.jpg)
បុរសម្នាក់ ដែលត្រូវសមត្ថកិច្ចឃាត់ខ្លួនពាក់ព័ន្ធនឹងករណីប្រើអាវុធគ្មានច្បាប់គំរាមគូទំនាស់។ រូបថត ហ្វេសប៊ុក
កំពង់ឆ្នាំងៈ សមត្ថកិច្ចនគរបាលខេត្តកំពង់ឆ្នាំងសហការជាមួយនគរបាលស្រុកទឹកផុសកាលពីម៉ោង ១ រំលងអធ្រាត្រឈានចូលថ្ងៃទី ១ ខែកញ្ញា បានចាប់ខ្លួនកូនប្រុសលោកឧកញ៉ា ញ៉ឹក ផន គឺ លោក ញឹក ផល ពាក់ព័ន្ធនឹងករណីប្រើអាវុធគំរាមបុរសម្នាក់ប្រព្រឹត្តកាលពីរសៀលថ្ងៃចន្ទ។
លោក អៀ ប៊ុនធឿន អ្នកនាំពាក្យស្នងការដ្ឋាននគរបាលខេត្តកំពង់ឆ្នាំងបានប្រាប់ភ្នំពេញប៉ុស្តិ៍ពីម្សិលមិញថា ករណីគំរាមដោយអាវុធនេះផ្ដើមចេញពីជម្លោះពាក្យសម្ដីរវាងលោក ញឹក ផល អាយុ ៣៨ ឆ្នាំ មានលំនៅក្នុងភូមិថ្នល់បត់ ឃុំក្បាលទឹក ស្រុកទឹកផុស ខេត្តកំពង់ឆ្នាំង ដែលជាអ្នកបើកបររថយន្តម៉ាស់ស្ដា និងបុរសម្នាក់ឈ្មោះ ប្រាក់ សំបាន អាយុ ៣០ ឆ្នាំ រស់នៅភូមិក្រសាំង ឃុំក្បាលទឹក ដែលជាអ្នកបើកបរម៉ូតូ។
លោកបានបន្តថា យោងតាមការផ្ដល់ព័ត៌មានពីពលរដ្ឋក្បែរកន្លែងកើតហេតុ និងខ្សែវីដេអូឃ្លីបដែលសមត្ថកិច្ចទទួលបានបង្ហាញថា មុនមានជម្លោះឈានដល់ជនសង្ស័យដកអាវុធពីក្នុងរថយន្តមកគំរាមនោះ គឺដំបូងជនរងគ្រោះជាម្ចាស់ម៉ូតូបានបើកបរក្នុងស្ថានភាពស្រវឹង ហើយបានរេចង្កូតពេញផ្លូវ។ បន្ទាប់មកបានវ៉ាជែងអ្នកបើករថយន្ត រួចក៏ឈប់នោមនៅក្បែរចិញ្ចើមផ្លូវ។ ឃើញដូច្នោះជនសង្ស័យក៏បានបើកកញ្ចក់រថយន្ត ហើយជេរជនរងគ្រោះនោះ។ ដោយមិនអាចទ្រាំចំពោះការជេរប្រមាថនេះបានជនរងគ្រោះក៏បានឈ្លោះប្រកែកឌឺដងពាក្យសម្ដីទៅរកជនសង្ស័យវិញ។ បន្ទាប់មកជនសង្ស័យបានទាញកាំភ្លើងមកគំរាមជនរងគ្រោះ រួចក៏ឡើងរថយន្តបើកទៅកាន់ចម្ការអំពៅរបស់ខ្លួនបាត់ទៅ។
លោកបានបញ្ជាក់ថា៖ «ករណីនេះមុនដំបូងគឺជារឿងតូច ប៉ុន្តែគូភាគីទាំង ២ ខ្វះភាពអធ្យាស្រ័យឲ្យគ្នាទៅវិញទៅមក ទើបបង្កជាជម្លោះឲ្យកើតជារឿងធំដែលឈានដល់ការប្រព្រឹត្តបទល្មើសព្រហ្មទណ្ឌ»។
បើតាមលោក ប៊ុនធឿន ពេលនេះជនសង្ស័យកំពុងត្រូវមន្ត្រីនគរបាលជំនាញសាកសួរពាក់ព័ន្ធបទល្មើស «គំរាមកំហែងពលរដ្ឋដោយអាវុធ»។
ជុំវិញករណីនេះលោក ប៉ុល វុទ្ធី ស្នងការរងខេត្តកំពង់ឆ្នាំងទទួលផែនព្រហ្មទណ្ឌបានប្រាប់ភ្នំពេញប៉ុស្តិ៍ពីម្សិលមិញថា តាមចម្លើយសារភាពរបស់ជនសង្ស័យ អាវុធ Ak-47 ដែលគេបានយកពីក្នុងរថយន្តមកគំរាមជនរងគ្រោះនោះ ពុំមានលិខិតសម្គាល់ និងលិខិតអនុញ្ញាតឲ្យប្រើប្រាស់ពីស្ថាប័នជំនាញទេ។ អាវុធនោះគឺសំណល់ពីសង្គ្រាមដែលជនសង្ស័យរើសបានពីក្នុងដីស្រែ ១ កន្លែងនៅខេត្តកំពង់ឆ្នាំង ក្រោយពីភ្ជួររាស់ដីដាំអំពៅកាលពីឆ្នាំមុន ហើយយកមកដុសលាង និងលាបថ្នាំឲ្យថ្មី។
លោកថ្លែងថា៖ «ទង្វើរបស់ជនសង្ស័យខាងលើនេះគឺជាបទល្មើសព្រហ្មទណ្ឌ ដែលជាប់ពាក់ព័ន្ធនឹងការរក្សាទុក កាន់កាប់ ប្រើប្រាស់ និងដឹកជញ្ជូនអាវុធខុសច្បាប់។ បន្ថែមពីលើនេះជនសង្ស័យបានប្រើប្រាស់អាវុធខុសច្បាប់នេះ មកគំរាមកំហែងលើពលរដ្ឋថែមទៀត»។
យ៉ាងណាក៏ដោយកាលពីព្រឹកម្សិលមិញ សមត្ថកិច្ចបានចេញលិខិតកោះអញ្ជើញឲ្យជនរងគ្រោះចូលមកឆ្លើយបំភ្លឺជុំវិញករណីនេះ ដើម្បីជាប្រយោជន៍ក្នុងការដាក់បន្ទុកលើជនសង្ស័យ និងកសាងសំណុំរឿងបញ្ជូនទៅតុលាការចាត់វិធានការបន្តទៅតាមនីតិវិធីច្បាប់។
ក៏ប៉ុន្តែសមត្ថកិច្ចនគរបាលមូលដ្ឋានបានប្រាប់ភ្នំពេញប៉ុស្តិ៍ពីម្សិលមិញថា ក្រោយពេលកើតហេតុជនរងគ្រោះមិនបានស្នាក់នៅផ្ទះទេ។ លោក អ៊ិន សាវឿត នាយនគរបាលប៉ុស្តិ៍ឃុំក្បាលទឹកបញ្ជាក់ថា៖ «ជនរងគ្រោះទំនងជាគេចខ្លួនទៅសំងំលាក់ខ្លួននៅកន្លែងណាមួយក្នុងទីក្រុងភ្នំពេញ ក្រោយពីគាត់បានរងការគំរាមដោយអាវុធពីជនសង្ស័យ»៕
