.jpg)
ជនសង្ស័យទាំង ២ នាក់នោះពាក់ព័ន្ធលួចកាច់ សោ ក ម៉ូតូ គេ។ នគរបាលជាតិ
សៀមរាបៈ បុរសជនជាតិចិន ២ នាក់ ត្រូវបាននគរបាលព្រហ្មទណ្ឌក្រសួងមហាផ្ទៃស្ទាក់ចាប់ខ្លួនកាលពីថ្ងៃ ១៨ វិច្ឆិកា នៅតាមផ្លូវជាតិក្នុងស្រុកពញាឮខេត្តកណ្ដាល និងបានបញ្ជូនទៅខេត្តសៀមរាបកាលពីម្សិលមិញ បន្ទាប់ពីពួកគេបានលួចកាច់សោកម៉ូតូនៅសៀមរាប ហើយបានរត់គេចខ្លួនមកភ្នំពេញ។
លោក ភឹង ចិន្ដារ៉េត ស្នងការរងនគរបាលខេត្តសៀមរាបប្រាប់ពីម្សិលមិញថា បុរសជាតិចិន ២ នាក់នោះ ត្រូវសមត្ថកិច្ចនាយកដ្ឋានក្រសួងមហាផ្ទៃស្ទាក់ចាប់បានតាមផ្លូវរួចបានបញ្ជូនមកខេត្តសៀមរាប។ លោកថា លោកមិនបានដឹងពីករណីជនសង្ស័យទាំង ២ នាក់ពាក់ព័ន្ធនឹងការលួចគាស់ផ្ទះ ឬលួចអ្វីផ្សេងទេ ព្រោះមិនទាន់សួរចម្លើយ។ ប៉ុន្តែបើតាមបណ្តឹងគឺពួកគេពាក់ព័ន្ធនឹងលួចកាច់សោ កម៉ូតូ។
លោកឲ្យដឹងថា មុនចាប់ខ្លួនគឺខាងស្នងការដ្ឋាននគរបាល ខេត្តសៀមរាបបានទទួលពាក្យបណ្តឹងពីជាម្ចាស់ម៉ូតូ។ បន្ទាប់មកសមត្ថកិច្ចរបស់លោកបានស្រាវជ្រាវក៏ដឹងថា ក្រុមជនសង្ស័យបានគេចទៅភ្នំពេញ ក៏ទាក់ទងនាយកដ្ឋានព្រហ្មទណ្ឌក្រសួងមហាផ្ទៃដើម្បីស្ទាក់ចាប់ពួកគេ។
លោកថា៖ «ជនសង្ស័យទាំង ២ នាក់នោះពាក់ព័ន្ធលួចកាច់ សោ ក ម៉ូតូ គេ។ តែបទល្មើសផ្សេងទៀតខ្ញុំមិនដឹងទេ...»។
លោកបានរំឭកប្រាប់ថា តាមការបញ្ជាក់ពីម្ចាស់ម៉ូតូថា មានបុរសជនជាតិថៃម្នាក់បានជួលម៉ូតូគាត់ ១ គ្រឿងជិះ។ បន្ទាប់ពីបុរសជាតិថៃជិះបានប៉ុន្មានម៉ោងក៏ចតម៉ូតូរួចចាក់សោ តែត្រូវជនសង្ស័យទាំង ២ នាក់ខាងលើលួចម៉ូតូនោះបាត់។
លោកប្រាប់បន្តថា បន្ទាប់ពីដឹងថាបាត់ម៉ូតូ បុរសជនជាតិថៃបានទៅប្រាប់ម្ចាស់ម៉ូតូទើបឈានដល់ការដាក់ពាក្យប្តឹងនៅស្នងការដ្ឋាននគរបាលខេត្តសៀមរាបដើម្បីឲ្យជួយអន្តរាគមន៍ស្វែងរកចាប់ជនល្មើស។ ប៉ុន្តែលោកថា ជនសង្ស័យ ២ នាក់នោះត្រូវបានបញ្ជូនមកឲ្យសមត្ថកិច្ចខេត្តសៀមរាបដែលជាម្ចាស់ករណីវិញហើយ។
ភ្នំពេញប៉ុស្តិ៍បានទាក់ទងលោក ង៉េង ជួ ប្រធាននាយកដ្ឋានព្រហ្មទណ្ឌក្រសួងមហាផ្ទៃដើម្បីបញ្ជាក់បន្ថែមដែរ ប៉ុន្តែលោកមិនឆ្លើយតបកាលពីម្សិលមិញ។
ប៉ុន្តែបើតាមមន្ត្រីនាយកដ្ឋានព្រហ្មទណ្ឌក្រសួងមហាផ្ទៃ ១ រូបសុំមិនឲ្យបញ្ចេញឈ្មោះប្រាប់ថា ជនសង្ស័យឈ្មោះ លាំង ហិន អាយុ ៣២ ឆ្នាំមុខរបរមិនពិតប្រាកដ និងទី ២៖ ឈ្មោះ វ៉េ យ៉ាងស៊ី អាយុ ៣២ ឆ្នាំ។
លោកថា ការចាប់ខ្លួនបាននេះគឺក្រោយពីនាយកដ្ឋាននគរបាលព្រហ្មទណ្ឌទទួលបានសេចក្តីរាយការណ៍ពីស្នងការដ្ឋាននគរបាលខេត្តសៀមរាប៕
