មណ្ឌលគិរីៈ បុរស ៤ នាក់ក្នុងចំណោម ៦ នាក់ត្រូវបានតុលាការឃុំខ្លួនថ្ងៃទី ៧ មេសា ពាក់ព័ន្ធករណីកាប់គាស់ និងឈូសឆាយដីព្រៃដើម្បីយកដីធ្វើជាកម្មសិទ្ធិក្នុងតំបន់ការពារធម្មជាតិស្ថិតក្នុងស្រុកកោះញែក ខេត្តមណ្ឌលគិរីនៃតំបន់របៀងអភិរក្សជីវចម្រុះប្រព័ន្ធតំបន់ការពារធម្មជាតិ។
លោក កែវ សុភ័ក្ត្រ ប្រធានមន្ទីរបរិស្ថានខេត្តមណ្ឌលគិរីថ្លែងពីថ្ងៃម្សិលមិញថា ចៅក្រមស៊ើបសួរនៃសាលាដំបូងខេត្តមណ្ឌលគិរីកាលពីថ្ងៃទី ៧ ខែមេសា បានសម្រេចឃុំខ្លួនបុរស ៤ នាក់ដាក់ពន្ធនាគារបណ្ដោះអាសន្នពាក់ព័ន្ធករណីកាប់គាស់ និងឈូសឆាយដីព្រៃដើម្បីយកដីធ្វើជាកម្មសិទ្ធិ តាមបញ្ញត្តិមាត្រា ៦២ និងមាត្រា ៥៦ នៃច្បាប់ស្ដីពីតំបន់ការពារធម្មជាតិ។
លោកថ្លែងថា៖ «កាលពីម្សិលមិញមាន ៣ ករណីផ្សេងគ្នាចំពោះករណីកាប់គាស់ និងឈូសឆាយដីព្រៃ ដើម្បីយកដីធ្វើជាកម្មសិទ្ធិក្នុងតំបន់ការពារធម្មជាតិ។ ក្នុងនោះយើងឃាត់ខ្លួនបានជនសង្ស័យចំនួន ៦ នាក់ហើយបញ្ជូនទៅតុលាការទាំងអស់ហើយកាលពីម្សិលមិញនេះតុលាការសម្រេចឃុំខ្លួនបណ្ដោះអាសន្នចំនួន ៤ នាក់ហើយ»។
លោកប្រធានមន្ទីរថ្លែងថា ជនត្រូវចោទ ៣ នាក់នេះជាជនជាតិខ្មែរឈ្មោះ ទិត សុបឿន ភេទប្រុស អាយុ ៤៧ ឆ្នាំរស់នៅភូមិព្រឹត ឃុំក្រែក ស្រុកពញាក្រែក ខេត្តត្បូងឃ្មុំ។ ឈ្មោះ រ៉ុង សុខជា ភេទប្រុស អាយុ ២២ ឆ្នាំមានលំនៅបច្ចុប្បន្នភូមិជីប៉េះ ឃុំមេមត់ ស្រុកមេមត់ ខេត្តត្បូងឃ្មុំ និងឈ្មោះ យាត ឆៃយ៉ា ភេទប្រុស អាយុ ១៩ ឆ្នាំមានលំនៅបច្ចុប្បន្នភូមិគ ឃុំក្រែក ស្រុកពញាក្រែក ខេត្តត្បូងឃ្មុំ។ ជនទាំង ៣ នាក់នេះត្រូវបានមន្ត្រីឧទ្យានុរក្សនៃរបៀងអភិរក្សជីវចម្រុះចាប់ឃាត់ខ្លួន ខណៈពួកគេកំពុងធ្វើសកម្មភាពបើកត្រាក់ទ័រឈូសឆាយ និងភ្ជួរដីដោយគ្មានការអនុញ្ញាតនៅត្រង់ចំណុចត្រពាំងទឹកល្អក់ ស្ថិតក្នុងភូមិរវ៉ាក់ ឃុំរយ៉ ស្រុកកោះញែក ខេត្តមណ្ឌលគិរី នៅក្នុងតំបន់របៀងអភិរក្សជីវចម្រុះប្រព័ន្ធតំបន់ការពារធម្មជាតិ។ លោកថាក្នុងប្រតិបត្តិការទប់ស្កាត់ និងបង្ក្រាបបទល្មើសធនធានធម្មជាតិនេះ មន្ត្រីឧទ្យានុរក្សបានត្រួតពិនិត្យកន្លែងកើតហេតុខាងលើរកឃើញថា មានការកាប់គាស់រុករាន និងឈូសឆាយដីព្រៃ។ មន្ត្រីបានវាស់វែងជាក់ស្ដែងលើផ្ទៃដីខាងលើមានទំហំជាង ៣០ ហិកតារួមជាមួយត្រាក់ទ័រ ២ គ្រឿងត្រូវបាននាំយកទៅរក្សាទុកបណ្ដោះអាសន្ននៅស្នាក់ការរបៀងអភិរក្សជីវចម្រុះ ដើម្បីកសាងសំណុំរឿងបទល្មើសធនធានធម្មជាតិបញ្ជូនទៅតុលាការចាត់ការបន្តតាមនីតិវិធី។
បើតាមប្រធានមន្ទីរបរិស្ថានឱ្យដឹងដែរថា បុរសម្នាក់ទៀតត្រូវបានតុលាការសម្រេចឃុំខ្លួនបណ្ដោះអាសន្ននៅថ្ងៃនោះដែរពាក់ព័ន្ធករណីប្រើប្រាស់អាវុធជាតិផ្ទុះធ្វើឲ្យខាតដល់ធនធានធម្មជាតិតាមបញ្ញត្តិមាត្រា ៦១ និងមាត្រា ៥៦ ជាបទល្មើសធនធានធម្មជាតិថ្នាក់ទី ៣ នៃច្បាប់ស្ដីពីតំបន់ការពារធម្មជាតិ។ លោកថាជនត្រូវចោទនេះឈ្មោះ រ៉េន លីណា ភេទប្រុស អាយុ ២៥ ឆ្នាំមានទីលំនៅបច្ចុប្បន្ននៅភូមិអូរយេះ ឃុំស្រែសង្គម ស្រុកកោះញែក ខេត្តមណ្ឌលគិរី។
ជននេះត្រូវបានមន្ត្រីរដ្ឋបាលការពារ និងអភិរក្សធម្មជាតិរបស់ដែនជម្រកសត្វព្រៃភ្នំព្រេចឃាត់ខ្លួនកាលពីយប់ថ្ងៃទី ៥ ខែមេសា នៅចំណុចអូររហតក្នុងភូមិជីក្លប់ ឃុំសុខសាន្ត ស្រុកកោះញែក រួមជាមួយវត្ថុតាងកាំភ្លើងកែច្នៃប្រភេទឆ្នុកដូងចំនួន ១ ដើម និងដបដាក់រំសេវចំនួន ១ ដបសម្រាប់កែច្នៃបរបាញ់សត្វព្រៃ។
តាមរបាយការណ៍មន្ទីរបរិស្ថានខេត្ដមណ្ឌលគិរីឱ្យដឹងដែរថា កាលពីថ្ងៃទី ៧ មេសា មន្ដ្រីឧទ្យានុរក្សបានបញ្ជូនជនសង្ស័យ ២ រូបទៅតុលាការពាក់ព័ន្ធករណីកាប់គាស់ រុករាន ដីព្រៃដើម្បីយកធ្វើជាកម្មសិទ្ធិផងដែរ។ ជនសង្ស័យទាំង ២ រូបនេះឈ្មោះ កាន់ សុម៉ាលី ភេទប្រុស អាយុ ៥៧ ឆ្នាំឈ្មោះ ណាំ សុខា ភេទប្រុស អាយុ ៣៨។
របាយការណ៍បញ្ជាក់ថា ជនសង្ស័យទាំង ២ ត្រូវបានឃាត់ខ្លួននៅត្រពាំងទឹកល្អក់ក្នុងភូមិរវ៉ាក់ ឃុំរយ៉ ស្រុកកោះញែកក្នុងរបៀងអភិរក្សជីវចម្រុះប្រព័ន្ធតំបន់ការពារ ធម្មជាតិ ខណៈពួកគេកំពុងបើកត្រាក់ទ័រឈូសឆាយ និងភ្ជួរដី៕ ដោយគ្មានការអនុញ្ញាត៕