.jpg)
ជនជាតិចិនដែលជាប់ពាក់ព័ន្ធនឹងបទល្មើសជំរិតទារប្រាក់តាមប្រព័ន្ធអ៊ីនធឺណិតចំនួន ១៥០ នាក់ត្រូវបានបញ្ជូនចេញពីកម្ពុជាម្សិលមិញ។ ហេង ជីវ័ន
ភ្នំពេញៈ មន្ត្រីនគរបាលអន្តោប្រវេសន៍បាននិយាយថា ជនជាតិចិនដែលជាប់ពាក់ព័ន្ធនឹងបទល្មើសជំរិតទារប្រាក់តាមប្រព័ន្ធអ៊ីនធឺណិត (VOIP) ចំនួន ១៥០ នាក់ ក្នុងនោះមានស្រីចំនួន ១២ នាក់ ដែលនគរបាលជាតិបង្ក្រាបកាលពីអំឡុងចុងខែកក្កដា និងដើមខែសីហា ត្រូវបានបញ្ជូនចេញពីកម្ពុជាត្រឡប់ទៅប្រទេស ចិន វិញហើយនៅព្រឹកថ្ងៃទី ២៨ សីហានេះ។
លោក គៀត ចន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍ប្រាប់ភ្នំពេញប៉ុស្ដិ៍ពីម្សិលមិញថា ពលរដ្ឋចិនចំនួន ១៥០ នាក់ ដែលជាប់ពាក់ព័ន្ធបទល្មើសជំរិតទារប្រាក់ទាំងនេះត្រូវបានប៉ូលិសចិនបញ្ជូនតាមយន្តហោះ ២ គ្រឿង ដឹកចេញពីអាកាសយានដ្ឋានអន្តរជាតិភ្នំពេញពីព្រឹកថ្ងៃពុធម្សិលមិញ។
លោកបញ្ជាក់ថា៖ «ពួកហ្នឹងប្រព្រឹត្តបទល្មើសទាក់ទងនឹងប្រទេសចិន ហើយចិនសុំឱ្យយើងតាមស្រាវជ្រាវចាប់»។
លោក អាត់ ប៊ុននី មន្ត្រីនាំពាក្យអគ្គនាយកដ្ឋានអន្តោប្រវេសន៍បានឱ្យដឹងដែរថា ជនជាតិចិនទាំងនេះត្រូវបានខាងអគ្គស្នងការនគរបាលជាតិបង្ក្រាបនៅខេត្តព្រះសីហនុ និងខេត្តកំពង់ស្ពឺ ហើយបានប្រគល់ឱ្យអគ្គនាយកដ្ឋានអន្តោប្រវេសន៍រៀបចំនីតិវិធីដើម្បីឱ្យក្រសួងសន្ដិសុខសាធារណៈចិនមកយកត្រឡប់ទៅប្រទេសដើមវិញ។
លោក ប៊ុននី និយាយថា៖ «នៅកំពង់ស្ពឺបង្ក្រាបបាន ១៨ នាក់ ហើយខេត្តព្រះសីហនុបង្ក្រាបបាន ១៣២ នាក់»។
ជនជាតិចិនដែលត្រូវបានបញ្ជូនទៅប្រទេសកំណើតវិញពីម្សិលមិញ។ ហេង ជីវ័ន
កាលពីថ្ងៃទី ១៧ ខែ កក្កដា ឆ្នាំ ២០១៩ នេះកម្លាំងនគរបាលខេត្តកំពង់ស្ពឺបានចូលឆែកឆេរឃ្លាំងប្រក់ស័ង្កសីមួយកន្លែងស្ថិតក្នុងភូមិចា ឃុំស្វាយចចឹប ស្រុកបសេដ្ឋ និងរកឃើញជនជាតិចិនចំនួន ១៨ នាក់ បានលាក់ខ្លួនប្រព្រឹត្តបទល្មើសជំរិតទារប្រាក់តាមប្រព័ន្ធអ៊ីនធឺណិត។ ក្នុងប្រតិបត្តិការបង្ក្រាបនេះ សមត្ថកិច្ចបានរឹបអូសសម្ភារបច្ចេកទេសសម្រាប់ប្រើជាមធ្យោបាយប្រព្រឹត្តបទល្មើសជាច្រើនប្រភេទ ដូចជាកុំព្យូទ័រ ទូរស័ព្ទដៃ និងទូរស័ព្ទដាក់លើតុ ម៉ាស៊ីនភ្លើង អង់តែនទាញសេវាទូរស័ព្ទ និងឯកសារផ្ទេរប្រាក់តាមធនាគារជាដើម។
លុះមកដល់ថ្ងៃទី ១៤ ខែ សីហា មន្ត្រីជំនាញនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែនសហការជាមួយនគរបាលនៅស្នងការដ្ឋានខេត្តព្រះសីហនុក៏បានបើកប្រតិបត្តិការបង្ក្រាបចំនួន ២ ទីតាំងផ្សេងគ្នា ស្ថិតក្នុងក្រុងព្រះសីហនុ និងបានរកឃើញជនជាតិចិនចំនួន ១៣២ នាក់បន្ថែមទៀត ជាប់ពាក់ព័ន្ធនឹងបទល្មើសជំរិតទារប្រាក់ដូចគ្នា។ ក្រោយការបង្ក្រាបបានក្រុមជនជាតិចិនទាំងនោះត្រូវបានបញ្ជូនមកកាន់អគ្គស្នងការនគរបាលជាតិនៅរាជធានីភ្នំពេញ។
លោក អាត់ ប៊ុននី បន្ថែមថា អាជ្ញាធរកម្ពុជានឹងនៅតែបន្តស្វែងរកជនជាតិចិនផ្សេងទៀតដែលសង្ស័យពាក់ព័ន្ធនឹងបទល្មើសជំរិតទារប្រាក់តាមប្រព័ន្ធអ៊ីនធឺណិតនេះ។
កាលពីថ្ងៃទី ១៨ ខែ សីហា រាជរដ្ឋាភិបាលបានចេញសារាចរណ៍មួយដើម្បីបញ្ឈប់ការផ្ដល់អាជ្ញាប័ណ្ណសម្រាប់អាជីវកម្មបើកល្បែងភ្នាល់តាមម៉ាស៊ីនអេឡិចត្រូនិក និងតាមអ៊ីនធឺណិត។ រាជរដ្ឋាភិបាលយល់ឃើញថា អាជីវកម្មទាំងនោះបានផ្ដល់ឱកាសឱ្យជនបរទេសលាក់ខ្លួនធ្វើសកម្មភាពបទល្មើសជំរិតទារប្រាក់ពីជនរងគ្រោះទាំងការចាប់ជំរិតឃុំឃាំង និងតាមប្រព័ន្ធអ៊ីនធឺណិត។
ចាប់តាំងពីឆ្នាំ ២០១៨ មកមានជនជាតិចិនរាប់រយនាក់ត្រូវបានអាជ្ញាធរបណ្ដេញចេញពីកម្ពុជាជាបន្តបន្ទាប់ពាក់ព័ន្ធបទល្មើសជំរិតទារប្រាក់តាមប្រព័ន្ធអ៊ីនធឺណិត។ បើតាមរបាយការណ៍មួយរបស់អគ្គនាយកដ្ឋាននគរបាលអន្តោប្រវេសន៍កាលពីខែ មីនា ឆ្នាំ ២០១៩ បានបញ្ជាក់ថា ជនបរទេសចំនួន ២៧ សញ្ជាតិ ក៏ត្រូវបានបណ្ដេញពីកម្ពុជាផងដែរ ដោយសារប្រព្រឹត្តបទល្មើសផ្សេងៗដូចជាលួចស្នាក់នៅគ្មានលិខិតឆ្លងដែន បទល្មើសសេដ្ឋកិច្ចក្នុងប្រទេសចិន ប្រព្រឹត្តបទឧក្រិដ្ឋក្នុងប្រទេសចិន ឆបោក សញ្ចារកម្ម ការកេងចំណេញផ្លូវភេទលើស្រីវ័យក្មេង និងបទល្មើស VOIP ជាដើម៕
