀនមេតំហ្វេតាមីន ៤ កញ្ចប់ទម្ងន់ជិត ១ គីឡូ (៩៤៩,៨ ក្រាម)។
ប៉ូលិសខេត្តស្ទឹងត្រែងម្នាក់សុំមិនបញ្ចេញឈ្មោះបានប្រាប់ភ្នំពេញប៉ុស្ដិ៍ម្សិលមិញថា ជនសង្ស័យរូបនេះត្រូវបានតុលាការខេត្តស្ទឹងត្រែងសម្រេចចោទប្រកាន់ និងបញ្ជូនទៅឃុំខ្លួនបណ្ដោះអាសន្នពីថ្ងៃទី ២ វិច្ឆិកា ក្រោយពីឃាត់ខ្លួនបានពេលកំពុងរត់ព័ន្ធគ្រឿងញៀនពីឡាវ បំណងឆ្លងកាត់ខេត្តស្ទឹងត្រែងទៅខេត្តសៀមរាប និងបន្តដំណើរតាមយន្តហោះពីសៀមរាបមកភ្នំពេញដើម្បីបន្តរត់ពន្ធគ្រឿងញៀនទាំងនោះទៅទីក្រុងហុងកុង។
មន្ត្រីរូបនេះអះអាងថាក្រោយពីសាកសួរ ជនសង្ស័យបានឆ្លើយថា ការរត់ពន្ធគ្រឿងញៀននេះគឺមានជនពាក់ព័ន្ធកំពុងស្ថិតក្នុងប្រទេសផ្សេង ប៉ុន្តែលោកមិនបានបញ្ជាក់ពីឈ្មោះប្រទេសណាឡើយ ដោយគ្រាន់តែអះអាងថា ការស្រាវជ្រាវរកជនពាក់ព័ន្ធទាំងនោះគឺជាភារកិច្ចរបស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិ ៕
