.jpg)
គ្រូពេទ្យ ឈរក្បែររថយន្តដែលត្រូវបានគេរៀបចំត្រៀមសម្រាប់ដឹកវ៉ាក់សាំង នៅឯមន្ទីរពេទ្យព្រះកេតុមាលាកាលពីថ្ងៃម្សិលមិញ។ ហេង ជីវ័ន
ភ្នំពេញៈ ឯកអគ្គរដ្ឋទូតចិនប្រចាំកម្ពុជាលោក វ៉ាង វិនធាន បានថ្លែងកាលពីថ្ងៃម្សិលមិញថា វ៉ាក់សាំងកូវីដ១៩ ដែលរដ្ឋាភិបាលប្រទេសចិនផ្តល់ជូនដល់ប្រទេសកម្ពុជាដំបូងចំនួន ៦០ ម៉ឺនដូសនឹងត្រូវដឹកតាមយន្តហោះពិសេសរបស់ប្រទេសចិនមកដល់រាជធានីភ្នំពេញនៅចុងសប្តាហ៍នេះ។
លោក វ៉ាង ថ្លែងឱ្យដឹងតាមរយៈអ្នកបកប្រែដូចនេះនៅក្នុងពិធីសំណេះសំណាលជាមួយគ្រូពេទ្យចាក់វ៉ាក់សាំងការពារជំងឺកូវីដ១៩នៅមន្ទីរពេទ្យព្រះកេតុមាលា ក្រោមអធិបតីភាពលោក ទៀ បាញ់ រដ្ឋមន្ត្រីក្រសួងការពារជាតិរួមនឹងរដ្ឋមន្ត្រីក្រសួងសុខាភិបាល ព្រមទាំងមន្ត្រី និងក្រុមគ្រូពេទ្យនៃក្រសួងការពារជាតិជាច្រើននាក់។
លោកបានបន្តថា ជាការឆ្លើយតបនៅពេលដែលប្រទេសចិនបានគ្រប់គ្រងកូវីដ១៩បានហើយ ប្រទេសចិនក៏បានបញ្ជូននូវអ្នកជំនាញវិទ្យាសាស្ត្រចំនួន ២ ក្រុមមកដល់ប្រទេសកម្ពុជា ហើយបានផ្តល់ជូននូវសម្ភារបរិក្ខារមួយចំនួនទៀត។
លោក វ៉ាង បានមានប្រសាសន៍ថា៖ «បច្ចុប្បន្ននេះ ទោះបីជាប្រទេសចិនក៏មានតម្រូវការមួយចំនួនពាក់ព័ន្ធនឹងវ៉ាក់សាំងកូវីដ១៩ដែរ ប៉ុន្តែប្រទេសចិនក៏បានសម្រេចថា នឹងផ្តល់ជូនជាបន្ទាន់នូវវ៉ាក់សាំងកូវីដ-១៩ចំនួន ៦០ ម៉ឺនដូសជាដំបូងមកប្រទេសកម្ពុជា ដែលមានផែនការនៅចុងសប្តាហ៍នេះ ដោយនឹងប្រើប្រាស់យន្តហោះពិសេសរបស់ប្រទេសចិនដឹកជញ្ជូនមកដល់រាជធានីភ្នំពេញ»។
ឯកអគ្គរដ្ឋទូតចិនប្រចាំកម្ពុជាបានបញ្ជាក់ថា៖ «ដែកថែបរវាងចិន និងកម្ពុជាពិតជាមានភាពជ្រាលជ្រៅបំផុត និងកត់ត្រានៅក្នុងប្រវត្តិសាស្ត្រចិន និងកម្ពុជា»។
អ្នកឯកទេសចិនចំនួន ៤ រូបដែលជាក្រុមអ្នកជំនាញវិទ្យាសាស្ត្រយោធាមកជួយបណ្តុះបណ្តាលក្រុមគ្រូពេទ្យកម្ពុជាអំពីរបៀបនៃការដឹកជញ្ជូន ការទុកដាក់ថែរក្សា និងរបៀបនៃការចាក់វ៉ាក់សាំងកូវីដ១៩ និងមានការចែករំលែកនូវបទពិសោធទៅដល់ក្រុមគ្រូពេទ្យកម្ពុជាចំនួន ៣០០ នាក់។
លោក វ៉ាង បានលើកឡើងថា៖ «ខ្ញុំជឿជាក់ថា ក្រោមការខិតខំប្រឹងប្រែងរបស់ចិន និងកម្ពុជា ប្រទេសចិននឹងជួយដល់ប្រទេសកម្ពុជាក្នុងដំណើរការចាក់វ៉ាក់សាំងកូវីដ១៩ និងរួមគ្នាយកឈ្នះក្នុងសង្គ្រាមកូវីដ១៩ ហើយជួយប្រទេសកម្ពុជាស្តារសេដ្ឋកិច្ចឡើងវិញឱ្យបានឆាប់រហ័ស»។
កុងតឺន័រត្រជាក់ចំនួន ៤ ដែលមានឡានទូក្លាសេចំនួន ២ បានត្រៀមរួចរាល់សម្រាប់ដឹកជញ្ជូនវ៉ាក់សាំងកូវីដ១៩ដែលរថយន្តនេះមានមុខងារ ២ កំណត់បានទាំងក្តៅ និងត្រជាក់ អាចកំណត់សីតុណ្ហភាពតាមការចាំបាច់។ បន្ទាប់ពីពិនិត្យមើលនូវកុងតឺន័រសម្រាប់ដឹកវ៉ាក់សាំងកូវីដ១៩រួចរាល់ហើយ លោក ទៀ បាញ់ ឧបនាយករដ្ឋមន្ត្រី រដ្ឋមន្ត្រីការពារជាតិបានថ្លែងប្រាប់អ្នកសារព័ត៌មានថា គ្រប់គ្នាបានឃើញទាំងអស់គ្នាហើយ ដែលទាំងនេះជាការប្រុងប្រៀបទទួលនូវវ៉ាក់សាំងកូវីដ១៩ដែលកម្ពុជានឹងទទួលបានពីសាធារណរដ្ឋប្រជាមានិតចិន នៅពេលឆាប់ៗខាងមុខនេះ។
លោកថ្លែងថា៖ «អ្វីដែលសំខាន់ជាងគេនោះគឺការដឹកជញ្ជូន ថែរក្សាទុកដាក់ រហូតឈានទៅដល់ការចាក់ដែលវាពិតជាមានសារៈសំខាន់ណាស់ចំពោះផលិតផលយុទ្ធសាស្ត្របន្ទាន់នេះ ដែលសម្តេចតេជោបាននិយាយថា វាជាទំនិញពិសេស»។
លោក ទៀ បាញ់ បានបន្តទៀតថា តម្រូវការរបស់វ៉ាក់សាំងនេះគឺត្រូវថែរក្សាសីតុណ្ហភាពរបស់វាឱ្យបានថេរក្នុងការទុកដាក់ដែលមិនធ្វើឱ្យមានការប៉ះពាល់ដល់គុណភាពរបស់វ៉ាក់សាំងនេះ។ ផ្នែកសុខាភិបាលរបស់ក្រសួងការពារជាតិ បានរៀបចំដើម្បីទទួលនូវវ៉ាក់សាំងកូវីដ១៩ ដែលនឹងត្រូវដឹកពីព្រលានយន្តហោះយកមកទុកនៅមន្ទីរពេទ្យព្រះកេតុមាលា បន្ទាប់មកនឹងធ្វើផែនការចែកចាយចាក់វ៉ាក់សាំងនេះ។
លោកថ្លែងថា៖ «វ៉ាក់សាំងកូវីដ១៩ ដែលនឹងទទួលបានពីប្រទេសចិនដំបូងចំនួន ៦០ ម៉ឺនដូសនឹងត្រូវផ្តល់ជូនដល់កងទ័ពចំនួន ៣០ ម៉ឺនដូស និង ៣០ ម៉ឺនដូសទៀតផ្តល់ទៅក្រសួងសុខាភិបាល។ សម្រាប់ទ័ពគឺយើងនឹងចាក់ជូនពួកគាត់ទាំងអស់ បន្ទាប់មកនឹងផ្តល់ដល់គ្រួសាររបស់គាត់ និងមានចាក់ជាបន្តបន្ទាប់ទៅដល់អ្នកនៅជុំវិញពួកគាត់។ យើងនឹងធ្វើការពិភាក្សាជាបន្តទៀត»។
រដ្ឋាភិបាលចិនបានសម្រេចផ្តល់ជំនួយវ៉ាក់សាំងបង្ការជំងឺកូវីដ១៩ ឈ្មោះ ស៊ីណូហ្វាមចំនួន ១ លានដូស ដល់រដ្ឋាភិបាលកម្ពុជា ដើម្បីចាក់ជូនប្រជាពលរដ្ឋដោយឥតគិតថ្លៃ។ វ៉ាក់សាំង ៦០ ម៉ឺនដូសនឹងត្រូវបញ្ជូនមកដល់មុនគេ ហើយក្រោយទៀតនឹងត្រូវបញ្ជូនជាបន្តបន្ទាប់។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងនៅថ្ងៃទី ២ ខែកុម្ភៈ ឆ្នាំ ២០២១ ថា ការចាក់វ៉ាក់ ឬទទួលវ៉ាក់សាំងកូវីដ១៩ពីប្រទេសចិនមិនមែនជារឿងដែលកម្ពុជាធ្វើទៅតាមរបបនយោបាយ ឬក៏ជានយោបាយរបស់ចិននោះទេ។
លោកស្រីបញ្ជាក់ថា៖ «ខ្ញុំសូមជម្រាបជូនថា វ៉ាក់សាំងដែលផ្តល់ជំនួយពីសាធារណរដ្ឋប្រជាមានិតចិននេះ គឺជាវ៉ាក់សាំងដែលកំពុងតែមានវឌ្ឍនភាពល្អដែលអង្គការសុខភាពពិភពលោកកំពុងតែពិនិត្យនូវឯកសារបច្ចេកទេសទាំងអស់ដែលបានត្រួតពិនិត្យលើកទី ១ រួចមកហើយ»។
លោកស្រីថា ប្រភេទវ៉ាក់សាំងឈ្មោះ «ស៊ីណូហ្វាម» ដែលនៅលើសកលលោកនេះ បើគិតត្រឹមថ្ងៃទី ១៩ ខែមករា ឆ្នាំ ២០២១ ស៊ីណូហ្វាមមានចំនួន ២២៣ លានដូសហើយ។ មានប្រទេសប៉ាគីស្ថានទិញ ៨៨ លានដូស តំបន់មជ្ឈិមបូព៌ាមាន ៧៥ លានដូស ហើយដោយឡែកប្រទេសឥណ្ឌូនេស៊ីដែលនៅក្នុងតំបន់អាស៊ីមានការបញ្ជាទិញរហូតទៅដល់ ៦០ លានដូសហើយ។ ត្រឹមថ្ងៃទី ៣ ខែកុម្ភៈ ឆ្នាំ ២០២១ នេះកម្ពុជាមានអ្នកមានវីរុសកូវីដ១៩ចំនួន ៤៦៦ នាក់ក្នុងនោះជាសះស្បើយ ៤៤៧ នាក់ និងអ្នកកំពុងសម្រាកព្យាបាលមានចំនួន ១៩ នាក់៕
វីដេអូ៖
