The Phnom Penh Post Search

Search form




Logo of Phnom Penh Post newspaper Phnom Penh Post - ចាប់​អ្នក​លេង​ភ្នាល់​បាល់​ជន​ជាតិ​ខ្មែរ-​បរទេស ជាង​៧០​នាក់




ចាប់​អ្នក​លេង​ភ្នាល់​បាល់​ជន​ជាតិ​ខ្មែរ-​បរទេស ជាង​៧០​នាក់

ចាប់​អ្នក​លេង​ភ្នាល់​បាល់​ជន​ជាតិ​ខ្មែរ-​បរទេស ជាង​៧០​នាក់

ភ្នំពេញៈ មនុស្ស​ជាង ៧០ នាក់​រួម​មាន​ជន​ជាតិ​ចិន ឥណ្ឌូនេស៊ី ​ម៉ាឡេស៊ី និង​កម្ពុជា ត្រូវ​បាន​ចាប់​ខ្លួន កាល​ពី​ម្សិល​មិញ ក្នុង​អំឡុង​ការ​ចុះ​បង្ក្រាប​ចំនួន​ពីរ​កន្លែង​ផ្សេង​គ្នា ក្នុង​ខណ្ឌ​ចំការ​មន ពាក់​ព័ន្ធ​នឹង​ការ​លេង​ល្បែង​ភ្នាល់​ចាក់​បាល់ តាម​អ៊ីន​ធឺណិត។

ព្រះរាជអាជ្ញារង​សាលា​ដំបូង​រាជធានី លោក មាស ច័ន្ទ​ពិសិដ្ឋ និង​ស្នង​ការ​រង​នគរ​បាល​រាជ​ធានី​ភ្នំពេញ លោក​ហ៊ី ព្រូ បាន​ដឹកនាំ​ប្រតិបត្តិការ​ចុះ​បង្ក្រាប​កន្លែង​ទាំង​ពីរ​នេះ។ លោក ហ៊ី ព្រូ បាន​ថ្លែង​ថា នគរបាល​នៅ​កំពុង​ធ្វើ​ការ​សាកសួរ​មនុស្ស​ទាំង​នេះ​នៅ​ឡើយ ដូច្នេះ​មិន​ទាន់​មាន​ការ​សម្រេច​ថា តើ​ពួកគេ​ត្រូវ​​ប្រឈម​មុខ​នឹង​ការ​កាត់​ទោស​តាម​ច្បាប់​កម្ពុជា ឬ​ការ​បណ្តេញ​ចេញ​ពី​ប្រទេស​នោះ​ទេ។ លោក​បន្ត​ថា៖ «នៅ​ពេល​ពួកគេ​ប្រព្រឹត្ត​បទ​ល្មើស​នៅ​ទី​នេះ ពួកគេ​ត្រូវ​ប្រឈម​មុខ​នឹង​ការ​កាត់​ទោស»។

កន្លែងបង្ក្រាបទីមួយ គឺ​ស្ថិត​នៅ​ក្នុង​សង្កាត់​ទន្លេ​បាសាក់ និង​កន្លែង​បង្ក្រាប​ទីពីរ គឺ​នៅ​ក្នុង​អាផាត​មិន​មួយ​ក្នុង​សង្កាត់​បឹង​កេង​កង ៣ ខណ្ឌ​ចំការ​មន។

អ្នកនាំពាក្យ​អគ្គ​ស្នងការ​នគរបាល​ជាតិ លោក គៀត ច័ន្ទ​ថារិទ្ធ បាន​ប្រាប់​ភ្នំពេញ ប៉ុស្តិ៍​ថា ជា​សរុប​មាន​មនុស្ស​ចំនួន​ ៧១ នាក់ ត្រូវ​បាន​ចាប់​ខ្លួន ក្នុង​នោះ​មាន​ជនជាតិ​ចិន​ចំនួន ១៥ នាក់ ​ម៉ាឡេស៊ី​ចំនួន៥​នាក់ ឥណ្ឌូ​នេស៊ី ១០ នាក់ ​និង​កម្ពុជា​៤១​នាក់។

នគរបាល បាន​ធ្វើ​ការ​រឹប​អូស កុំព្យូទ័រ​ចំនួន​១៧៣ គ្រឿង ដែល​ពួក​គេ​ប្រើ​សម្រាប់​ការ​ភ្នាល់​បាល់​ តាម​អ៊ីនធឺ​ណិត។ លោក​ច័ន្ទ​ថារិទ្ធ បន្ត​ថា៖ «យើង​កំពុង​សាក​សួរ​ពួក​គេ និង​ធ្វើ​របាយ​ការណ៍​ទៅ​ក្រសួង​មហា​ផ្ទៃ ដើម្បី​ធ្វើ​ការ​សម្រេច​លើ​មនុស្ស​ទាំង​នេះ»។ «ខ្ញុំមិន​ទាន់​ដឹង​ថា តើ​នឹង​បណ្តេញ​ពួកគេ​ចេញ​ឬ​អត់​នោះ​ទេ រហូត​ទាល់​តែ​មាន​ការ​សម្រេច​ពី​ថ្នាក់​លើ»។

លោក មុំ ស៊ីថា ប្រធាន​ការិយា​ល័យ​នគរ​បាល​កិច្ច​ការ​បរទេស ដែល​បាន​ដឹក​នាំ​កម្លាំង​ចុះ​បង្ក្រាប​ក្នុង​សង្កាត់​ទន្លេ​បាសាក់ បាន​ឲ្យ​ដឹង​ថា បុរស​ជន​ជាតិ​ម៉ាឡេស៊ី​ចំនួន​២នាក់ និង​កម្ពុជា ១៧ នាក់ ​ត្រូវ​បាន​ចាប់​ខ្លួន ពាក់​ព័ន្ធ​នឹង​ល្បែង​ភ្នាល់​បាល់​តាម​អ៊ីនធឺណិត។ លោក បន្ត​ថា៖ «មនុស្ស​ទាំង​នេះ​កំពុង​បើក​លេង​ល្បែង​ភ្នាល់​បាល់ តាម​អ៊ីន​ធឺណិត ដែល​ជា​អំពើ​ខុស​ច្បាប់​ក្នុង​ប្រទេស​កម្ពុជា​»។

លោក បន្ថែមថា ក្នុង​រយៈ​ពេល​មួយ​ខែ អាជ្ញាធរ​បាន​ធ្វើ​ប្រតិបត្តិ​ការ​ចុះ​បង្ក្រាប​ធំៗ​ចំនួន​ពីរ ទៅលើ​ល្បែង​ភ្នាល់​ចាក់​បាល់ តាម​អ៊ីនធឺណិត។ លើក​ទី​មួយ​ អាជ្ញា​ធរ​ចាប់​បាន​ជន​ជាតិ​ឥណ្ឌូ​នេស៊ី​ជាង ១០០ នាក់​ហើយ​កំពុង​បន្ត​ធ្វើ​ការ​ស៊ើប​អង្កេត ស្វែង​រក​បណ្តាញ​របស់​ពួកគេ​ទៀត។

លោក អ៊ូច សុខុន ​អធិការ​នគរបាល​ខណ្ឌ​ចំការ​មន​បាន​បដិសេធ​មិន​ធ្វើ​អត្ថា​ធិប្បាយ លម្អិត​ទេ ដោយ​ថ្លែង​ថា អាជ្ញាធរ​គ្រាន់​តែ​សុំ​ឲ្យ​មាន​ការ​សហការ។

មន្រ្តីពី​ស្ថាន​ទូត​ចិន ម៉ាឡេស៊ី ឥណ្ឌូនេស៊ី ប្រចាំ​រាជធានី​ភ្នំពេញ មិន​អាច​ទាក់​ទង​សុំ​ការ​អត្ថា​ធិប្បាយ​បាន​ទេ​កាល​ពីម្សិលមិញ៕ PS

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។