The Phnom Penh Post Search

Search form

Logo of Phnom Penh Post newspaper Phnom Penh Post - ឃុំ​ខ្លួន​លោក អាំង មាលតី ​នៅ​ពន្ធនាគារ​ខេត្ត​កណ្តាល

ឃុំ​ខ្លួន​លោក អាំង មាលតី ​នៅ​ពន្ធនាគារ​ខេត្ត​កណ្តាល

លោក អាំង មាលតី អតីត​ប្រធាន​សាលា​ដំបូង​រាជធានី​ភ្នំពេញ​នៅក្នុង​ពិធី​មួយ​នា​ពេល​កន្លងមក​។
លោក អាំង មាលតី អតីត​ប្រធាន​សាលា​ដំបូង​រាជធានី​ភ្នំពេញ​នៅក្នុង​ពិធី​មួយ​នា​ពេល​កន្លងមក​។ ហុង មិនា

ឃុំ​ខ្លួន​លោក អាំង មាលតី ​នៅ​ពន្ធនាគារ​ខេត្ត​កណ្តាល

ភ្នំពេញៈ អតីត​ប្រធាន​សាលា​ដំបូង​រាជធានី​ភ្នំពេញ​លោក អាំង មាលតី ត្រូវ​បាន​សាលា​ដំបូង​ខេត្ត​កណ្តាល​ធ្វើការ​ចោទប្រកាន់​ពី​បទ​បំផ្លាញ​ដោយ​ចេតនា និង​គៃ​បំបាត់​ដោយ​ទុច្ចរិត ​បន្ទាប់ពី​អង្គភាព​ប្រឆាំង​អំពើពុក​រលួយ​បាន​ធ្វើការ​ចោទប្រកាន់​​ពី​បទ​វីតិក្រម​ (ជំរិត​ទារ​ប្រាក់) ជា​ថ្នូរ​នឹង​ការ​ដោះលែង​បណ្តោះ​អាសន្ន​ដល់​លោក ថៅ ថាវី ដែល​ធ្លាប់​ត្រូវ​បាន​ចោទប្រកាន់​ពាក់ព័ន្ធ​នឹង​គ្រឿងញៀន។

លោក លឹម សុគន្ថា ព្រះរាជអាជ្ញា​អមសាលា​ដំបូង​ខេត្ត​កណ្តាល​ដែល​កាន់​សំណុំ​រឿង​នោះ​បាន​បដិសេធ​ពុំ​ធ្វើការ​អត្ថាធិប្បាយ​ទេ​ដោយ​លោក​មាន​ប្រសាសន៍​ថា៖ «ខ្ញុំ​មិន​ចង់​និយាយ​ច្រើន​ទេ»។

ប៉ុន្តែ​មន្ត្រី​តុលាការ​ម្នាក់​សុំ​មិន​បញ្ចេញ​ឈ្មោះ​បាន​ឲ្យ​ដឹង​ថា​ក្រោយពី​លោក​ព្រះរាជអាជ្ញា​ធ្វើការ​សាកសួរ​រួច​លោក អាំង មាលតី​ ត្រូវ​បាន​ចោទប្រកាន់​តាម​មាត្រា​ទី​ ៦០១ ពី​បទ «បំផ្លាញ​ដោយ​ចេតនា និង​កេងបំបាត់​ដោយ​ទុច្ចរិត​»។

លោក​បាន​ថ្លែង​ថា៖ «​បច្ចុប្បន្ន​គាត់​ត្រូវ​បាន​បញ្ជូន​ទៅ​ឃុំ​ខ្លួន​នៅ​ពន្ធនាគារ​ខេត្ត​កណ្តាល​ហើយ»។ បើ​យោង​តាម​ការ​ចោទប្រកាន់​​មាត្រា​នោះ​គាត់​ប្រឈម​ទោស​ពី​ ៥ ​ទៅ​ ១០ ​ឆ្នាំ​ប្រសិន​បើ​រកឃើញ​ថា​បាន​ប្រព្រឹត្ត​ដូច​ការ​ចោទប្រកាន់​»។

ចំណែកឯ​លោក​ចៅក្រម​ស៊ើបសួរ​លោក អ៊ី សុវណ្ណ មិន​អាច​ទំនាក់ទំនង​ដើម្បី​ធ្វើការ​អត្ថាធិប្បាយ​បាន​ទេ​។

លោក​ទេសរដ្ឋមន្ត្រី ឱម យ៉ិនទៀង និង​ជា​ប្រធាន​អង្គភាព​ប្រឆាំង​អំពើ​ពុករលួយ​បាន​ថ្លែង​ឲ្យ​ដឹង​ថា​លោក អាំង មាលតី រង​ចោទ និង​ចូល​បំភ្លឺ​ពី​បទ​នីតិក្រម (ជំរិត​ទារ​ប្រាក់) នៃ​រថយន្ត AUDI មួយ​គ្រឿង​របស់​លោក ថៅ ថាវី។ ​

លោក​បាន​ថ្លែង​ឲ្យ​ដឹង​ទៀត​ថា​បច្ចុប្បន្ន​រថយន្ត​នេះ​ត្រូវ​បាន​ប្រគល់​ទៅ​ឲ្យ​ម្ចាស់​វិញ​បន្ទាប់ពី​សាលា​ដំបូង​កាលពី​ថ្ងៃ​ទី​ ៨ ខែ​សីហា​បាន​ប្រកាស​សាលក្រម​របស់​លោក ថៅ ថាវី ដែល​ជាប់​ពាក់ព័ន្ធ​នឹង​គ្រឿងញៀន។

លោក​ថា៖ «ករណី​ប្រើប្រាស់​ថ្នូរ​ជា​ការ​ទទួល​រថយន្ត​នេះ​គឺ​ដូចជា​ករណី​ដែល​ប៉ូលិស​ចរាចរណ៍​ផាក​ពិន័យ​អ្នក​បើកបរ​ដែល​មិន​មាន​ខុស​អ្វី​អ៊ីចឹង អ៊ីចឹង​ហើយ ACU យើង​ចោទ​គាត់​ពី​បទ​នីតិក្រម​ប៉ុន្តែ​យើង​នៅ​តែ​រង់ចាំ​លទ្ធផល​សាកសួរ​របស់​ចៅក្រម»។

សូម​រំឭក​ផង​ដែរ​ថា​លោក អាំង មាលតី ត្រូវ​បាន​អង្គភាព​ប្រឆាំង​អំពើ​ពុករលួយ​ឃាត់​ខ្លួន​កាលពី​រសៀល​ថ្ងៃ​ទី​ ១៤ ខែ​សីហា ឆ្នាំ​ ២០១៥ ហើយ​លោក​ក៏​ត្រូវ​បាន​បញ្ចប់​មុខ​តំណែង​ជា​ប្រធាន​សាលា​ដំបូង​រាជធានី​ភ្នំពេញ​កាលពី​ខែ​កុម្ភៈ​ឆ្នាំ ២០១៥ ដោយ​ឲ្យ​មក​បញ្ឈរ​ជើង​នៅ​ក្រសួង​យុត្តិធម៌​វិញ។

ការ​បញ្ឈប់​តំណែង​នេះ​ក្រោយ​ពី​លោក​នាយក​រដ្ឋមន្ត្រី​ប្រតិកម្ម​ភ្លាមៗ​ទៅលើ​ចៅក្រម​សាលា​ដំបូង​រាជធានី​ភ្នំពេញ​ករណី​ដោះលែង​ឪពុកម្តាយ​លោក ថោង សារ៉ាត់។

បើ​យោង​តាម​ក្រុម​ប្រឹក្សា​ជាតិ​ប្រឆាំង​អំពើ​ពុករលួយ​បាន​ប្រកាស​នា​ពេល​កន្លង​មក​បាន​ឲ្យ​ដឹង​ថា​គិត​ត្រឹម​ថ្ងៃ​ទី​ ១៥ ខែ​ធ្នូ​ ឆ្នាំ​ ២០១៤ ​នេះ​អង្គភាព​​ប្រឆាំង​អំពើ​ពុករលួយ​ទទួល​បាន​​ពាក្យ​បណ្តឹង​ចំនួន ៨៩៩ ក្នុង​នោះ​មាន​ពាក្យ​បណ្ដឹង ១៦ ភាគរយ​មន្ត្រី​ដែល​តែងតាំង​ដោយ​ព្រះរាជក្រឹត្យ​ហើយ ១៩ ភាគរយ​មន្ត្រី​ដែល​តែងតាំង​ដោយ​អនុក្រឹត្យ និង​បណ្តឹង​ ៥២ ​ភាគរយ​ជា​មន្ត្រី​ដែល​តែងតាំង​ដោយ​ប្រកាស​។

គួរ​រំឭក​ថា​កាលពី​ចុង​ឆ្នាំ​ ២០១៤ ​អង្គការ​តម្លាភាព​កម្ពុជា​បាន​បង្ហាញ​របាយការណ៍​មួយ​ថា​កម្ពុជា​ជា​ប្រទេស​ដែល​មាន​កម្រិត​អំពើ​ពុករលួយ​ធ្ងន់ធ្ងរ។ ក្នុង​របាយការណ៍​នោះ​បាន​ដាក់​ពិន្ទុ​ឲ្យ​កម្ពុជា ២១ ​លើ​១០០ និង​បាន​ចាត់​ចំណាត់​ថ្នាក់​កម្ពុជា​ស្ថិត​ក្នុង​លំដាប់​ថ្នាក់​ទី​ ១៥៦ ក្នុង​ចំណោម​ប្រទេស​ ១៧៥ ស្មើ​នឹង​ប្រទេស​ភូមា៕

អត្ថបទគួរចាប់អារម្មណ៍