.jpg)
ភ្នំពេញៈ ទីភ្នាក់ងារសហប្រតិបត្តិការអន្តរជាតិចិនសម្រាប់ការអភិវឌ្ឍន៍របស់សាធារណរដ្ឋប្រជាមានិតចិនកាលពីថ្ងៃពុធបានផ្តល់រថយន្តគ្លីនិកចល័តចំនួន ២០ គ្រឿងមកក្រសួងសុខាភិបាលកម្ពុជាដែលជាផ្នែកមួយនៃគម្រោងជំនួយឥតសំណងរបស់ប្រទេសចិនជាមួយក្រសួងសុខាភិបាល។ នេះបើយោងសេចក្តីជូនព័ត៌មានរបស់ក្រសួងសុខាភិបាល ។
បើយោងតាមសេចក្តីជូនព័ត៌មានរបស់ក្រសួងសុខាភិបាលពិធីប្រគល់រថយន្តបានធ្វើនៅទីស្តីការក្រសួងសុខាភិបាលដោយមានការចូលរួមពីលោក ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ដេង បូហ្គីង (Deng Boqing) អនុប្រធានទីភ្នាក់ងារសហប្រតិបត្តិការអន្តរជាតិចិនសម្រាប់ការអភិវឌ្ឍន៍ (China International Development Cooperation Agency)។
សេចក្ដីប្រកាសព័ត៌មានដដែលនេះបានឲ្យដឹងថា នេះជាសមិទ្ធផលថ្មីមួយទៀត បន្ទាប់ពីគម្រោងមួយចំនួនដែលបាននិងកំពុងអនុវត្តរួមមានរថយន្តគិលានសង្គ្រោះចំនួន ២០០ គ្រឿង ម៉ាស៊ីនអេកូសាស្ត្រចំនួន ២០០ គ្រឿង ការសាងសង់អគារមន្ទីរពេទ្យមិត្តភាពកម្ពុជា-ចិន ព្រះកុសុមៈ មន្ទីរពេទ្យបង្អែកខេត្តត្បូងឃ្មុំ និងរថយន្តគ្លីនិកចល័តដែលសរុបទាំង ២ លើកចំនួន ៤០ គ្រឿង។ រថយន្តគ្លីនិកចល័តទាំង ២០ គ្រឿងលើកទី ២ នេះនឹងប្រគល់ជូនមន្ទីរសុខាភិបាលរាជធានីភ្នំពេញ ខេត្តកំពង់ធំ ខេត្តកំពត ខេត្តកោះកុង ខេត្តក្រចេះ ខេត្តមណ្ឌលគិរី ខេត្តព្រះវិហារ ខេត្តព្រៃវែង ខេត្តពោធិ៍សាត់ ខេត្តរតនគីរី ខេត្តស្ទឹងត្រែង ខេត្តឧត្តរមានជ័យ ខេត្តកែប ខេត្តប៉ៃលិន និងខេត្តត្បូងឃ្មុំ។
លោកស្រី ស៊ីន ប្រធានមន្ទីរសុខាភិបាលខេត្តកំពង់ធំបាននិយាយថាជាធម្មតាគ្លីនិកចល័តគឺប្រើប្រាស់សម្រាប់ចុះទៅតំបន់ដាច់ស្រយាលឆ្ងាយដែលប្រជាពលរដ្ឋគាត់ពិបាកមកមណ្ឌលសុខភាព ពិបាកមកមន្ទីរពេទ្យ ដូច្នេះទៅជួយផ្តល់ឲ្យគាត់ព្រោះនៅឆ្ងាយ៕
