ក្រចេះ: បុរសវ័យ ៦០ ឆ្នាំម្នាក់ ត្រូវបាននគរបាលស្រុកចិត្របុរីសហការជាមួយនគរបាលប៉ុស្តិ៍រដ្ឋបាលឃុំថ្មគ្រែឃាត់ខ្លួនបញ្ជូនទៅការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តក្រចេះដើម្បីចាត់ការបន្តតាមនីតិវិធីច្បាប់ពាក់ព័ន្ធករណីរំលោភសេពសន្ថវៈលើក្មេងស្រីជាអនីតិជនដែលជាកូនរបស់អ្នកជិតខាង។
លោក ប៊ុត នឿន អធិការនគរបាលស្រុកចិត្របុរីបានប្រាប់ភ្នំពេញប៉ុស្តិ៍កាលពីថ្ងៃអង្គារថា ជនសង្ស័យឈ្មោះ គង់ អ៊ឹម អាយុ ៦០ ឆ្នាំ រស់នៅឃុំថ្មគ្រែ ស្រុកចិត្របុរី ខេត្តក្រចេះ ត្រូវបានចាប់ខ្លួនកាលពីរសៀលថ្ងៃ ២៧ ខែមករា តាមបណ្ដឹងរបស់ឪពុកម្ដាយក្មេងស្រីរងគ្រោះដែលជាអ្នករស់នៅជិតខាងគា្ន។
លោកបានថ្លែងថា តាមរយៈបណ្ដឹងនោះជនសង្ស័យត្រូវបានចោទប្រកាន់ថា បានចាប់រំលោភសេពសន្ថវៈលើក្មេងស្រីរងគ្រោះវ័យ ១៣ ឆ្នាំបានសម្រេចចំនួន ៣ លើកចាប់ពីខែវិច្ឆិកាដល់ខែធ្នូឆ្នាំ ២០១៩ ក្នុងគ្រាដែលនាងចេញទៅឃ្វាលក្របីនៅក្នុងព្រៃ ហើយជួបជនសង្ស័យកំពុងដើររកឃ្មុំនៅតំបន់នោះ។
លោក នឿន បានបញ្ជាក់ថា៖ «ក្នុងបណ្ដឹងនោះ ជនរងគ្រោះបានរៀបរាប់ថា ជនសង្ស័យក្រោយធ្វើសកម្មភាពរំលោភលើរាងកាយនាងរួចបានគំរាមនាងកុំឲ្យប្រាប់គេឯងពីរឿងអាស្រូវនេះ សូម្បីតែឪពុកម្ដាយរបស់នាង និងក្មេងៗនៅក្នុងភូមិក៏ដោយ បើពុំនោះទេ គាត់នឹងសម្លាប់ឲ្យអស់ ១ ពូជ [នាង និងក្រុមគ្រួសារ] បន្ទាប់ពីគំរាមរួចជនសង្ស័យក៏បានឲ្យទឹកឃ្មុំទៅកុមារីរងគ្រោះញ៉ាំទុកជាការលួងចិត្ត»។
លោក នឿន បានបន្តថាក្រោយការឃាត់ខ្លួនមកសាកសួរ ជនសង្ស័យបានសារភាពថា គាត់ពិតជាបានប្រព្រឹត្តអំពើដូចការចោទប្រកាន់មែន ប៉ុន្តែបានបដិសេធថា មិនបានគំរាមកំហែង ឬប៉ុនប៉ងសម្លាប់នាង និងក្រុមគ្រួសារនាងទេ។
បើតាមលោក នឿន កាលពី ៤-៥ ខែមុនពេលប្រព្រឹត្តបទល្មើស ជនសង្ស័យបានរករឿងឈ្លោះជាមួយស្ត្រីជាប្រពន្ធ និងបានសុំប្រពន្ធលែងលះគ្នាដោយចោទថា ប្រពន្ធស្ដីបន្ទោស និងរករឿងប្រចណ្ឌគាត់ដាក់ក្មេងស្រីរងគ្រោះខុសទំនង។ លោកបានឲ្យដឹងទៀតថាក្រោយបញ្ចប់ការស៊ើបសួរនៅថ្ងៃនេះ (ថ្ងៃអង្គារ) លោកបានបញ្ជូនជនសង្ស័យ និងសំណុំរឿងទៅកាន់ការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តក្រចេះដើម្បីមានចំណាត់ការបន្តតាមនីតិវិធីច្បាប់។
ជុំវិញករណីនេះលោកស្រី នៅ រតនា ស្នងការរងនគរបាលខេត្តក្រចេះទទួលបន្ទុកផ្នែកប្រឆាំងការជួញដូរមនុស្ស និងការពារអនីតិជនបានប្រាប់ភ្នំពេញប៉ុស្តិ៍ថា ករណីនេះលោកស្រីនៅមិនទាន់បានពិនិត្យសំណុំរឿងនៅឡើយទេ។ ប៉ុន្តែមន្ត្រីជំនាញបានទទួលសំណុំរឿងនោះហើយនិងសាកសួរជនសង្ស័យជុំវិញដំណើររឿងចោទប្រកាន់នោះ។
លោកស្រីបានថ្លែងថា៖ «មន្ត្រីជំនាញនៃការិយាល័យប្រឆាំងការជួញដូរមនុស្ស និងការពារអនីតិជនបានទទួលសំណុំរឿង និងជនសង្ស័យនោះហើយនិងកំពុងស្ថិតក្រោមនីតិវិធីនៃការស៊ើបសួរ ប៉ុន្តែសំណុំរឿងបែបណានោះ ខ្ញុំនៅមិនទាន់បានពិនិត្យឲ្យល្អិតល្អន់នោះទេ»៕