.jpg)
លោក ទៀ បាញ់ (ស្តាំ) ចាប់ដៃជាមួយលោក វៃ ហ្វេហេ (WEI FENGHE) ក្នុងជំនួបនៅថ្ងៃទី ១៧ ខែមិថុនា ឆ្នាំ ២០១៨។ រូបថត ហ្វេសប៊ុក
ភ្នំពេញៈប្រទេសចិន បានផ្តល់ជំនួយចំនួន ៦៤៥ លានយ័ន (ប្រមាណជាង ១០០ លានដុល្លារអាមេរិក) បន្ថែមទៀតដល់កម្ពុជា ដើម្បីយកមកប្រើប្រាស់ក្នុងវិស័យយោធា ដែលការប្រកាសផ្តល់ជំនួយនេះបានធ្វើឡើង ក្នុងជំនួបរវាង លោក ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ នៃព្រះរាជាណាចក្រកម្ពុជា ជាមួយនាយឧត្តមសេនីយ៍ វៃ ហ្វេហេ (WEI FENGHE) សមាជិកក្រុមប្រឹក្សារដ្ឋ និងជារដ្ឋមន្រ្តីក្រសួងការពារជាតិ នៃសាធារណរដ្ឋប្រជាមានិតចិន កាលពីថ្ងៃទី ១៧ ខែមិថុនា ឆ្នាំ ២០១៨។ នេះបើតាមលោកឈុំ សុជាតិ អ្នកនាំពាក្យក្រសួងការពារជាតិ។
លោក សុជាតិ បានសរសេរបង្ហោះនៅលើហ្វេសប៊ុករបស់លោកថា ភាគីទាំង ២ បានប្តេជ្ញាបន្តរឹតចំណងមិត្តភាពទៅវិញទៅមក ឱ្យកាន់តែខ្លាំងក្លាថែមទៀត ជាពិសេស គឺមិត្តចិន បានផ្តល់ជំនួយឥតសំណងបន្ថែមចំនួន ៦៤៥ លានយ័ន ដល់កម្ពុជាសម្រាប់យកមកប្រើប្រាស់ក្នុងវិស័យយោធា ទៅតាមតម្រូវការចាំបាច់។
លោក សុជាតិ បានគូសបញ្ជាក់ថា៖«ការផ្តល់ជំនួយបន្ថែមនេះ គឺជាទឹកចិត្តក៏ថ្លៃថ្លា របស់ភាគីចិន ដែលធ្វើឡើងចំឱកាសខួបលើកទី ៦០ នៃទំនាក់ទំនងការទូត រវាងប្រទេសទាំង២កម្ពុជា-ចិន ហើយដើម្បីអបអរសាទរដល់ខួបនៃទំនាក់ទំនងការទូតនេះ ភាគីទាំងពីរ ក៏បានរៀបចំពិព័រណ៍យោធា កម្ពុជា-ចិន រយៈពេល ៥ ថ្ងៃ ចាប់ពីថ្ងៃទី១៩ ដល់ថ្ងៃទី ២៤ ខែមិថុនា ឆ្នាំ ២០១៨ នៅមជ្ឈមណ្ឌលពិព័រណ៍ និងសន្និបាតកោះពេជ្រ»។
ពិព័រណ៍នេះធ្វើឡើង ដើម្បីបង្ហាញអំពីសមិទ្ធផលនានា នៃកិច្ចសហប្រតិបត្តិការយោធា របស់ប្រទេសទាំង២ផងដែរ។
បើតាមលោក ឈុំ សុជាតិ ក្រៅពីការផ្តល់ជំនួយ សម្រាប់វិស័យយោធា ក្នុងជំនួបខាងលើ ភាគីកម្ពុជា-ចិន ក៏នឹងសហការគ្នា បន្តទៀត ដើម្បី ធ្វើសមយុទ្ធនាគមាស នៅឆ្នាំ ២០១៩ ខាងមុខផងដែរ ខណៈដែលឆ្នាំ ២០១៨ ភាគីទាំងពីរ កម្ពុជា-ចិន បានរៀបចំរួចហើយ ដោយមានទ្រង់ទ្រាយធំជាងមុន រយៈពេល ១៣ ថ្ងៃ ចាប់ពីថ្ងៃទី ១៧ ដល់ថ្ងៃទី ២៩ ខែមីនា ឆ្នាំ ២០១៨ នៅតំបន់ភ្នំធំម្រះព្រៅ ក្នុងភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ។
ការប្រកាសផ្តល់ជំនួយពីចិននេះ ត្រូវបានគេកត់សម្គាល់ឃើញថា ធ្វើឡើងបន្ទាប់ពីសហរដ្ឋអាមេរិក បានប្រកាសដាក់ទណ្ឌកម្ម លើលោក ហ៊ីង ប៊ុនហៀង អគ្គមេបញ្ជាការរង នៃកងយុទ្ធពលខេមរភូមិន្ទ និងជាមេបញ្ជាការកងអង្គរក្សរបស់ លោកនាយករដ្ឋមន្ត្រី ហ៊ុន សែន ដោយចោទប្រកាន់ថា មន្ត្រីយោធាជាន់ខ្ពស់រូបនេះ មានជាប់ពាក់ព័ន្ធ នឹងការរំលោភសិទ្ធិមនុស្សជាច្រើនករណី ជាការចោទប្រកាន់ ដែលទាំងលោក ប៊ុនហៀង ក្រសួងការពារជាតិ និងស្ថាប័នរដ្ឋជាច្រើន បានបដិសេធ ហើយបានធ្វើការថ្កោលទោសតបវិញយ៉ាងខ្លាំងទៅលើសហរដ្ឋអាមេរិក៕
