ព្រះសីហនុ/សៀមរាបៈ ជនជាតិចិនសរុបចំនួន ៧ នាក់ត្រូវបានឃាត់ខ្លួនយកទៅសួរនាំក្នុងករណីដាច់ដោយឡែកពីគ្នារឿងប្រើប្រាស់រថយន្តស៊ីរ៉ែនរបស់នគរបាលពន្លត់អគ្គិភ័យ និងលួចខួងថ្មនៅប្រាសាទអង្គរវត្ត។
ប្រធាននាយកដ្ឋាននគរបាលបង្ការពន្លត់អគ្គិភ័យ និងសង្គ្រោះនៃក្រសួងមហាផ្ទៃថ្លែងថា ជនជាតិចិន ២ នាក់បើកឡានពាក់ស្លាកលេខនគរបាលរបស់នាយកដ្ឋានពន្លត់អគ្គិភ័យគឺជាបុគ្គលិករបស់ក្រុមហ៊ុនដែលចុះអនុស្សរណៈនៃការយោគយល់ជាមួយក្រសួងមហាផ្ទៃហើយគ្មានបទល្មើសកើតឡើងទេ។
កាលពីថ្ងៃទី ៨ ខែឧសភានគរបាលចរាចរណ៍ផ្លូវគោកក្រុងព្រះសីហនុបានឃាត់ខ្លួនជនជាតិចិន ២ នាក់ដែលបើកឡាន Vigo ពាក់ស្លាកលេខ «នគរបាល 2-7070» មានភ្លើងស៊ីរ៉ែននៅពីលើ។ ជនជាតិចិនទាំង ២ មានឈ្មោះ Huang Cheng ភេទប្រុស អាយុ ៣២ ឆ្នាំ និងម្នាក់ទៀតឈ្មោះ Chen Lu អាយុ ២៦ ឆ្នាំ។
ការឃាត់ខ្លួននេះធ្វើឲ្យមានប្រតិកម្មពីសំណាក់អ្នកលេងហ្វេសប៊ុកជាច្រើនដោយពួកគេមានចម្ងល់ថា ហេតុអ្វីជនជាតិចិនមានរថយន្តប៉ូលិសបំពាក់ស៊ីរ៉ែនជិះដោយសេរីបែបនេះ។
លោក នេត វត្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះបានថ្លែងកាលពីម្សិលមិញថាជនជាតិចិនទាំង ២ ខាងលើគឺជាបុគ្គលិករបស់ក្រុមហ៊ុនឥន្ទ្រីមាស (Golden Eagle) ដែលបានចុះ MoU ជាមួយអគ្គស្នងការនគរបាលជាតិក្នុងការត្រួតពិនិត្យ និងបំពាក់ប្រព័ន្ធពន្លត់អគ្គិភ័យគ្រប់គោលដៅក្នុងប្រទេសកម្ពុជាក្នុងការបង្ការ និងពន្លត់អគ្គិភ័យ។ លោកថា ជនជាតិចិនទាំង ២ បានធ្វើដំណើរទៅជាមួយមន្ត្រីនគរបាលដើម្បីទៅពិនិត្យនិងបំពាក់ប្រព័ន្ធអគ្គិភ័យនៅរោងចក្របារីមួយកន្លែងនៅខេត្តព្រះសីហនុ។ ប៉ុន្តែចិនទាំង ២ នាក់បានយករថយន្តសមត្ថកិច្ចជិះក្រោយពេលសមត្ថកិច្ចផ្ញើរថយន្តនោះនៅកន្លែងស្នាក់នៅរបស់ក្រុមហ៊ុនដោយទុកសោនៅជាមួយផង។
លោកនិយាយថា៖ «ចៃដន្យចិនហ្នឹង វាអត់មានអីហូបបាយ វាក៏យកសោបើកចេញទៅហូបបាយទៅ ហើយក៏នគរបាលចរាចរណ៍ក្រុងក៏គេឃាត់។ យើងអត់មានពាក់ព័ន្ធដូចការចោទប្រកាន់ថាលក់បំពង់លក់អីទេ»។
លោកថ្លែងថា រឿងរ៉ាវនេះបានបញ្ចប់ដោយសមត្ថកិច្ចបានយកឡាននោះមកអង្គភាពវិញ ហើយណែនាំចិនទាំង ២ នាក់កុំឲ្យធ្វើដូច្នេះទៀត។
ករណីដាច់ដោយឡែកមួយទៀតនគរបាលការពារបេតិកភណ្ឌក្នុងឧទ្យានជាតិអង្គរបានធ្វើការឃាត់ខ្លួនជនជាតិចិន ៤ នាក់ក្នុងខណៈដែលពួកគេកំពុងតែធ្វើការខួងថ្មនៅផ្នែកខាងត្បូងនៃមុខប្រាសាទអង្គរកាលពីថ្ងៃអង្គារដោយគ្មានការអនុញ្ញាតពីអាជ្ញាធរអប្សរា។
លោក ឡុង កុសល អ្នកនាំពាក្យអាជ្ញាធរជាតិអប្សរាបានឲ្យដឹងកាលពីម្សិលមិញថាកន្លែងដែលជនជាតិចិនខួងនោះមានមុខកាត់ ១,៦ សង់ទីម៉ែត្រ និងជម្រៅប្រមាណជា ១ តឹកប៉ុណ្ណោះព្រោះភ្លាមៗនោះកម្លាំងនគរបាលការពារបេតិកភណ្ឌបានធ្វើការបញ្ឈប់ពួកគេជាបន្ទាន់ផងដែរ។
លោកបញ្ជាក់ថា៖ «ពេលគាត់ខួងហ្នឹង យើងបានឃើញភ្លាមនិងចុះទៅបញ្ឈប់សកម្មភាពភ្លាមតែម្តង។ នេះជាកំហុសបច្ចេកទេសទេ។ គាត់ពុំមានបំណងណាមួយផ្ទុយពីហ្នឹងទេ...គាត់ពុំបានដឹងថា កន្លែងហ្នឹងជាតំបន់បេតិកភណ្ឌត្រូវការពារខ្ពស់ទើបគាត់បង្កើតឲ្យមានបញ្ហាអចេតនាហ្នឹងឡើង»។ លោកបន្តថាក្រុមការងារនគរបាលការពារបេតិកភណ្ឌកំពុងតែចាត់ការលើករណីនេះបន្តហើយលោកក៏មិនទាន់ដឹងពីការសម្រេចយ៉ាងណាដែរ។
លោក គាត ប៊ុនថាន ប្រធាននគរបាលការពារបេតិកភណ្ឌបានឲ្យដឹងដោយខ្លីថា ជនជាតិចិនទាំង ៤ នាក់នោះគឺជាក្រុមស្រាវជ្រាវហើយលោកសុំឲ្យទាក់ទងព័ត៌មានបន្ថែមទៅអាជ្ញាធរអប្សរាវិញ។
លោក ម៉ាន់ ឈឿនអនុប្រធាននគរបាលការពារបេតិកភណ្ឌបានឲ្យដឹងថា ជនជាតិចិនទាំងនោះធ្វើការក្រោមការទំនាក់ទំនងជាមួយនឹងមន្រ្តីសាធារណការ និងដឹកជញ្ជូន។
លោកអះអាងលោកបំពេញការងារនៅភ្នំពេញ ហេតុនេះលោកមិនបានដឹងព័ត៌មានលម្អិតនោះទេ។
ទោះយ៉ាងណាសារព័ត៌មានក្នុងស្រុកបានឲ្យដឹងថា ជនជាតិចិនទាំងនោះធ្វើការងារជាមួយនឹងក្រសួងសាធារណការ និងដឹកជញ្ជូនក្នុងការសិក្សាផ្លូវទឹក ពីទន្លេមេគង្គទៅទន្លេសាបដោយយកចំណុចខួងនោះជាគោល ដើម្បីធ្វើការវាស់កម្ពស់ទឹកទន្លេ។ ប៉ុន្តែលោក ចាន់ តារា អគ្គនាយកនៃអគ្គនាយកដ្ឋានដឹកជញ្ជូននៃក្រសួងសាធារណការ និងដឹកជញ្ជូនបានថ្លែងថាលោកមិនបានដឹងពីករណីនេះទេ។
ពាក់ព័ន្ធនឹងចិននេះដែរកាលពីថ្ងៃអង្គារនគរបាលការពារបេតិកភណ្ឌប្រចាំអង្គភាពតំបន់អង្គររួមជាមួយនឹងភ្នាក់ងារអភិវឌ្ឍន៍ទេសចរណ៍បានឃាត់ខ្លួនជនជាតិចិនម្នាក់ភ្លាមៗដោយសារតែបានជុះនោមដាក់ជញ្ជាំងប្រាសាទនៅចំណុចរួតទី ២។ ហ្វេសប៊ុកនគរបាលការពារបេតិកភណ្ឌសរសេរថាបុរសនោះជាភ្ញៀវទេសចរដែលមានឈ្មោះ Zhao Xiang Feng អាយុ ៦២ ឆ្នាំ។ នគរបាលបានធ្វើការអប់រំ និងធ្វើកិច្ចសន្យាមិនឲ្យគេធ្វើអំពើនោះទៀតហើយដោះលែងវិញ៕