The Phnom Penh Post Search

Search form




Logo of Phnom Penh Post newspaper Phnom Penh Post - ចាប់​រថយន្ត​ពាក់​ស្លាកលេខ​ ខ.ម.​ ១ គ្រឿង ​និង​គោយន្ត​ ៣ គ្រឿង​ ដឹក​ឈើ​ជាច្រើន​គុប​ពី​តំបន់​ឧទ្យាន​រាជបណ្ឌិត្យ​សភា​កម្ពុជា

ចាប់​រថយន្ត​ពាក់​ស្លាកលេខ​ ខ.ម.​ ១ គ្រឿង ​និង​គោយន្ត​ ៣ គ្រឿង​ ដឹក​ឈើ​ជាច្រើន​គុប​ពី​តំបន់​ឧទ្យាន​រាជបណ្ឌិត្យ​សភា​កម្ពុជា

Content image - Phnom Penh Post
លោក​ សុខ ទូច ប្រធាន​រាជបណ្ឌិត្យ​សភា​កម្ពុជា ​ចុះចាប់​រថយន្ត​ពាក់​ស្លាកលេខ​ ខ.ម.​ ១ គ្រឿង ​និង​គោយន្ត​ ៣ គ្រឿង​ ដឹក​ឈើ​ជាច្រើន​គុប​ពី​តំបន់​ឧទ្យាន​រាជបណ្ឌិត្យ​សភា​កម្ពុជា។ រូបថត សហការី

ចាប់​រថយន្ត​ពាក់​ស្លាកលេខ​ ខ.ម.​ ១ គ្រឿង ​និង​គោយន្ត​ ៣ គ្រឿង​ ដឹក​ឈើ​ជាច្រើន​គុប​ពី​តំបន់​ឧទ្យាន​រាជបណ្ឌិត្យ​សភា​កម្ពុជា

ប្រធាន​រាជបណ្ឌិត្យ​សភា​កម្ពុជា ​លោក​ សុខ ទូច ​បាន​ឃាត់ទុក​រថយន្ត​ដែល​ពាក់​ស្លាក​លេខ​កងយោធពល​ខេមរភូមិន្ទ (ខ.ម.)​ ១ គ្រឿង ​និង​គោ​យន្ត​ចំនួន​ ៣ គ្រឿង​ ដែល​ដឹកឈើ​ជាច្រើន​គុប​ចេញពី​ក្នុង​តំបន់​ឧទ្យាន​រាជបណ្ឌិត្យ​សភា​កម្ពុជា ​តេជោសែន ​ឫស្សី​ត្រឹប ​ស្ថិត​ក្នុង​ស្រុកឆែប​ ខេត្ត​ព្រះ​វិហារ​ ដើម្បី​ជាការ​ព្រមាន​ដល់​ប្រជាពលរដ្ឋ​កុំឱ្យ​បន្ត​កាប់​ឈើ​ធ្វើ​អាជីវកម្ម​ទៀត។

លោក​ សុខ ទូច បាន​ប្រាប់​ ភ្នំពេញ ​ប៉ុស្តិ៍​ ពី​ម្សិលមិញ​ថា ​បន្ទាប់ពី​លោក​ទទួលបាន​ដំណឹង​ពី​ប្រភពដែលប្រាប់ថា​ មាន​គោយន្ត​ចូលទៅ​កាប់​ឈើ​នៅក្នុង​ឧ​ទ្យាន​នោះ ​លោក​ក៏បាន​ធ្វើដំណើរ​ទាំងយប់​ចេញពី​ភ្នំពេញ ​ឆ្ពោះទៅ​កាន់​ព្រះវិហារ​ទាំងយប់ ។ លុះ​ព្រឹក​ឡើង​លោក ​និង​ក្រុមការងារ​បាន​សម្រុកចូល​ទៅក្នុង​ព្រៃ ​បាន​ឃាត់​គោយន្ត​ចំនួន​ ៣ គ្រឿង ​និង​ឃើញ​ដើមឈើ​ធំៗ​ប្រភេទ​ផ្ចឹក​ត្រូវបាន​កាប់​អស់​ប្រហែល​ជាង ១០ ដើម។

លោក ​សុខ ទូច ​បញ្ជាក់ថា ​មូលហេតុ​ដែល​ឃាត់ទុក​នេះ ​ព្រោះ​លោក​បានណែនាំ ​និង​អប់រំ​ពលរដ្ឋ​ដែល​រស់នៅ​ក្នុង​ឧទ្យាន​តេ​ជោ សែន​ ឫស្សី​ត្រឹប​នេះ ​អស់​ជាច្រើន​លើក​ច្រើនសារ​កុំឱ្យ​កាប់​ដើម​ឈើ។ ប៉ុន្តែពលរដ្ឋ​ទាំងនោះ​ហាក់​មិន​រាងចាល​នោះទេ ​ហើយ​នៅតែ​បន្ត​ចូល​កាប់​ឈើ​ក្នុង​ឧទ្យាន​នេះ​ជា​បន្តបន្ទាប់ ​ដោយ​ប្រើប្រាស់​គោយន្ត​ដើម្បី​ដឹកឈើ​ចេញ។

​កាលពី​មុន គឺ​ឃាត់​តែ​រថយន្ត ​ហើយ​បាន​បញ្ជូនទៅ​ឱ្យ​មេព្រៃ ​ឬ​ប៉េអឹម ​ដើម្បី​ដោះស្រាយ ​ប៉ុន្តែ​ដំណោះស្រាយ​ហាក់​គ្មាន​ប្រសិទ្ធភាព។ លើក​នេះ​ ក៏មាន​ការឃាត់​រថយន្ត​ដែល​ពាក់​ស្លាកលេខ​ ខ.ម.​ផង​ដែរ ។ បន្ទាប់ពី​ឃាត់​គោយន្ត ​និង​រថយន្ត​ទុកនេះ ​លោក​ក៏បាន​ឃើញ​ឈើ​ប្រមាណ ​២ ទៅ​ ៣ គុប​ក្នុង​គោយន្ត ​និង​រថយន្ត​នីមួយៗ។ នេះ​ជាការ​អះអាង​របស់​លោក​ សុខ ទូច។

បើ​តាម​លោក​ សុខ ទូច ​អ្នក​រស់នៅ​ក្នុង​ឧទ្យាន​នេះ ​ត្រូវបាន​ឃាត់ខ្លួន​ម្តង​ហើយ​បាន​ណែនាំ​ពួក​គាត់​កុំឱ្យ​កាប់​ឈើ​បន្តទៀត ​និង​ឱ្យ​មានការងារ​ធ្វើ​នៅក្នុង​ឧទ្យាន។ ប៉ុន្តែ​ពួកគាត់​នៅតែ​ប្រព្រឹត្ត ​ដោយ​កន្លែង​ខ្លះបាន​កាប់​អស់​ជាង​ ៣០០ ដើម ​សុទ្ធតែ​ដើម​ឈើ​ផ្ចឹក ​និង​សុក្រំ ​ហើយ​ម្តងនេះ ​គឺ​ឃាត់ទុក ​មិនអាច​ឱ្យ​យកទៅ​ប្រើប្រាស់​បាន​ទៀត​នោះ​ទេ។

លោក​បន្ថែមថា​៖ «ខ្ញុំ​ធ្វើ​នេះ ​គឺ​ដើម្បី​ទុកឱ្យ​ក្មេង​ជំនាន់​ក្រោយ​ស្គាល់​ដើមឈើ​ដែលមាន​ទំហំ​ ៣ អោប​ ឬ​ ៤ ឱប​ ដូចជា ​ស្រឡៅ​ បេង ​នាង​នួន ​និង​ផ្ចឹក​យ៉ាង​ម៉េច។ គ្រាន់តែ​ធ្នង់​វិញ ​ឱ្យតែ​បាន​ធំ​ប៉ុន​ភ្លៅបន្តិច ​កាប់​ខ្ទេច​អស់​អាលីង​គ្មាន​សល់ ដោយ​ពេល​ខ្លះ​មាន​កាប់​ពី​ ៣ ០០០ ​ទៅ ៤ ០០០​ ដើម​ក្នុង​ ១ ​យប់»។

លោក​ថ្លែងថា​៖ «យើង​បាន​អនុគ្រោះ​ដល់​ពួកគាត់​ជាច្រើន​លើក​ច្រើនសារ​មក​ហើយ​ ស្រប​ពេលដែល​ការអប់រំ​ក៏ត្រូវ​បានធ្វើ​ឡើង​អស់​រយៈពេល​ ២ ឆ្នាំ​មក​ហើយ។ ចំណែកឯ​ការបង្កើត​មុខរបរ​ផ្សេង​ទៀត ​ក៏​យើង​បានផ្ដល់​ទៅដល់​គាត់​ផងដែរ ​ប៉ុន្តែ​ពួកគាត់​នៅតែ​បន្ត​កាប់បំផ្លាញ​ព្រៃឈើ​ក្នុង​ឧទ្យាន​រាជបណ្ឌិត្យ​សភា​កម្ពុជា ​តេ​ជោសែន ​ឫស្សី​ត្រឹប​បន្ត​ទៀត»។

ទោះជា​យ៉ាងណា ​លោក​ទទួល​ស្គាល់ថា​ ការឃាត់​រថយន្ត​ ខ.ម.​ និង​គោយន្ត​នេះ ​វា​ខុសច្បាប់​ ប៉ុន្តែ ​វា​សល់​ឈើ។ ប្រសិនបើ​លោក​អនុញ្ញាត​ឱ្យ​គោ​យន្ត​ត្រឡប់​ទៅវិញ​ ពួកគាត់​នឹង​បន្តកាប់​ឈើ​នៅក្នុង​ឧទ្យាន​នេះ​បន្ត​ទៀត។ មនុស្ស​ក៏​លោក​បានកំណត់​អត្តសញ្ញាណ​ច្បាស់លាស់​ដែរ​ គឺ​មាន​គ្នា​សរុប​ទាំង​អស់​ ៦ នាក់ ​ប៉ុន្តែ​លោក​ពុំមាន​វិធានការ​អ្វី​ឡើយ ​គឺ ​ឃាត់តែ​រថយន្ត ​និង​គោយន្ត​ប៉ុណ្ណោះ។

ភ្នំពេញ​ ប៉ុស្តិ៍ ​មិន​អាច​ទាក់ទង​លោក​ សុក សាន្តតារ៉ា ​អភិបាល​ស្រុក​ឆែប ​ដើម្បី​សុំ​ធ្វើ​អត្ថាធិប្បាយ​បានទេ ​ពី​ម្សិល​មិញ​ដោយ​ហៅ​ទូរស័ព្ទ​ចូល​ជាច្រើន​លើក ​ប៉ុន្តែ​មិនមាន​អ្នក​ទទួល។

លោក​ស្រី​ ភោគ ហុង ​សមាជិក​បណ្តាញ​សហគមន៍​ព្រៃឡង់​ខេត្ត​ព្រះវិហារ​និយាយថា ​បទល្មើស​ព្រៃឈើ​នៅក្នុង​តាម​តំបន់​ការពារ ​និង​អភិរក្ស​មួយចំនួន​នៅ​ខេត្ត​ព្រះវិហារ ​នៅតែ​បន្ត​កើតមាន​ជារៀង​រាល់​ថ្ងៃ។ ភាគ​ច្រើន ​គឺ​ធ្វើ​សកម្មភាព​នៅពេល​យប់ ​ដែលធ្វើ​ឱ្យ​អ្នកការពារមានការ​លំបាក​ក្នុង​ការទប់​ស្កាត់។

បើ​តាម​លោកស្រី​បទល្មើស​ភាគច្រើន ​គឺ​ត្រូវបាន​ប្រព្រឹត្ត​ដោយ​ប្រជាពលរដ្ឋ​នៅក្នុង​មូលដ្ឋាន ​និង​អ្នក​មកពី​ខេត្ត​ផ្សេង​ខ្លះ ​ហើយ​មួយចំនួន​គឺជា​ឈ្មួញ​ឈើ ​ជួល​មនុស្ស​ឱ្យ​ធ្វើ​សកម្មភាព​កាប់​ដើមឈើ​យក​ចេញពី​សហគមន៍ ​និង​តំបន់​ការពារ​របស់​រដ្ឋាភិបាល។

លោក​ស្រី​ថ្លែងថា​៖ «បទល្មើស​ព្រៃឈើ​នៅក្នុង​ខេត្ត​ព្រះវិហារ ​គឺ​អជ្ញាធរ​នៅតាម​មូលដ្ឋាន​មួយចំនួន​មិនបាន​ចូលរួម ​និង​យកចិត្ត​ទុកដាក់​ណែនាំ ​និង​ពន្យល់​ដល់​ពលរដ្ឋ​កុំឱ្យ​កាប់​ឈើ​ធ្វើ​អាជីវកម្ម ​ព្រមទាំង​អភិរក្ស​ទេ ​ប៉ុន្តែ​បែរជា​គាត់​និយាយថា ​បើ​មិនឱ្យ​ពលរដ្ឋ​ចូលព្រៃ​កាប់ឈើ​ធ្វើ​អាជីវកម្ម​ តើ​ពលរដ្ឋ​បាន​ចំណូល​មកពី​ណា​ដើម្បី​ចិញ្ចឹម​ជីវិត។ នេះ​ជា​ចំណុច​ខុស​ធ្ងន់​ណាស់»៕

អត្ថបទគួរចាប់អារម្មណ៍