.jpg)
លោក ហ៊ុន សែន និងមន្ត្រីរដ្ឋាភិបាលនៅក្នុងកិច្ចប្រជុំពីម្សិលមិញ។ រូបថត SPM
ភ្នំពេញៈ នាយករដ្ឋមន្ត្រីចិន លី កឺឈាង ថ្លែងថា ចាប់ពីឆ្នាំ ២០២០ នេះទៅចិននឹងចែករំលែកព័ត៌មានអំពីស្ថានភាពទឹកទន្លេមេគង្គជាមួយប្រទេសក្នុងអនុតំបន់មេគង្គ-ឡានឆាងឲ្យបានទូលំទូលាយ ខណៈនាយករដ្ឋមន្ត្រីកម្ពុជាបានជំរុញឲ្យពន្លឿន និងសម្រេចឲ្យបាននូវខ្សែក្រវាត់អភិវឌ្ឍន៍សេដ្ឋកិច្ចនៅអនុតំបន់នេះនៅពេលដែលកំណើនសេដ្ឋកិច្ចសកលធ្លាក់ចុះ។
នាយករដ្ឋមន្ត្រីនៃប្រទេសចំនួន ៦ នៅក្នុងអនុតំបន់មេគង្គ-ឡានឆាង ដែលរួមមានចិន មីយ៉ាន់ម៉ា ថៃ ឡាវ កម្ពុជា និងវៀតណាមកាលពីព្រឹកម្សិលមិញបានបើកកិច្ចប្រជុំកំពូលលើកទី ៣ នៃកិច្ចសហប្រតិបត្តិការមេគង្គ-ឡានឆាង ដែលធ្វើឡើងតាមប្រព័ន្ធវីដេអូ។ កិច្ចប្រជុំកំពូលនេះធ្វើឡើងក្រោមប្រធានបទ «ការលើកកម្ពស់ភាពជាដៃគូដើម្បីវិបុលភាពរួម»។
លោក លី កឺឈាង នាយករដ្ឋមន្ត្រីចិនថ្លែងថា ចិននឹងជួយដល់ប្រទេសនៅក្នុងអនុតំបន់ទន្លេមេគង្គក្នុងការប្រើប្រាស់ធនធានទឹក ហើយចាប់ពីឆ្នាំ ២០២០ នេះទៅ ចិននឹងចែករំលែកព័ត៌មានអំពីទឹកទន្លេមេគង្គទៅដល់ប្រទេសតាមដងទន្លេមេគង្គពេញ ១ ឆ្នាំ។ ការចែករំលែកព័ត៌មានធនធានទឹកនេះនឹងធ្វើឲ្យទាន់ពេលវេលាក្នុងរដូវមានទឹកជំនន់ក៏ដូចជារដូវរាំងស្ងួត និងដាក់ចេញនូវយន្តការចែករំលែកទិន្នន័យសម្រាប់ពេញ ១ ឆ្នាំ។
លោកថ្លែងដូច្នេះថា៖ «ទន្លេឡានឆាង-មេគង្គ ស្ថិតនៅក្នុងប្រទេសចិន ដូច្នេះប្រទេសចិនដើរតួនាទីសំខាន់ក្នុងការដាក់ចេញនូវវេទិកាដែលបើកចំហដល់ប្រទេសទាំង ៦ នៅក្នុងយន្តការនេះ។ ប្រសិនបើមានការផ្លាស់ប្ដូរកម្ពស់ទឹកក្នុងស្ថានការណ៍ណាមួយនោះ ឬប្រសិនបើមានការលំបាកសម្រាប់ប្រទេសនីមួយៗក្នុងការកត់ត្រាព័ត៌មានអំពីទឹកទន្លេនេះ យើងត្រៀមខ្លួនផ្ដល់ទិន្នន័យជាចំហ ហើយអញ្ជើញអ្នកជំនាញគ្រប់ប្រទេសទាំងអស់ ដើម្បីវិភាគទិន្នន័យ ហើយទិន្នន័យទាំងអស់នឹងមានសម្រាប់ប្រទេសពាក់ព័ន្ធក្នុងការប្រើប្រាស់ជាឯកសារយោង ដើម្បីបង្កើតការឆ្លើយតបប្រកបដោយប្រសិទ្ធភាព»។
លោកបន្តថា កិច្ចការនេះនឹងតម្រូវឲ្យមាន កិច្ចប្រជុំថ្នាក់រដ្ឋមន្ត្រីស្ដីពីកិច្ចសហប្រតិបត្តិការធនធានទឹក និងវេទិកាទឹកយ៉ាងទៀងទាត់។
លោក ហ៊ុន សែន នាយករដ្ឋមន្ត្រីព្រះរាជាណាចក្រកម្ពុជាបានថ្លែងថា លោកគាំទ្រចក្ខុវិស័យការងាររបស់ចិន ដែលមានវិស័យអាទិភាពរួមមាន កិច្ចសហប្រតិបត្តិការធនធានទឹក ការតភ្ជាប់តាមរយៈការកសាងខ្សែក្រវាត់អភិវឌ្ឍន៍សេដ្ឋកិច្ចមេគង្គ-ឡានឆាង និងការជំរុញថាមភាពជាមួយនឹងច្រករបៀងពាណិជ្ជកម្មតាមដី និងសមុទ្រអន្តរជាតិថ្មី។ លោកក៏គាំទ្រចំណុចអាទិភាពផ្សេងទៀត រួមមានការអភិវឌ្ឍប្រកបដោយចីរភាពក្នុងវិស័យកសិកម្ម និងបរិស្ថាន និងការលើកកម្ពស់សុខភាពសាធារណៈ។
លោក ហ៊ុន សែន មានប្រសាសន៍ថា៖ «ការស្រុះស្រួលមតិរួមគ្នាក្នុងការរកដំណោះស្រាយពាក់ព័ន្ធនឹងប្រធានបទរសើបបំផុតនៃការគ្រប់គ្រងទឹក ឆ្លងដែន គឺជាជោគជ័យដ៏សំខាន់បំផុតមួយទៀតនៃកិច្ចសហប្រតិបត្តិការរបស់យើង។ ជាការពិត កិច្ចប្រជុំថ្នាក់រដ្ឋមន្ត្រីលើកទី ១ ស្ដីពីកិច្ចសហប្រតិបត្តិការធនធានទឹកឡានឆាង-មេគង្គ នៅប្រទេសចិន កាលពីខែធ្នូឆ្នាំមុនបានផ្ដល់ទិសដៅច្បាស់លាស់សម្រាប់ពង្រឹង និងពង្រីកកិច្ចសហប្រតិបត្តិការពាក់ព័ន្ធនឹងការចែករំលែកទិន្នន័យ និងព័ត៌មានជលសាស្ត្រ។ លទ្ធផលជាក់ស្ដែងនៃកិច្ចប្រជុំនេះបានបន្តចូលរួមចំណែកដល់ការលើកកម្ពស់ការយោគយល់ទៅវិញទៅមកក្នុងការគ្រប់គ្រងធនធានទឹកនៅក្នុងតំបន់»។
លោកក៏បង្ហាញពីទស្សនៈយល់ឃើញផ្ទាល់ខ្លួនផងដែរថានៅក្នុងបរិការណ៍ដែលកំណើនសេដ្ឋកិច្ចសកលធ្លាក់ចុះការបង្កើត រក្សាឲ្យបាននូវប្រភពកំណើនថ្មីនៅក្នុងអនុតំបន់នេះ គឺជាកត្តាចាំបាច់ ដែលមិនអាចខ្វះបាន។
លោកមានប្រសាសន៍ថា៖ «ដូច្នេះយើងត្រូវខិតខំពន្លឿនការរៀបចំ និងការសម្រេចឲ្យបាននូវខ្សែក្រវាត់អភិវឌ្ឍន៍សេដ្ឋកិច្ចមេគង្គ-ឡានឆាងដែលនឹងក្លាយជាក្បាលម៉ាស៊ីនថ្មីនៃកំណើនសម្រាប់អនុតំបន់យើង។ ការលើកកម្ពស់នូវការវិនិយោគលើហេដ្ឋារចនាសម្ព័ន្ធប្រកបដោយគុណភាព ព្រមទាំងការតភ្ជាប់ និងកិច្ចសហប្រតិបត្តិការផ្នែកឧស្សាហកម្ម និងជំរុញបន្ថែមទៀតនូវពាណិជ្ជកម្មឆ្លងកាត់ព្រំដែន និងពង្រឹងការធ្វើសមាហរណកម្មខ្សែចង្វាក់ផ្គត់ផ្គង់នៃអនុតំបន់របស់យើងចូលទៅក្នុងខ្សែចង្វាក់តម្លៃសកល»។
លោក ហ៊ុន សែន បន្តថាការធ្វើឲ្យប្រសើរឡើងនូវកិច្ចសហប្រតិបត្តិការផ្នែកវិទ្យាសាស្ត្រ បច្ចេកវិទ្យា និងនវានុវត្តន៍ក៏នឹងជួយលើកកម្ពស់ភាពប្រកួតប្រជែង រយៈពេលវែងនៃអនុតំបន់នេះផងដែរ។ ក្នុងក្របខ័ណ្ឌកិច្ចសហប្រតិបត្តិការនេះ កម្ពុជាទទួលបានគម្រោងចំនួន ៥៥ ចាប់ពីឆ្នាំ ២០១៦ មកដែលគ្របដណ្ដប់លើសកម្មភាពសហប្រតិបត្តិការជាក់លាក់។ កិច្ចសហប្រតិបត្តិការនេះបានធ្វើឲ្យមានការអភិវឌ្ឍ និងរួមចំណែកដល់ការលើកកម្ពស់សុខុមាលភាពប្រទេស និងប្រជាជន។
នៅបន្ទាប់ពីកិច្ចប្រជុំកំពូលម្សិលមិញ ថ្នាក់ដឹកនាំនៃប្រទេសទាំង ៦ បានចេញសេចក្ដីថ្លែងការណ៍រួមមួយដែលបញ្ជាក់ពីកិច្ចសហប្រតិបត្តិការជាច្រើន រួមទាំងការចែករំលែកព័ត៌មាន ការបណ្ដុះបណ្ដាលសមត្ថភាពដើម្បីដោះស្រាយបញ្ហាសន្តិសុខមិនប្រពៃណីដូចជាបម្រែបម្រួលអាកាសធាតុ ការទប់ស្កាត់គ្រោះមហន្តរាយ ជំងឺរាតត្បាត គ្រឿងញៀន ការលាងសម្អាតប្រាក់ បទល្មើសបច្ចេកវិទ្យា ការជួញដូរមនុស្ស ជួញដូរអាវុធ និងគ្រាប់រំសេវ។ ក្រៅពីនេះក៏មានកិច្ចសហប្រតិបត្តិការក្នុងការសង្គ្រោះបន្ទាន់ផ្នែកមនុស្សធម៌ដូចជាក្នុងពេលមានគ្រោះទឹកជំនន់ គ្រោះរាំងស្ងួត បាក់ដី ស្ថានភាពផ្សែងឆ្លងប្រទេស និងការធានាសន្តិសុខស្បៀង ទឹក និងថាមពល។
កាលពីដើមខែសីហានេះ គណៈកម្មការទន្លេមេគង្គបានចេញផ្សាយរបាយការណ៍មួយមាន ៣២ ទំព័រអំពីស្ថានភាពទាបនៃទឹកទន្លេមេគង្គក្រោម។ របាយការណ៍បានបញ្ជាក់ថា ស្ថានភាពទឹកទាបនេះអាចបណ្ដាលមកពីកត្តាបាតុភូតអែលនីណូ និងប្រតិបត្តិការទំនប់នៅតំបន់មេគង្គលើ។ ប៉ុន្តែអគ្គលេខាធិការដ្ឋានគណៈកម្មការទន្លេមេគង្គមិនអាចទទួលបានទិន្នន័យ និងព័ត៌មានផ្លូវការ ដើម្បីផ្ទៀងផ្ទាត់ពីផលប៉ះពាល់ចម្បងៗនៃប្រតិបត្តិការស្តុកទឹកទុកនៅតំបន់មេគង្គលើទេ។
លោក An Pich Hatda អគ្គនាយកនៃលេខាធិការដ្ឋានគណៈកម្មការទន្លេមេគង្គ បានថ្លែងថា៖ «យើងអំពាវនាវឲ្យប្រទេសទាំង ៦ នៅតំបន់មេគង្គ បង្កើនការចែករំលែកទិន្នន័យ និងព័ត៌មានអំពីទំនប់របស់ពួកគេ និងប្រតិបត្តិការហេដ្ឋារចនាសម្ព័ន្ធទឹកប្រកបដោយតម្លាភាព និងបានឆាប់រហ័សជាមួយគណៈកម្មការទន្លេមេគង្គ។ វាជាពេលវេលាដែលត្រូវធ្វើអ្វីដែលយើងបាននិយាយ និងធ្វើដើម្បីផលប្រយោជន៍រួមនៅតំបន់អាងទន្លេមេគង្គទាំងមូល និងតំបន់ដែលរងផលប៉ះពាល់»៕
