The Phnom Penh Post Search

Search form




Logo of Phnom Penh Post newspaper Phnom Penh Post - ចាប់​ខ្លួន​មេ​ខ្យល់​នាំ​មនុស្ស​ឆ្លង​ដែន​ទៅ​ថៃ​ម្នាក់




ចាប់​ខ្លួន​មេ​ខ្យល់​នាំ​មនុស្ស​ឆ្លង​ដែន​ទៅ​ថៃ​ម្នាក់

ចាប់​ខ្លួន​មេ​ខ្យល់​នាំ​មនុស្ស​ឆ្លង​ដែន​ទៅ​ថៃ​ម្នាក់

130114_07
ពលករខ្មែរបម្រុងឆ្លងដែនទៅថៃ ត្រូវអាជ្ញាធរខេត្តបន្ទាយមានជ័យ ឃាត់ខ្លួនធ្វើការអប់រំ ពីដើមខែនេះ ន ប.ជ ក

បាត់ដំបងៈ មេ​ខ្យល់​ដែល​រក​ស៊ី​នាំ​មនុស្ស​ឆ្លង​ដែន​ទៅ​ថៃ​ម្នាក់​ត្រូវ​សមត្ថកិច្ច នគរបាល​ខេត្ត​បន្ទាយ​មានជ័យ​ចាប់​ឃាត់​ខ្លួន​តាម​ដីកា​របស់​សាលា​ដំបូង ខេត្ត​និង​បញ្ជូន​ទៅ​ពន្ធនាគារ​ខេត្ត​ភ្លាមៗ កាលពី​ថ្ងៃ​ទី១២​មករា​បន្ទាប់​ពី​រត់​គេច​ខ្លួន​អស់​រយៈ​ពេល​ជាង​១ឆ្នាំ។

លោក អ៊ុន សំអន នាយការិយាល័យ​នគរបាល​ព្រហ្មទណ្ឌ​កម្រិត​ធ្ងន់​ខេត្ត​ឲ្យ​ដឹង ពី​ម្សិលមិញ​ថា ជនសង្ស័យ​ត្រូវ​កង​នគរបាល​ស្រុក​ម៉ាឡៃ​ចាប់​ឃាត់​ខ្លួន កាលពី​ល្ងាច​ថ្ងៃ​ទី​១១​ ខែ​មករា នៅ​ភូមិ​ចំបក់ ឃុំ​បឹង​បេង​ ស្រុក​ម៉ាឡៃ ខេត្ត​បន្ទាយ​មានជ័យ។ សមត្ថកិច្ច​ស្រុក​ម៉ាឡៃ​បាន​ឃាត់​ខ្លួន​ជន​នេះ ផ្អែក​តាម​ដីកា​តុលាការ ចុះ​ថ្ងៃ​ទី៣ ខែ​មករា។

លោក​បន្ត​ឲ្យ​ដឹង​ថា៖«បើ​តាម​បទ​ចោទ​ក្នុង​ដី​ការ​របស់​តុលាការ​ខេត្ត ជន​ជាប់​ចោទ​អាច​ត្រូវ​ជាប់​ពន្ធនាគារ​តិច​ក៏​៧​ឆ្នាំ»។ លោក​ថា៖ «​ជន​ជាប់​ចោទ​ប្រាប់​ថា ក្នុង​មួយ​ថ្ងៃៗ គេ​នាំ​មនុស្ស​​ឆ្លង​អូរ​ចូល​ក្នុង​ទឹក​ដី​ថៃ​ពី​៤​ទៅ​៥​នាក់ ហើយ​ក្នុង​ពលករ​ម្នាក់ៗ​ត្រូវ​បង់​ប្រាក់​៥​ពាន់​រៀល​ឲ្យ​​គេ»។ ជន​នេះ ​បាន​ប្រាប់​ដែរ​ថា គេ​ទើប​តែ​ប្រកបរបរ​នេះ​បាន​៥​ខែ​ប៉ុណ្ណោះ មុន​ត្រូវ​សមត្ថកិច្ច​ចាប់​ខ្លួន។

លោក សៅ ប៊ុន អធិការ​នគរបាល​ស្រុក​ម៉ាឡៃ បាន​ឲ្យ​ដឹង​ថា​ ជន​ជាប់​ ចោទ​ឈ្មោះ​ ហៀង ពៅ​ អាយុ​២៤​ឆ្នាំ រស់​និង​ស្នាក់​នៅ​បណ្តោះ​អាសន្ន​នៅ​ភូមិ-ឃុំ​ខាង​លើ ​ត្រូវ​តុលាការ​ចោទ​ប្រកាន់​ពី​បទ​នាំ​មនុស្ស​ឆ្លង​ដែន​ចេញ​មិន​ស្រប​ ច្បាប់​ កាលពី​ថ្ងៃ​ទី​១៣​ ខែ​ឧសភា​ ឆ្នាំ​២០១១ ប៉ុន្តែ​ជន​ជាប់​ចោទ​បាន​គេច​ខ្លួន។

មិន​មាន​របាយការណ៍​សរុប អំពី​ពលករ​លួច​ឆ្លង​ដែន​ទេ។ ​តែ​គិត​ត្រឹម​ពាក់​កណ្តាល​ឆ្នាំ​មុន ថៃ​បញ្ជូន​ពលករ​ខ្មែរ ៦៨ ៦៥៩​នាក់​ឲ្យ​មក​កម្ពុជា​វិញ៕

អត្ថបទគួរចាប់អារម្មណ៍