លោក សាយ សំអាល់ (ស្តាំ) និងលោក Wang Wentian ក្នុងពិធីពីថ្ងៃទី ២១ ធ្នូ។ រូប ក្រសួងបរិស្ថាន
ភ្នំពេញៈ ក្រសួងអេកូឡូស៊ី និងបរិស្ថាននៃប្រទេសចិន តាមរយៈក្រុមហ៊ុន Shenzhen Spark Co.,Ltd បានផ្តល់ជូនក្រសួងបរិស្ថាននូវសម្ភារ និងបរិក្ខារកាត់បន្ថយការបញ្ចេញកាបូនមួយចំនួន សរុបជាទឹកប្រាក់ប្រមាណ ៣ លានដុល្លារអាមេរិក ដែលត្រូវបានឯកអគ្គរដ្ឋទូតចិនប្រចាំកម្ពុជា លោក Wang Wentian ប្រគល់ជូនលោក សាយ សំអាល់ រដ្ឋមន្ត្រីក្រសួងបរិស្ថានកាលពីថ្ងៃទី ២១ ធ្នូ។
ក្រសួងបរិស្ថានបានឱ្យដឹងថា តាមរយៈអនុស្សរណៈកាត់បន្ថយកាបូន ក្រសួងអេកូឡូស៊ី និងបរិស្ថានចិនតាមរយៈក្រុមហ៊ុន Shenzhen Spark បានផ្តល់ឱ្យក្រសួងបរិស្ថានកម្ពុជា នូវសម្ភារមួយចំនួនរួមមាន អំពូលបំភ្លឺផ្លូវចំនួន ២ ៨០០ ដើម សូឡា PV ចំនួន ២០០ គ្រឿង ម៉ូតូអាគុយចំនួន ២០០ គ្រឿង និងឧបករណ៍សម្រាប់មន្ទីរពិសោធន៍ត្រួតពិនិត្យគុណភាពខ្យល់ចំនួន ២០ សម្រាប់។
ជំនួយជាសម្ភារ និងបរិក្ខារកាត់បន្ថយការបញ្ចេញកាបូនទាំងនេះបានផ្តល់ជូនមកប្រទេសកម្ពុជា តាមរយៈអនុស្សរណៈនៃការយោគយល់គ្នាស្តីពីកិច្ចសហប្រតិបត្តិការគម្រោងសាកល្បងបញ្ចេញកាបូនតិច នៅខេត្តព្រះសីហនុដែលត្រូវបានចុះហត្ថលេខាកាលពីឆ្នាំកន្លងទៅ។
តាមរយៈកិច្ចសហប្រតិបត្តិការនេះ ក្រសួងបរិស្ថានបានលើកទឹកចិត្តដល់តួអង្គពាក់ព័ន្ធទាំងអស់ឱ្យចូលរួមសកម្មភាពលើកកម្ពស់ការយល់ដឹងអំពីបរិស្ថាន ពង្រឹងសមត្ថភាពបង្ការ ទប់ស្កាត់ និងចាត់វិធានការកាត់បន្ថយការប្រែប្រួលអាកាសធាតុនៅប្រទេសកម្ពុជា ដើម្បីនិរន្តរភាពទីក្រុងស្អាត មានមេត្រីភាពបរិស្ថានទីក្រុងបៃតងដើម្បីភាពសុខដុមរមនាបរិស្ថាន និងការរស់នៅដោយចីរភាព។
លោក សាយ សំអាល់ បានលើកឡើងក្នុងពិធីប្រគល់ទទួលនៅទីស្តីការក្រសួងដោយលោកបានថ្លែងអំណរគុណចំពោះក្រសួងអេកូឡូស៊ី និងបរិស្ថាននៃប្រទេសចិនដែលបានផ្តល់ជំនួយសម្ភារនេះ។ លោកថ្លែងថា៖ «សម្ភារបំភ្លឺទាំងនេះនឹងត្រូវដាក់ឱ្យប្រើនៅតាមទីសាធារណៈក្នុងខេត្តព្រះសីហនុ ជាពិសេសបំភ្លឺនៅតាមសាលារៀននានាក្នុងខេត្តព្រះសីហនុ ហើយក៏ដើម្បីអនុញ្ញាតឱ្យសិស្សានុសិស្សបានសិក្សាពីសម្ភារប្រើប្រាស់ថាមពលព្រះអាទិត្យ ក៏ដូចជាជួយបំភ្លឺកន្លែងហាត់កីឡានានាផងដែរ»។
លោក សាយ សំអាល់ បន្តថា គោលដៅសំខាន់គឺធ្វើឱ្យឪពុកម្តាយសិស្ស វិលត្រឡប់មកសាលារៀន ដើម្បីហាត់កីឡា និងមានឱកាសអាចជជែកពិភាក្សាជាមួយលោកគ្រូអ្នកគ្រូ។ ចំណែកម៉ូតូអាគុយ និងឧបករណ៍សម្រាប់ត្រួតពិនិត្យគុណភាពខ្យល់ត្រូវបានយកមកប្រើប្រាស់នៅទីស្តីការក្រសួងបរិស្ថាន នៅមន្ទីរពិសោធន៍ និងតាមទីតាំងត្រួតពិនិត្យតាមដានរបស់ក្រសួងបរិស្ថាន។
ជាមួយគ្នានោះដែរ លោក Wang Wentian ឯកអគ្គរដ្ឋទូតចិនប្រចាំកម្ពុជាក៏បានថ្លែងថា ជំនួយជាសម្ភារទាំងនេះគឺជាការរឹតចំណងមិត្តភាពរវាងប្រទេសទាំង ២ ហើយនឹងជួយប្រទេសកម្ពុជាលើផ្នែកវិស័យបរិស្ថានឱ្យកាន់តែល្អប្រសើរឡើងផងដែរ។
ចាប់តាំងពីឆ្នាំ ២០១៥ ដល់ឆ្នាំ ២០២០ នេះក្រសួងបរិស្ថានសម្រេចបាននូវអនុស្សរណៈ និងកិច្ចព្រមព្រៀងជាមួយស្ថាប័នសំខាន់ៗនៃសាធារណរដ្ឋប្រជាមានិតចិនជាច្រើនរួមមានកិច្ចសហប្រតិបត្តិការគាំពារបរិស្ថានកម្ពុជា-ចិន, ការបង្កើតការិយាល័យរៀបចំមជ្ឈមណ្ឌលកិច្ចសហប្រតិបត្តិការបរិស្ថានកម្ពុជា-ចិន, ការផ្ដល់ជំនួយឧបករណ៍ប្រព្រឹត្តកម្មទឹកកខ្វក់, កិច្ចសហប្រតិបត្តិការសាកល្បងក្នុងការអភិរក្សជីវចម្រុះ និងប្រព័ន្ធអេកូឡូស៊ី, ការរៀបចំមន្ទីរពិសោធន៍សហប្រតិបត្ដិការកម្ពុជា-ចិន, ការរៀបចំតំបន់បញ្ចេញកាបូនតិច និងការផ្ដល់ជំនួយស្ថានីយតាមដានគុណភាពទឹកស្វ័យប្រវត្តិជាដើម៕
.jpg)
