.jpg)
លោក លី ធុជ (ស្តាំ) និងលោក Wang Wentien។ រូបថត អាជ្ញាធរមីន
ភ្នំពេញៈ សាធារណរដ្ឋប្រជាមានិតចិនតាមរយៈស្ថានទូតចិនប្រចាំនៅកម្ពុជាកាលពីម្សិលមិញបានផ្ដល់នូវសម្ភារជាជំនួយមនុស្សធម៌លើវិស័យសកម្មភាពមីនដល់អាជ្ញាធរមីនប្រមាណ ១ លានដុល្លារអាមេរិក ខណៈកម្ពុជាបានដាក់ផែនការយុទ្ធសាស្ត្រជាតិ គ្មានមីននៅឆ្នាំ ២០២៥។
ការផ្ដល់ជំនួយមនុស្សធម៌នេះធ្វើឡើងក្រោមអធិបតីភាពលោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន និងលោក Wang Wentian ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋប្រជាមានិតចិនប្រចាំនៅកម្ពុជា។
បើតាមសេចក្ដីប្រកាសព័ត៌មានរបស់អាជ្ញាធរមីន ជំនួយឥតសំណង មានទំហំទឹកប្រាក់ប្រមាណ ១ លានដុល្លារនេះ រួមមាន រថយន្ត Pick Up ចំនួន ៨ គ្រឿង ឧបករណ៍រាវមីន ១៣០ គ្រឿង ប្រអប់សម្ភារ ១០០ ឈុត ប្រអប់សម្ភារបំផ្ទុះគ្រាប់ (EOD) ២០ ឈុត សម្លៀកបំពាក់ការពារចំនួន ១០ កំប្លេ មួកការពារចំនួន ១០, ដ្រូន (UAV) ចំនួន ៤ គ្រឿង ឯកសណ្ឋាន ស្បែកជើង និងមួក ៥០០ កំប្លេ និងតង់ចំនួន ៥០០។
លោក លី ធុជ បានថ្លែងអំណរគុណ និងវាយតម្លៃខ្ពស់ចំពោះរដ្ឋាភិបាល និងប្រជាជនចិនដែលជានិច្ចកាលតែងតែយកចិត្តទុកដាក់ និងគាំទ្រជួយដល់ការអភិវឌ្ឍនៅកម្ពុជាគ្រប់កាលៈទេសៈក្នុងនោះរួមមានទាំងការផ្តល់ជំនួយសម្រាប់វិស័យសកម្មភាពមីនដើម្បីមនុស្សធម៌ ទាំងសម្ភារបច្ចេកទេសហិរញ្ញវត្ថុ និងបណ្តុះបណ្តាលធនធានមនុស្ស។ «កម្ពុជានៅតែត្រូវការជាចាំបាច់នូវជំនួយដ៏សប្បុរសរបស់មហាមិត្តចិនសម្រាប់ការងារបោសសម្អាតមីន»។
បើតាមលោក លី ធុជ តាមរយៈជំនួយមនុស្សធម៌វិស័យសកម្មភាពមីនពីមិត្តចិនជាបន្តបន្ទាប់ រាជរដ្ឋាភិបាលកម្ពុជាមានជំនឿយ៉ាងមុតមាំថា នឹងទទួលបានជោគជ័យក្នុងការអនុវត្តនូវផែនការយុទ្ធសាស្ត្រជាតិសកម្មភាពមីន ២០១៨-២០២៥ គឺឆ្ពោះទៅរកកម្ពុជាមួយដែលគ្មានមីនឆ្នាំ ២០២៥ ជាពិសេសចូលរួមដល់ការជួយសង្គ្រោះជីវិតមនុស្ស ចូលរួមកាត់បន្ថយភាពក្រីក្រ និងការកសាងជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។
លោក Wang Wentian បានថ្លែងក្នុងពិធីផ្ដល់ជំនួយនេះថា សាធារណរដ្ឋប្រជាមានិតចិន រីករាយ និងពេញចិត្តក្នុងការចូលរួមជាមួយរាជរដ្ឋាភិបាលកម្ពុជាតាមរយៈអាជ្ញាធរមីន ដោយបានគាំទ្រដល់វិស័យបោសសម្អាតមីន។ ប្រទេសចិននឹងបន្តគាំទ្រទាំងសម្ភារ ថវិកា និងការបណ្តុះបណ្តាលធនធានមនុស្សដល់អាជ្ញាធរមីន ដើម្បីឱ្យកម្ពុជាអាចសម្រេចនូវគោលដៅរបស់ខ្លួនគ្មានមីនឆ្នាំ ២០២៥។
លោកឯកអគ្គរដ្ឋទូតថ្លែងថា៖ «ការងារបោសសម្អាតមីនពិតជាមានសារៈសំខាន់ណាស់សម្រាប់គាំទ្រដល់ការអភិវឌ្ឍ និងជួយសង្គ្រោះជីវិតមនុស្ស។ តាមរយៈស្ថានទូតចិនប្រចាំនៅកម្ពុជានឹងជួយជំរុញដល់រដ្ឋាភិបាលប្រទេសចិនឱ្យបន្តការគាំទ្រ និងពិចារណារាល់សំណើសុំរបស់អាជ្ញាធរមីន»។
បើតាមអាជ្ញាធរមីនក្រៅពីចិននៅមានការគាំទ្រពីប្រទេសម្ចាស់ជំនួយដទៃទៀតក្នុងសកម្មភាពបោសសម្អាតមីនក្នុងនោះរួមមាន សហរដ្ឋអាមេរិក អូស្ត្រាលី អង់គ្លេស ជប៉ុន ន័រវែស កាណាដា អាល្លឺម៉ង់ ស្វ៊ីស នូវែលសេឡង់ សាធារណរដ្ឋកូរ៉េ អៀរឡង់ UNDP និង UNICEF ព្រមទាំងមូលនិធិអង្គការសង្គមស៊ីវិល និងសប្បុរសជននៅកម្ពុជាផងដែរ។
ចាប់តាំងពីឆ្នាំ ១៩៩២ ដល់ត្រឹមខែធ្នូឆ្នាំ ២០២០ កម្ពុជាបានបោសសម្អាតផ្ទៃដីចំនួន ២ ១៣៨ គីឡូម៉ែត្រក្រឡា បំផ្លាញចោលគ្រាប់មីនប្រឆាំងមនុស្សជាង ១ លានគ្រាប់ មីនប្រឆាំងរថក្រោះជាង ២៥ ម៉ឺនគ្រាប់ និងសំណល់ជាតិផ្ទុះរាប់បញ្ចូលទាំងគ្រាប់បែកចង្កោមជាង ២ លាន ៨ សែនគ្រាប់៕
