ភ្នំពេញ/បន្ទាយមានជ័យៈ អយ្យការអមសាលាដំបូងខេត្តបន្ទាយមានជ័យបានសម្រេចចោទប្រកាន់ និងឃុំស្រ្តីម្នាក់នៅពន្ធនាគារខេត្តកាលពីថ្ងៃសុក្រសប្តាហ៍មុន បន្ទាប់ពីសមត្ថកិច្ចចាប់ខ្លួនកាលពីថ្ងៃទី ៥ សីហា ពាក់ព័ន្ធនឹងការជួញគ្រឿងញៀនមេតំហ្វេតាមីន ២ ០៥៣,១៥ ក្រាម ខណៈស្ត្រីម្នាក់ទៀតកំពុងត្រូវអយ្យការនៃតុលាការរាជធានីភ្នំពេញស៊ើបសួរពាក់ព័ន្ធគ្រឿងញៀនមេតំហ្វេតាមីន ៩៨៦,៦៧ ក្រាម។
លោក រឿន លីណា អ្នកនាំពាក្យសាលាដំបូងខេត្តបន្ទាយមានជ័យបានប្រាប់ពីម្សិលមិញថា ស្រ្តីឈ្មោះ ឆៃ ឌិចឡាមី ហៅ ហ៊ុច អាយុ ៤៨ ឆ្នាំ ដែលនគរបាលប្រឆាំងគ្រឿងញៀនខេត្តចាប់ខ្លួនជាមួយវត្ថុតាងគ្រឿងញៀន ២ ០៥៣,១៥ ក្រាមនោះ ត្រូវបានលោកចៅក្រមស៊ើបសួរនៃសាលាដំបូងខេត្តបន្ទាយមានជ័យចោទប្រកាន់ និងបង្គាប់ឲ្យឃុំខ្លួនហើយ កាលពីថ្ងៃសុក្រចុងសប្តាហ៍មុន។
លោកថា៖ «ស្រ្តីរូបនេះត្រូវបានចៅក្រមស៊ើបសួរសម្រេចចោទប្រកាន់តាមបញ្ញត្តិមាត្រា ៤០ នៃច្បាប់ស្តីពីការត្រួតពិនិត្យគ្រឿងញៀន ប៉ុន្តែខ្ញុំសុំមិនប្រាប់ឈ្មោះចៅក្រមដែលចោទស្រ្តីម្នាក់នោះទេ»។
ពាក់ព័ន្ធការចាប់ខ្លួនស្រ្តី ឈ្មោះ ឆៃ ឌិចឡាមី ហៅ ហ៊ុច នេះ លោក ង៉េង សុជា ស្នងការរងទទួលផែនប្រឆាំងគ្រឿងញៀននៃស្នងការដ្ឋាននគរបាលខេត្តបន្ទាយមានជ័យ ធ្លាប់បានប្រាប់ពីថ្ងៃទី ៦ សីហា ថា គាត់មានលំនៅផ្ទះលេខ ១ ក្នុងភូមិភ្នំកន្ទួត សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ។
លោកបានបញ្ជាក់ថា៖ « សមត្ថកិច្ចរបស់យើងចាប់ខ្លួនស្រ្តីម្នាក់នេះ ដោយសារគាត់ជាមុខសញ្ញាចាស់ ហើយគាត់ក៏មានដីកាបញ្ជាឲ្យចាប់ខ្លួនពីតុលាការខេត្តបន្ទាយមានជ័យដែរ»។
លោកបានឲ្យដឹងថា ស្រ្តីឈ្មោះ ឆៃ ឌិចឡាមី ត្រូវបានសមត្ថកិច្ចតាមដានជាច្រើនខែមកហើយ។ បន្ទាប់មកក៏សុំយោបល់ពីអយ្យការអមសាលាដំបូងខេត្ត ដើម្បីចេញដីកាចាប់ខ្លួនបានតែម្តង។
លោក សុជា បានបញ្ជាក់ថា ក្រោយចាប់ខ្លួនសមត្ថកិច្ចបានឆែកក្នុងផ្ទះស្រ្តីសង្ស័យរកឃើញគ្រឿងញៀនប្រភេទមេតំហ្វេតាមីន (ICE) ម៉ាទឹកកកទម្ងន់ ១ ៨២៤,១៩ ក្រាម និងថ្នាំញៀនមេតំហ្វេតាមីនប្រភេទគ្រាប់ (WY) ទម្ងន់ ២២៨,៩៦ ក្រាម ដែលសរុប រួមមានទម្ងន់ ២ ០៥៣,១៥ ក្រាម។
ដោយឡែកស្ត្រីជាជនសង្ស័យជួញដូរគ្រឿងញៀនម្នាក់ទៀត ឈ្មោះ ដួង រស្មីច័ន្ទ អាយុ ២៨ ឆ្នាំ ដែលនគរបាលចាប់ខ្លួនកាលពីថ្ងៃទី ៨ សីហា នៅភូមិអូឌឹមក្នុងសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញនោះ រហូតមកទល់ពេលនេះ កំពុងស្ថិតក្នុងនីតិវិធីស៊ើបសួររបស់អយ្យការអមសាលាដំបូងរាជធានីភ្នំពេញនៅឡើយទេ។ នេះបើតាមលោក សឿង ណុល នាយករងនៃមន្ទីរប្រឆាំងគ្រឿងញៀនបានប្រាប់កាលពីម្សិលមិញ។
លោកបានបញ្ជាក់ថា៖ «ពីថ្ងែសៅរ៍ទី ១០ សីហា សមត្ថកិច្ចខ្ញុំបានបញ្ជូនគាត់ទៅតុលាការ ប៉ុន្តែដោយសារថ្ងៃសៅរ៍មានតែព្រះរាជអាជ្ញាម្នាក់ប្រចាំការ ហើយមានសំណុំរឿងច្រើន ខាងតុលាការធ្វើការមិនទាន់។ ដូច្នេះជនម្នាក់នោះកំពុងស៊ើបសួរនៅអយ្យការនៅឡើយទេ»។
លោកបានឲ្យដឹងដែរថា មុនឈានដល់ការចាប់ខ្លួនឈ្មោះ ដួង រស្មីច័ន្ទ នេះ គឺសមត្ថកិច្ចរបស់លោកបានប្រើពេលតាមដានជាច្រើនខែមកហើយ ទើបចាប់ខ្លួនបាននៅតាមផ្លូវ ខណៈជននេះបម្រុងយកគ្រឿងញៀនទៅឲ្យគេនៅខេត្ត។ចំពោះវត្ថុតាងចាប់យកបានរួមមាន សារធាតុញៀនមេតំហ្វេតាមីន (ICE) ទម្ងន់ ៩៨៦,៦៧ ក្រាម និងទូរស័ព្ទដៃ ១ គ្រឿង៕