ភ្នំពេញៈ មន្ត្រីមន្ទីរប្រឆាំងគ្រឿងញៀនបញ្ជាក់ពីម្សិលមិញថា បុរស ២ នាក់ ក្នុងចំណោមបក្ខពួក ៤-៥ នាក់ ត្រូវបានកម្លាំងការិយាល័យនៃមន្ទីរប្រឆាំងគ្រឿងញៀនសហការជាមួយកម្លាំងនគរបាលខណ្ឌទួលគោកបង្ក្រាបចាប់ខ្លួនភ្លាមៗ ក្រោយពីពួកគេបានផ្ទុះអាវុធជាច្រើនគ្រាប់ប្រឆាំងនឹងកម្លាំងសមត្ថកិច្ច ដែលកំពុងចុះប្រតិបត្តិការបង្ក្រាបករណីជួញដូរគ្រឿងញៀន ១ កន្លែងនៅសង្កាត់បឹងកក់ ២ កាលពីយប់ថ្ងៃទី ២៣ ធ្នូ។
លោក ឡឹក វណ្ណៈ នាយកមន្ទីរប្រឆាំងគ្រឿងញៀន ក្រសួងមហាផ្ទៃប្រាប់ភ្នំពេញប៉ុស្តិ៍ថា បុរសជាជនសង្ស័យដែលសមត្ថកិច្ចចាប់ខ្លួននាយប់នោះរួមមានឈ្មោះ មាស សិលា អាយុ ២៧ ឆ្នាំ ជាអ្នកបើករថយន្ត និងម្នាក់ទៀតឈ្មោះ គិត ម៉េងលី អាយុ ១៨ ឆ្នាំ ជានិស្សិត។ អ្នកទាំង ២ រស់នៅក្នុងភូមិ ៧ សង្កាត់បឹងកក់ ២ ខណ្ឌទួលគោក រាជធានីភ្នំពេញ។
លោក វណ្ណៈ បញ្ជាក់ថា៖ «ជនសង្ស័យគឺជាមុខសញ្ញាជួញដូរគ្រឿងញៀន ដែលក្រុមសមត្ថកិច្ចយើងបានតាមដានអស់រយៈពេលជាច្រើនខែមកហើយ។ នៅពេលនេះជនសង្ស័យទាំង ២ កំពុងស្ថិតក្រោមការសួរចម្លើយពីមន្ត្រីនគរបាលជំនាញ»។
បើតាមលោក វណ្ណៈ ក្នុងប្រតិបត្តិការបង្ក្រាបបទល្មើសគ្រឿងញៀនកាលពីយប់ថ្ងៃចន្ទនោះក្រុមសមត្ថកិច្ចបានប្រទះឃើញក្រុមជនសង្ស័យដែលមានគ្នា ៤-៥ នាក់ កំពុងធ្វើសកម្មភាពជួញដូរគ្រឿងញៀននៅម្ដុំមន្ទីរពេទ្យលោកសង្ឃ។
ពេលនោះក្រុមជនសង្ស័យបានជិះម៉ូតូគេចពីកម្លាំងសមត្ថកិច្ចតាមបណ្ដោយផ្លូវ ៥៩៨ ឆ្ពោះទៅផ្សារមាន់អាំង ហើយជនសង្ស័យ ២ នាក់ បានបត់ម៉ូតូចូលទៅផ្ទះរបស់ពួកគេដែលនៅតាមបណ្ដោយផ្លូវលេខ ៣១៥ ក្នុងភូមិ ៧ សង្កាត់ បឹងកក់ ២ ខណ្ឌទួលគោក។ ខណៈនោះជនសង្ស័យដកកាំភ្លើងបាញ់មកលើកម្លាំងសមត្ថកិច្ចជាច្រើនគ្រាប់ ប៉ុន្តែមិនបង្កឲ្យកម្លាំងនគរបាលណាម្នាក់រងរបួសនោះទេ។
លោកបន្តថា បន្ទាប់ពីមានការផ្ទុះអាវុធ កម្លាំងការិយាល័យ (ក៦) នៃមន្ទីរប្រឆាំងគ្រឿងញៀនបានទាក់ទងស្នើកម្លាំងនគរបាលខណ្ឌទួលគោកជួយអន្តរាគមន៍ និងឡោមព័ទ្ធចាប់ជនសង្ស័យទាំង ២ នាក់នោះដោយបានដកហូតអាវុធខ្លី ១ ដើមម៉ាក SIGSOWER P320 មានគ្រាប់ ៦ គ្រាប់ និងម៉ូតូ ១ គ្រឿងម៉ាក Honda Dream C125 ស៊េរី 2016 ពាក់ស្លាកលេខ ភ្នំពេញ 1GD- 4729 និងគ្រឿងញៀនមួយចំនួន។ ជាមួយគ្នានេះក្រុមសមត្ថកិច្ចក៏បានរកឃើញសម្បកកាទូសចំនួន ៤ គ្រាប់នៅកន្លែងកើតហេតុផងដែរ។
តាមរបាយការណ៍របស់អគ្គស្នងការដ្ឋាននគរបាលជាតិ កម្លាំង នគរបាលបង្ក្រាបបទល្មើសគ្រឿងញៀនក្នុងក្របខ័ណ្ឌទូទាំងប្រទេសបានចំនួន ២០ ករណី ចាប់ខ្លួនជនសង្ស័យ ៤៨ នាក់ និងរឹបអូសវត្ថុតាងគ្រឿងញៀនប្រភេទ អៃស៍មេតំហ្វេតាមីន ៦២,៤៩ ក្រាម, កេតាមីន ០,៩២ ក្រាម, អ៊ិចស្តាស៊ី ១,៥៣ ក្រាម និងម៉េតំហ្វេតាមីនចំនួន ០,២៩ ក្រាម។
របាយការណ៍ថាក្នុងចំណោមជនសង្ស័យ ៤៨ នាក់នោះមាន ១៧ នាក់ ជាមុខសញ្ញាចាស់ជួញដូរគ្រឿងញៀនដែលត្រូវបានកម្លាំងសមត្ថកិច្ចចាប់ និងបញ្ជូនឲ្យតុលាការផ្ដន្ទាទោសដាក់ពន្ធនាគារម្ដងរួចមកហើយ និង ៣១ នាក់ទៀតជាអ្នកប្រើប្រាស់៕