ក្រចេះ មន្ត្រីយោធាអង្គភាពវរការពារព្រំដែនលេខ ២០៤ ម្នាក់ ត្រូវបានតុលាការខេត្ត សម្រេចឃុំខ្លួនកាលពីថ្ងៃពុធពីបទរំលោភសេពសន្ថវៈលើក្មួយស្រីថ្លៃ អាយុ១៣ឆ្នាំ ចំនួនបីដង។
លោកវរសេនីយ៍ត្រី ហួត លឹមហ៊ាង អនុប្រធានការិយាល័យកម្រិតធ្ងន់នៃស្នងការដ្ឋាននគរបាលខេត្តក្រចេះ បានប្រាប់ភ្នំពេញ ប៉ុស្តិ៍ កាលពីម្សិលមិញថា ជនសង្ស័យ ឈ្មោះ ស៊ឹម វិទូ អាយុ ៣៣ ឆ្នាំ មានមុខងារជាមន្ត្រីយោធាអង្គភាពវរការពារព្រំដែនលេខ២០៤ នៅស្រុកស្នួល មានលំនៅក្នុងភូមិជើងឃ្លេ ឃុំ២ធ្នូ ស្រុកស្នួលត្រូវបានចាប់ខ្លួន កាលពីថ្ងៃអង្គារ តាមបណ្ដឹងរបស់ស្ត្រីជា ភរិយា និងក្មេងស្រីរងគ្រោះដែលត្រូវជាក្មួយសាច់ថ្លៃ ពីបទរំលោភសេពសន្ថវៈ។ លោកបន្តថា ជនសង្ស័យក៏បានសារភាពផងដែរថា ខ្លួនពិតជាបានរំលោភក្មួយស្រីថ្លៃ នៅពេលដែលខ្លួនស្រវឹងស្រាខណៈប្រពន្ធមិននៅផ្ទះ។ ជនសង្ស័យសារភាពទៀតថា ខ្លួនរំលោភបានសម្រេចចំនួនមួយដង និងពីរដងទៀត មិនបានសម្រេចទេ ហើយលើកទីបួន ក៏ត្រូវប្រពន្ធមកទាន់។ លោក លឹម ហ៊ាង បន្តថា៖ «តាមការសារភាពនេះ ជនសង្ស័យមានចេតនារំលោភកុមារីរងគ្រោះ មិនមែនមកពីការស្រវឹងស្រានោះទេ។ តាមផ្លូវច្បាប់បទល្មើសនេះ ជនសង្ស័យ នឹងប្រឈមការផ្ដន្ទាទោសឲ្យជាប់ពន្ធនាគារចន្លោះពី១០ ទៅ១៥ឆ្នាំ»។
អ្នកស្រី លីន ដា អាយុ ៣១ ឆ្នាំ ជាប្រពន្ធរបស់ជនសង្ស័យ បានប្រាប់ភ្នំពេញ ប៉ុស្តិ៍ថា គាត់បានឃើញប្ដីរបស់គាត់ ចាប់រំលោភក្មួយស្រី ហើយក្មួយស្រីបានយំប្រាប់គាត់ថា ប្ដីរបស់គាត់បានចាប់រំលោភនាងបីដងរួចមកហើយ។
អ្នកស្រីបន្ត ថា៖ «ខ្ញុំមានការតូចចិត្ត និងខឹងប្ដីខ្ញុំជាខ្លាំង ដែលបានរំលោភក្មួយស្រីខ្ញុំ ដែលទើបតែមានអាយុ១៣ឆ្នាំ»។ អ្នកស្រីបន្តថា គាត់មានកូនពីរនាក់ជាមួយប្ដីរបស់គាត់ គឺស្រីមួយប្រុសមួយ។ គាត់បានយកក្មួយស្រីមករស់នៅជាមួយ ដើម្បីជួយមើលថែកូនៗរបស់គាត់។ អ្នកស្រីថ្លែងថា៖ «ខ្ញុំអស់សង្ឃឹមនឹងរស់នៅជួបជុំជាមួយប្ដីអប្រិយនេះ ចាប់តាំងពីខ្ញុំបានឃើញគាត់ចាប់រំលោភក្មួយស្រីរបស់ខ្ញុំ។ ខ្ញុំមិនចង់ឲ្យក្មួយស្រី និងកូនស្រីរបស់ខ្ញុំ រងគ្រោះព្រោះប្ដីចិត្តព្រានបែបនេះទៀតទេ។ ខ្ញុំសូមឲ្យតុលាការកាត់ទោសតាមច្បាប់»៕
