ភ្នំពេញ/ស្ទឹងត្រែងៈ បុរសជនជាតិឡាវចំនួន ៣ នាក់ ដែលនៅក្នុងក្រុមផ្សេងគ្នា ត្រូវបានសមត្ថកិច្ចនគរបាលកម្ពុជាចាប់ខ្លួនបានកាលពីថ្ងៃពុធនៅទីតាំង ២ ផ្សេងគ្នាក្នុងរាជធានីភ្នំពេញ និងខេត្តស្ទឹងត្រែងជាមួយគ្រឿងញៀនប្រភេទមេតំហ្វេតាមីនសរុបជាង ៤ គីឡូក្រាម។ នេះបើតាមលោក ឡឹក វណ្ណៈ ប្រធានមន្ទីរប្រឆាំងគ្រឿងញៀននៃក្រសួងមហាផ្ទៃកាលពីម្សិលមិញ។
លោក វណ្ណៈ បានប្រាប់ភ្នំពេញ-ប៉ុស្តិ៍ថាបុរសជនជាតិឡាវម្នាក់ឈ្មោះ សែងច័ន្ទ ដួងចៃ ត្រូវបាននគរបាលមន្ទីរប្រឆាំងគ្រឿងញៀនចាប់ខ្លួនបាននៅចំណុចស្ថានីយប្រេងឥន្ធនៈ PTT តាមបណ្ដោយផ្លូវជាតិ ៦A ក្នុងសង្កាត់-ខណ្ឌជ្រោយចង្វារ រាជធានីភ្នំពេញដោយបានរឹបអូសវត្ថុតាងគ្រឿងញៀនប្រភេទអៃស៍មេតំហ្វេតាមីនចំនួន ៤ កញ្ចប់ធំមានទម្ងន់ប្រមាណ ៤ គីឡូក្រាម។
លោកបានបញ្ជាក់ថា៖ «នៅពេលនេះជនសង្ស័យកំពុងស្ថិតក្រោមការសាកសួរចម្លើយដោយក្រុមមន្ត្រីនគរបាលជំនាញនៃមន្ទីរប្រឆាំងគ្រឿងញៀន ដើម្បីកសាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់»។
លោកបានបន្តថា ដោយឡែកកាលពីថ្ងៃពុធដដែលបុរសជនជាតិឡាវ ២ នាក់ទៀតរួមមាន ឈ្មោះ ខៀវ បុទិវង្ស អាយុ ៣២ ឆ្នាំ និងឈ្មោះ វង់ អ៊ឹង អាយុ ១៦ ឆ្នាំដែលអ្នកទាំង ២ មានលំនៅក្នុងភូមិ-ឃុំ ប៉ាទាប ស្រុកខូង ខេត្តចំប៉ាសាក់ ប្រទេសឡាវក៏ត្រូវបានកម្លាំងនគរបាលប្រឆាំងគ្រឿងញៀននៃអធិការដ្ឋាននគរបាលស្រុកសៀមប៉ាង ខេត្តស្ទឹងត្រែងចាប់ខ្លួនបានផងដែរ ខណៈពួកគេបានឆ្លងដែនចូលមកកម្ពុជាធ្វើសកម្មភាពជួញដូរគ្រឿងញៀន ។
លោកបានបញ្ជាក់បន្ថែមថា៖ «ប៉ុន្តែជនសង្ស័យទាំង ២ នាក់នេះមិនមែនជាក្រុមតែមួយនឹងជនសង្ស័យដែលត្រូវបានបង្ក្រាបចាប់ខ្លួនក្នុងខណ្ឌជ្រោយចង្វាររាជធានីភ្នំពេញនោះទេ»។
បើតាមលោក ជីន ហេន អធិការស្រុកសៀមប៉ាង បុរសជនជាតិឡាវឈ្មោះ ខៀវ បុទិវង្ស និងឈ្មោះ វង់ អ៊ឹង ត្រូវបានចាប់ខ្លួននៅចំណុចភូមិណាអូង ជាប់ព្រំប្រទល់រវាងឃុំសំបូរ ស្រុកសៀមប៉ាង និងឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង បន្ទាប់ពីពួកគេលួចឆ្លងដែនចូលមកក្នុងទឹកដីកម្ពុជាដោយខុសច្បាប់តាមច្រករបៀងមួយដែលស្ថិតនៅជាប់ព្រំប្រទល់រវាងស្រុកសៀមប៉ាងនៃប្រទេសកម្ពុជា និងស្រុកខូងនៃប្រទេសឡាវ។
លោកបានបញ្ជាក់ថា៖ «ក្នុងអំឡុងពេលចាប់ឃាត់ខ្លួននោះ មន្ត្រីជំនាញយើងបានរកឃើញ និងរឹបអូសវត្ថុតាងគ្រឿងញៀនប្រភេទថ្នាំគ្រាប់មេតំហ្វេតាមីនពណ៌ទឹកក្រូចចំនួន ៣៨២ គ្រាប់។
ក្រោយពីចាប់ខ្លួនជនសង្ស័យ និងវត្ថុតាងត្រូវបានបញ្ជូនទៅកាន់ការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តស្ទឹងត្រែង ដើម្បីចំណាត់ការបន្តតាមនីតិវីធីច្បាប់»។
លោក ហេន បានប្រាប់ឲ្យដឹងផងដែរថា មុនពេលចាប់ឃាត់ខ្លួនជនសង្ស័យទាំង ២ នាក់ខាងលើនេះសមត្ថកិច្ចជំនាញបានចុះផ្សព្វផ្សាយច្បាប់ និងពង្រឹងសុវត្ថិភាព សន្តិសុខ នៅក្នុងមូលដ្ឋានឃុំចំនួន ៣ នៃស្រុកសៀមប៉ាង គឺឃុំសេកុង ឃុំព្រែកមាស និងឃុំស្រែសំបូរ ហើយបានប្រទះឃើញបុរសជនជាតិឡាវទាំង ២ នាក់នោះកំពុងធ្វើដំណើរតាមម៉ូតូឌុប ១ គ្រឿង ជិះចុះឡើងនៅក្នុងមូលដ្ឋាននៃឃុំទាំង ៣ នោះហាក់មានបំណងចង់ស្វែងរកនរណាម្នាក់ ឬធ្វើសកម្មភាពអ្វីមួយ។
លោកបានបន្តថា បន្ទាប់មកបុរសជនជាតិឡាវទាំង ២ នាក់បានគេចខ្លួនទៅកាន់ភូមិណាអូងក្នុងទឹកដីឃុំអូរស្វាយនៃស្រុកបុរីអូរស្វាយសែនជ័យ ហើយក៏ត្រូវបានសមត្ថកិច្ចជំនាញឃាត់ខ្លួនមកសាកសួរ និងបានឆែកឆេររកឃើញថ្នាំគ្រាប់មេតំហ្វេតាមីនចំនួន ៣៨២ គ្រាប់៕