ភ្នំពេញៈ រដ្ឋាភិបាលចិនតាមរយៈធនាគារចិន និងអនុព័ន្ធយោធាចិនកាលពីម្សិលមិញបានផ្ដល់សម្ភារបរិក្ខារវេជ្ជសាស្ដ្រសម្រាប់ប្រើប្រាស់ក្នុងកិច្ចការពារ និងទប់ស្កាត់ជំងឺកូវីដ ១៩ ដែលរួមមានម៉ាស់ វែនតាសុវត្ថិភាព ឧបករណ៍ធ្វើតេស្ត ម៉ាស់ N-95, របាំងវះកាត់ និងសម្លៀកបំពាក់សុវត្ថិភាពសម្រាប់មន្ដ្រីសុខាភិបាលសរុបជាង ២ តោន ដល់ក្រសួងសុខាភិបាល និងក្រសួងការពារជាតិកម្ពុជា។
នៅចំពោះមុខលោក Wu Guoquan ទីប្រឹក្សាស្ថានទូតចិនផ្នែកពាណិជ្ជកម្ម ដែលបានអញ្ជើញជាតំណាងទូតចិនប្រចាំកម្ពុជាក្នុងការចុះហត្ថលេខាប្រគល់ និងទទួលសម្ភារបរិក្ខារវេជ្ជសាស្ដ្រពីធនាគារចិនកាលពីម្សិលមិញលោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានសម្ដែងការអបអរ និងថ្លែងអំណរគុណយ៉ាងជ្រាលជ្រៅចំពោះមហាមិត្តចិន ដែលបានជួយឧបត្ថម្ភគាំទ្រនូវឧបករណ៍វេជ្ជសាស្ត្រទាំងនេះដល់កម្ពុជា ព្រោះសម្ភារបរិក្ខារវេជ្ជសាស្ដ្រទាំងនេះបានដើរតួនាទីដ៏សំខាន់សម្រាប់បម្រើឲ្យការទប់ស្កាត់ និងការឆ្លើយតបជាបន្ទាន់ទៅនឹងការរាតត្បាតនៃជំងឺកូវីដ១៩។
លោកថ្លែងថា៖ «ជំនួយមនុស្សធម៌របស់ធនាគារចិននេះមិនត្រឹមតែចូលរួមចំណែកពង្រឹងសមត្ថភាព ឆ្លើយតបបន្ទាន់ចំពោះបញ្ហាកូវីដ ១៩ បច្ចុប្បន្ននេះប៉ុណ្ណោះទេ តែវានឹងត្រូវបានប្រើប្រាស់ នៅពេលណាដែលមានការផ្ទុះការរាតត្បាតនៃជំងឺឆ្លងផ្សេងៗនាពេលអនាគត ព្រមទាំងចូលរួមចំណែកលើកកម្ពស់គុណភាពជីវិតរបស់ប្រជាជនកម្ពុជាផងដែរ»។
សម្ភារបរិក្ខារវេជ្ជសាស្ដ្រដែលធនាគារចិនបានផ្ដល់ដល់ក្រសួងសុខាភិបាល រួមមានម៉ាស់ចំនួន ១ ម៉ឺន វែនតាសុវត្ថិភាពចំនួន ៥០០ ម៉ាស N-95 ចំនួន ១ ពាន់ និង សម្លៀកបំពាក់សុវត្ថិភាពរបស់មន្ដ្រីសុខាភិបាលចំនួន ២០០ សម្រាប់។
ជាមួយគ្នានេះអនុព័ន្ធយោធាចិនបានបញ្ជូននូវសម្ភារបរិក្ខារពេទ្យសរុបជាង ២ តោនដែលរួមមាន ឧបករណ៍ធ្វើតេស្តិ៍ ម៉ាស់ N-95 របាំងវះកាត់ ឯកសណ្ឋានដែលធន់នឹងអង្គធាតុរាវ និងអាវធំសម្រាប់វះកាត់មកផ្ដល់ជូនក្រសួងការពារជាតិកម្ពុជាផងដែរកាលពីព្រឹកម្សិលមិញ។
លោក Geng Shuang អ្នកនាំពាក្យក្រសួងការបរទេសចិនគូសបញ្ជាក់ថា៖ «រដ្ឋាភិបាលចិននឹងប្រឹងប្រែងជួយកម្ពុជាគ្រប់យ៉ាង ដើម្បីប្រយុទ្ធប្រឆាំង និងទប់ស្កាត់ការរីករាលដាលវីរុស COVID-19 នេះ។ នោះក៏ព្រោះតែកម្ពុជាបានបង្ហាញការគាំទ្រដល់រដ្ឋាភិបាលចិនក្នុងគ្រាប្រយុទ្ធប្រឆាំងនឹងវីរុស COVID-19 ដ៏លំបាកកន្លងមក»។ បើតាមលោក Geng Shuang រដ្ឋាភិបាលចិននឹងជួយកម្ពុជាយកឈ្នះជំងឺរាតត្បាតកូវីដ១៩។
គិតត្រឹមថ្ងៃទី ១ ខែមេសាកម្ពុជាមានអ្នកឆ្លងជំងឺកូវីដ ១៩ ចំនួន ១០៩ នាក់ ក្នុងនោះជាសះស្បើយ ២៥ នាក់។ ចំណែកចិនមានឆ្លងជាង ៨១ ០០០ នាក់ ក្នុងនោះស្លាប់ជាង ៣ ៣០០ នាក់ និងអ្នកជាសះស្បើយជាង ៧៦ ០០០ នាក់៕