ភ្នំពេញៈ ការវិវត្តបច្ចេកវិទ្យាក្នុងដំណាក់កាលនៃបដិវត្ដន៍ឧស្សាហកម្មទី៤ នឹងបណ្ដាលឱ្យមានការបាត់បង់ការងារ ហើយក៏បង្កើតឲ្យមានប្រភេទការងារថ្មីៗ ប៉ុន្ដែអ្នកដែលបាត់បង់ការងារក្នុងដំណាក់កាលនេះ នឹងមិនអាចស្វែងរកការងារធ្វើបាននោះទេ ប្រសិនបើពួកគេមិនទទួលបានការបណ្ដុះបណ្ដាលជំនាញឡើងវិញនិងបង្កើនសមត្ថភាពជំនាញទេនោះ។
នេះបើតាមសារលិខិតរបស់ លោកនាយករដ្ឋមន្រ្ដី ហ៊ុន សែន លើកឡើងក្នុងឱកាស ទិវាជាតិអប់រំបណ្ដុះបណ្ដាលបច្ចេកទេស និងវិជ្ជាជីវៈលើកទី២ ក្រោមប្រធានបទ Technical Vocational Education and Training (TVET) អាចធ្វើបាន» ដែលនឹងប្រារព្ធធ្វើឡើងនៅថ្ងៃទី ១៥ ខែ មិថុនា ស្អែកនេះនៅសាលមហោស្រពកោះពេជ្រ។
លោកនាយករដ្ឋមន្រ្ដីបង្ហាញតាមរយៈសារលិខិតនេះថា បច្ចុប្បន្នកម្ពុជាកំពុងជួបនូវបញ្ហាភាពមិនស៊ីគ្នានៃជំនាញ និងការផ្គត់ផ្គង់ជំនាញ មិនគ្រប់គ្រាន់ដោយសារតែប្រព័ន្ធអប់រំបណ្ដុះបណ្ដាលនៅមានកម្រិត និងមិនទាន់អាចឆ្លើយតបទៅនឹងតម្រូវការកម្លាំងពលកម្មដែលកំពុងផ្លាស់ប្ដូរ យ៉ាងឆាប់រហ័ស។
លោកបានបញ្ជាក់ថា៖ «ជាងនេះទៅទៀត ការវិវត្ដបច្ចេកវិទ្យាក្នុងដំណាក់កាលនៃបដិវត្ដន៍ឧស្សាហកម្មទី៤ នឹងបណ្ដាលឲ្យមានការបាត់បង់ការងារ ហើយក៏បង្កើតឲ្យមានប្រភេទការងារថ្មីៗផងដែរ។ ប៉ុន្ដែអ្នកដែលបាត់បង់ការងារក្នុងដំណាក់កាលនេះ នឹងមិនអាចស្វែងរកការងារបាននោះទេ ប្រសិនបើពួកគេមិនទទួលបានការបណ្ដុះបណ្ដាលជំនាញឡើងវិញនិងបង្កើនសមត្ថភាពជំនាញ»។
លោក ហ៊ុន សែន ថ្លែងថា៖ «យើងមិនអាចមានជម្រើសអ្វីក្រៅពីបង្កើនសមត្ថភាព ជំនាញដល់កម្លាំងពលកម្ម បង្កើនផលិតភាព បង្រួមគម្លាតភាពមិនស៊ីគ្នានៃជំនាញ ពង្រឹងសេវាព័ត៌មានទីផ្សារការងារ និងសេវារកការងារឲ្យធ្វើ បង្កើនគុណភាពអប់រំ និងបណ្ដុះបណ្ដាលវិជ្ជាជីវៈ ដើម្បីចាប់យកអត្ថប្រយោជន៍ជាអតិបរមានិងកាត់បន្ថយផលប៉ះពាល់អវិជ្ជមាននៃការប្រែប្រួលពិភពការងារនិងដើម្បីឆ្លើយតបទៅនឹងតម្រូវការជំនាញនាពេលអនាគត»។
លោកនាយករដ្ឋបានឲ្យដឹងថា ក្នុងរយៈពេល ៥ ឆ្នាំចុងក្រោយនេះ មានសិក្ខាកាម សិស្ស និស្សិត និងកម្មករនិយោជិតជាង ២០ ម៉ឺននាក់ បានទទួលការបណ្ដុះបណ្ដាលលើកកម្ពស់ជំនាញរបស់ខ្លួន តាមស្ថានភាពជាក់ស្ដែងរបស់ប្រជាពលរដ្ឋ។ កម្មវិធីបណ្ដុះបណ្ដាលត្រូវបានរៀបចំឲ្យមានជារយៈពេលខ្លី និងរយៈពេលវែង ក្នុងប្រព័ន្ធ និងក្រៅប្រព័ន្ធ ហើយត្រូវបានអនុវត្ដធ្វើឡើងនៅតាមគ្រឹះស្ថាន សហគ្រាស សហគមន៍ និងចល័ត។
លោក ទុន សុភ័ណ អ្នកសម្របសម្រួលជាតិនៃអង្គការ ILO បានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា ការលើកឡើងរបស់លោកនាយករដ្ឋមន្រ្ដី គឺជាការពិត ព្រោះកាលពីការពិគ្រោះយោបល់ថ្នាក់ជាតិលើបញ្ហាជំនាញវិជ្ជាជីវៈនាពេលថ្មីៗកន្លងមកនេះ ក៏បានលើកឡើងពីប្រធានបទទាក់ទងទៅនឹងអនាគតការងារនៅកម្ពុជានេះផងដែរ។
លោក សុភ័ណ បានថ្លែងថា៖ «ការជឿនលឿនលើផ្នែកបច្ចេកវិទ្យា បើយើងអត់ធ្វើការផ្លាស់ប្ដូរទេ អត់មានជំនាញទេ កម្មករប្រឈមនឹងការបាត់បង់ការងារ»។
ទោះជាយ៉ាងណាក៏ដោយលោក សុភ័ណ បានឱ្យដឹងថា តាមការសិក្សារបស់អង្គការ ILO ប្រទេស កម្ពុជា ក្នុងរយៈពេលពី ១៥-២០ ឆ្នាំ ខាងមុខនេះ បើកម្លាំងពលកម្មក្នុងស្រុកមិនមានការកែប្រែ ផ្លាស់ប្ដូរ រៀនឲ្យទាន់ តាមឲ្យទាន់ បច្ចេកវិទ្យាថ្មី អ្នកដែលបាត់បង់ការងារអាចកើតមានរហូតដល់ ៥៧ ភាគរយ នៃកម្លាំងពលកម្មសរុបនៅកម្ពុជា៕