.jpg)
ទីតាំងសម្រាប់ទុកធ្វើតេស្តរកវីរុសកូវីដ១៩នៅខេត្តព្រះសីហនុ។ រូបថត ស្ថានទូតចិន
ភ្នំពេញៈ ស្ថានទូតចិនប្រចាំកម្ពុជាបានឱ្យដឹងថា បរិក្ខារតេស្តរកជំងឺវីរុសកូវីដ ១៩ ខ្នាតធំ ១ គ្រឿង ដែលជាជំនួយឥតសំណងរបស់រដ្ឋាភិបាលចិននឹងមកដល់ខេត្តព្រះសីហនុនាដើមខែមេសាខាងមុខនេះ ដើម្បីជួយពន្លឿនលទ្ធផលធ្វើតេស្ត ខណៈកម្ពុជាគ្រោងដំឡើងម៉ាស៊ីនតេស្ត រកមេរោគនេះចំនួន ៣ បន្ថែមទៀតក្នុងតំបន់ដែលមានការប្រឈមច្រើន។
ដោយបានសរសេរបង្ហោះនៅលើទំព័រហ្វេសប៊ុកជាផ្លូវការកាលពីម្សិលមិញ ស្ថានទូតចិនប្រចាំកម្ពុជាបានឱ្យដឹងថា ក្រៅពីម៉ាស៊ីនតេស្តនេះ ភាគីចិនក៏នឹងបញ្ជូនក្រុមអ្នកជំនាញរបស់ខ្លួនមកកាន់ប្រទេសកម្ពុជាផងដែរ ដើម្បីជួយសម្រួលដល់មន្ទីរពេទ្យបង្អែកខេត្តព្រះសីហនុក្នុងការដំឡើងរៀបចំ និងបណ្ដុះបណ្ដាលជូនដល់បុគ្គលិកពាក់ព័ន្ធ។
ស្ថានទូតនេះបានបញ្ជាក់ថា៖ «បន្ទាប់ពីដាក់ឱ្យប្រើប្រាស់សំណាក តេស្តរកវីរុសរបស់ខេត្តព្រះសីហនុ ខេត្តកែបខេត្តកំពត និងខេត្តមួយចំនួនដែលនៅក្បែរនោះនឹងត្រូវបានបញ្ជូនមកកាន់ទីនោះ នេះនឹងអាចជួយដល់ភាគីកម្ពុជាក្នុងការបង្កើនល្បឿនតេស្តរកជំងឺវីរុសជួយសន្សំថវិកាទប់ស្កាត់នឹងជំងឺវីរុស ហើយកិច្ចប្រយុទ្ធប្រឆាំងនឹងជំងឺវីរុសអាចអនុវត្តកាន់តែល្អប្រសើរ»។
លោកស្រី យក់ សម្បត្ដិ រដ្ឋលេខាធិការក្រសួងសុខាភិបាលបានថ្លែងកាលពីថ្ងៃទី ២៣ មីនាថា ក្រសួងសុខាភិបាលនឹងដាក់ដំណើរការម៉ាស៊ីន PCR សម្រាប់ធ្វើតេស្ដរកមេរោគកូវីដ១៩ និងមេរោគផ្សេងៗចំនួន ៣ បន្ថែមទៀតនៅខែមេសា ខាងមុខ។
លោកស្រីបានបញ្ជាក់ថា៖ «ក្រោមការជំរុញ និងចូលរួមពីអង្គការដៃគូម៉ាស៊ីនធំៗចំនួន ២ សម្រាប់តេស្ដសំណាករកមេរោគកូវីដ១៩ នឹងមកដល់កម្ពុជាក្នុងពេលឆាប់ៗខាងមុខនេះដោយម៉ាស៊ីន ១ គ្រឿងដំបូងនឹងមកដល់នៅសប្ដាហ៍ក្រោយនេះ ដែលនឹងដាក់ដំឡើងនៅក្នុងមជ្ឈមណ្ឌលជាតិផ្ដល់ឈាម។ ដោយឡែកម៉ាស៊ីន ១ គ្រឿងទៀតនឹងមកដល់ខែមេសា ថ្ងៃទី ១៩ ដែលនឹងបំពាក់នៅវិទ្យាស្ថានសុខភាពសាធារណៈ»។
លោកស្រីបន្តថា ចំណែកម៉ាស៊ីនទី ៣ សម្រាប់ដំឡើងនៅខេត្តព្រះសីហនុគឺជាជំនួយរបស់ចិនដែលនឹងអាចមានសមត្ថភាពធ្វើតេស្ដសំណាកពីអ្នកសង្ស័យនៅខេត្តជុំវិញនោះឱ្យកាន់តែឆាប់រហ័ស។ រីឯនៅថ្ងៃទី ២៩ មីនាខាងមុខនេះ ក្រុមអ្នកជំនាញចិននឹងមកកម្ពុជាដើម្បីជួយដំឡើងម៉ាស៊ីននេះ។
លោក ហែន ភារៈ វេជ្ជបណ្ឌិតផ្នែកផ្លូវដង្ហើមដែលមានបទពិសោធជាង ២០ ឆ្នាំ បានប្រាប់ ភ្នំពេញ ប៉ុស្តិ៍ ពីម្សិលមិញថា ការជួយរបស់ប្រទេសជាដៃគូ ជាពិសេសចិនគឺជាសញ្ញាវិជ្ជមានមួយស្របពេលដែលកម្ពុជានៅមានការខ្វះខាតនូវបរិក្ខារទាំងនេះនៅឡើយ។ បន្ថែមពីនេះលោកថា ប្រទេសចិនគឺជាប្រទេសមួយដែលដឹងច្បាស់ពីរបៀបនៃការចម្លង និងការទប់ស្កាត់បានល្អ។
ដូច្នេះការជួយរបស់រដ្ឋាភិបាលនេះគឺធ្វើឱ្យកម្ពុជាអាចស្វែងរកប្រភពចម្លង និងទប់ស្កាត់បានទាន់ពេលវេលា។
លោករៀបរាប់ថា៖ «ប្រទេសចិន គេអាចដឹងពីទំហំប៉ុនណា គេអាចដឹងមុន ដូច្នេះបើលទ្ធផលតេស្តយើងយឺត នោះការគ្រប់គ្រងគឺពិបាកណាស់។ ក្នុងពេលនេះ យើងត្រូវតែធ្វើយ៉ាងណាឱ្យការធ្វើតេស្តដឹងលទ្ធផលឱ្យបានលឿន និងច្រើនទីតាំងទើបប្រសើរ»។
ឆ្លើយតបទៅនឹងការរីករាលដាលឆ្លងចូលសហគមន៍នេះ លោក ហែន ភារៈ បានលើកឡើងថា កម្ពុជាគួរបង្កើតនូវមន្ទីរពិសោធន៍ដែលមានសមត្ថភាពឱ្យបានគ្រប់ខេត្ត-ក្រុង តាមដែលអាចធ្វើបាន ដើម្បីធានាថា ការទទួលសំណាកនិងលទ្ធផលចេញបានឆាប់រហ័ស ងាយស្រួលរកវិធានការទប់ស្កាត់បានទាន់ពេលវេលា។
លោកបានបញ្ជាក់ថា៖ «បើតាមទិន្នន័យដែលក្រសួងប្រកាសពី ១ ថ្ងៃទៅ ១ ថ្ងៃគឺឃើញថា ប្រទេសយើងអាចគ្រប់គ្រងស្ថានការណ៍បានល្អជាងប្រទេសនានាផងគឺមិនអីទេ។ តែបន្តមកទៀត យើងត្រូវអនុវត្តច្បាប់ឱ្យតឹងរ៉ឹងតែម្តងមិនត្រូវធូររលុងទេ ព្រោះបើយើងរយីករយាក គឺផ្ទុះខ្លាំងមែនទែន។ វាគឺជាជំងឺឆ្លង ឬអាសន្នរោគ យើងមិនអាចប៉ាន់ប្រមាណជាមុនបានទេ យើងត្រូវតែប្រឹងឱ្យអស់ពីលទ្ធភាព ព្រោះឆ្លងលឿនណាស់»៕
វីដេអូ៖
