.jpg)
ឧបនាយករដ្ឋមន្ត្រី ទៀ បាញ់ និងមន្ត្រីយោធាជាន់ខ្ពស់ពេលត្រឡប់មកពីចិនថ្មីៗនេះ។ រូបថត ក្រសួងការពារជាតិ
ភ្នំពេញៈ មន្ត្រីជាន់ខ្ពស់ក្រសួងការពារជាតិកម្ពុជាបានថ្លែងថា រដ្ឋាភិបាលចិននឹងបន្តផ្ដល់ជំនួយឥតសំណងជាទឹកប្រាក់ចំនួន ៦០០ លានយន់ ដែលស្មើនឹងចំនួនប្រមាណ ៨៤ លានដុល្លារអាមេរិក ដល់កម្ពុជាដើម្បីពង្រឹងវិស័យយោធា ជាអ្វីដែលលោកហៅជំនួយរបស់ចិនថា មានលក្ខណៈគ្រប់ជ្រុងជ្រោយដែលជាការឆ្លើយតបនឹងការខ្វះខាតរបស់ប្រទេស កម្ពុជា។
លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិកម្ពុជាបានលើកឡើងពីប្រាក់ជំនួយនេះកាលពីរសៀលថ្ងៃពុធទី ២៣ ខែតុលា នៅចំពោះមុខក្រុមអ្នកសារព័ត៌មាននៅឯព្រលានយន្តហោះអន្តរជាតិភ្នំពេញខណៈដែលលោកទើបតែវិលត្រឡប់មកពីទស្សនកិច្ចនៅប្រទេស ចិន វិញ។ លោកបានចាត់ទុកប្រាក់ជំនួយឥតសំណងរបស់ចិននេះថា ជាការបញ្ជាក់ឲ្យឃើញពីការពង្រឹងកិច្ចសហប្រតិបត្តិការផ្នែកយោធារវាងកម្ពុជា-ចិន ដែលប្រាក់ជំនួយនឹងប្រើប្រាស់សម្រាប់បង្កើនសមត្ថភាពក្នុងវិស័យយោធាកម្ពុជា។
លោកបានបញ្ជាក់ថា៖ «យើងមានចុះកិច្ចព្រមព្រៀងមួយដែលមានសារៈសំខាន់គឺចិននឹងបង្កើននូវជំនួយឥតសំណងសម្រាប់កម្ពុជាយើងខាងវិស័យយោធាដែលមានទឹកប្រាក់ក្នុងចំនួន ៦០០ លានយន់នេះ ហើយយើងនឹងយកមកចាត់ចែងបង្កើននូវសមត្ថភាពវិស័យយោធារបស់យើងតែម្តង។ យើងបន្តកិច្ចសហប្រតិបត្តិការរបស់យើងដែលយើងមានរួចស្រេចហើយ ហើយយើងគ្មានងាករេទេ។ យើងបានបញ្ជាក់ហើយបញ្ជាក់ទៀតថា យើងបន្តកិច្ចសហប្រតិបត្តិការទាំងឡាយដែលមាន ហើយនឹងពង្រីកកិច្ចសហប្រតិបត្តិការឲ្យកាន់តែរឹងមាំថែមទៀត»។
កាលពីម្សិលមិញលោកឧបនាយករដ្ឋមន្ត្រី ទៀ បាញ់ បានបញ្ជាក់បន្ថែមប្រាប់កាសែតភ្នំពេញប៉ុស្តិ៍ថា ប្រទេស ចិន បានបន្តផ្តល់ជំនួយដល់កម្ពុជាជាបន្តបន្ទាប់ដើម្បីពង្រឹងវិស័យការពារកម្ពុជាហើយក្រសួងការពារជាតិបានប្រើប្រាស់ថវិកាទាំងនេះសម្រាប់បំពេញដល់ការខ្វះខាតដែលក្នុងនោះមានជួយបង្កើនសម្ភារសម្រាប់កងទ័ព ជួយពង្រឹងការហ្វឹកហ្វឺន ការរៀបចំហេដ្ឋារចនាសម្ព័ន្ធកសាងសាលារៀន និងមន្ទីរពេទ្យជាដើម។
លោកបានបញ្ជាក់ទៀតថា៖ «យើងពង្រឹងគ្រប់ផ្នែក និងតម្រូវការដែលយើងត្រូវការ ធ្វើយ៉ាងម៉េចលើកកម្ពស់សមត្ថភាពវិស័យការពារជាតិរបស់យើងឲ្យវាឡើងបាន ១ កម្រិតទៀត។ យើងមានការខ្វះខាត និងមានតម្រូវការច្រើនដែរ ដូច្នេះហើយវាមិនមែនតែសម្ភារមួយមុខនោះទេ ទាំងការហ្វឹកហ្វឺន ការរៀបចំហេដ្ឋារចនាសម្ព័ន្ធ កសាងសាលារៀន មន្ទីរពេទ្យ បំពាក់សម្ភារនៅតាមមណ្ឌលសុខភាព...យើងប្រើប្រាស់តាមតម្រូវការរបស់យើងដែលនៅខ្សត់ខ្សោយ»។
ការផ្តល់ជំនួយនេះបានធ្វើឡើងដោយមានពិធីចុះហត្ថលេខារវាងរដ្ឋមន្ត្រីការពារជាតិចិន-កម្ពុជា នៅក្នុងអំឡុងពេលដែលលោក ទៀ បាញ់ និងមន្ត្រីយោធាជាន់ខ្ពស់របស់លោកមួយក្រុមមាន លោក ណឹម សុវត្ថិ ទីប្រឹក្សាពិសេស និងជាអគ្គនាយកនៃអគ្គនាយកដ្ឋាននយោបាយ និងកិច្ចការបរទេស លោក ចៅ ភិរុណ អគ្គនាយកនៃអគ្គនាយកដ្ឋានសម្ភារបច្ចេកទេស និងលោក ហ៊ុន ម៉ានិត អគ្គនាយកនៃអគ្គនាយកដ្ឋានស្រាវជ្រាវចារកិច្ចក្រសួងការពារជាតិ។
ជាមួយគ្នានេះដែររដ្ឋមន្ត្រីក្រសួងការពារជាតិលោក ទៀ បាញ់ ក៏បានសម្តែងការអរគុណចំពោះប្រទេសចិនផងដែរ ដែលបានផ្តល់ជំនួយដល់កម្ពុជាជាបន្តបន្ទាប់ និងបានអះអាងថា វិស័យការពារជាតិកម្ពុជាបើកទ្វារចំហជាមួយប្រទេសដទៃទៀតដែលចង់ពង្រឹងទំនាក់ទំនង និងកិច្ចសហប្រតិបត្តិការជាមួយកម្ពុជា។
ពាក់ព័ន្ធនឹងការផ្អាកការធ្វើសមយុទ្ធប្រចាំឆ្នាំរវាងកងទ័ពកម្ពុជាជាមួយកងទ័ពសហរដ្ឋអាមេរិក និងទំនាក់ទំនងក្នុងវិស័យយោធាកម្ពុជា និងអាមេរិកមានការធ្លាក់ចុះកន្លងមកលោកឧបនាយករដ្ឋមន្ត្រី ទៀបាញ់ បានពន្យល់ថា វាពិបាកនឹងអនុវត្តនៅពេលដែលមានជំនួយខ្លះបានភ្ជាប់ជាមួយនឹងលក្ខខណ្ឌនោះ។
លោកបានបញ្ជាក់ថា៖ «គេ (ចិន) មានសមានចិត្តជួយដោយសុទ្ធចិត្ត ហើយគ្រប់ជ្រុងជ្រោយចំពោះការខ្វះខាតរបស់យើងទើបយើងទៅរួច។ បើគេ (អាមេរិក) ជួយមួយផ្នែក ហើយគេទាមទារអ្វីផ្សេង វាពិបាកដែលធ្វើឲ្យយើងធ្វើតាមគេបាន។ វាធម្មតាទេកិច្ចសហប្រតិបតិ្តការពេលដែលមានការឯកភាពគ្នាទាំងសងខាង ហើយយើងត្រូវតែអនុវត្តតាមកិច្ចព្រមព្រៀងនេះ តែបើកិច្ចសហប្រតិបត្តិការគ្រាន់តែមកលឹបល ហើយទាមទារឲ្យកម្ពុជាធ្វើនេះ ឬធ្វើនោះ យើងធ្វើមិនបានទេដូច្នេះហើយទើបយើងត្រូវផ្អាកធ្វើខ្លះទៅ»។
អតីតមន្ត្រីជាន់ខ្ពស់នៃអតីតគណបក្សសង្គ្រោះជាតិលោក អ៊ូ ច័ន្ទរ័ត្ន បានចាត់ទុកជំនួយចិននេះថានឹងជួយពង្រឹងទំនាក់ទំនងរវាងប្រទេសទាំង ២ ហើយថា ការបន្តផ្តល់ជំនួយដល់កម្ពុជារបស់ចិនដោយសារតែប្រទេស ចិន ត្រូវការកម្ពុជាក្នុងការពង្រឹង និងពង្រីកភូមិសាស្ត្រនយោបាយរបស់ខ្លួន។
លោកបានបញ្ជាក់ថា៖ «ដោយសារតែការប្រកួតប្រជែងរវាងប្រទេសមហាអំណាចធ្វើឲ្យប្រទេស ចិន បន្តជួយប្រទេស កម្ពុជា និងបន្តកិច្ចសហប្រតិបត្តិការ។ វាជារឿងល្អសម្រាប់ប្រទេស កម្ពុជា»៕
