ព្រះសីហនុៈ កម្លាំងកងរាជអាវុធហត្ថខេត្តព្រះសីហនុកាលពីម្សិលមិញបានបង្ក្រាប និងចាប់បុរសចិនបាន ២ នាក់ ហើយរំដោះបានបុរសជាជនជាតិចិន ៤ នាក់ទៀត ដែលសមត្ថកិច្ចសង្ស័យថាជាករណីបង្ខាំងមនុស្សជំរិតទារប្រាក់ ប្រព្រឹត្តនៅភូមិ-សង្កាត់ ១ ក្រុង-ខេត្តព្រះសីហនុ។
លោក ហេង វុទ្ធី នាយសេនាធិការនៃបញ្ជាការដ្ឋានកងរាជអាវុធហត្ថខេត្តព្រះសីហនុប្រាប់ពីម្សិលមិញថា កម្លាំងកងរាជអាវុធហត្ថខេត្តព្រះសីហនុបានចុះប្រតិបត្តិការបង្ក្រាបបទល្មើសមួយករណីដែលសង្ស័យថា ជាអំពើជំរិតទារប្រាក់ដែលបទល្មើសនេះកើតឡើងនៅចំណុច ភូមិ-សង្កាត់ខាងលើនោះ។
លោកប្រាប់ឲ្យដឹងថា ផ្តើមឲ្យមានការបង្ក្រាបបទល្មើសនេះគឺដំបូងឡើយសមត្ថកិច្ចរបស់លោកបានទទួលសេចក្តីរាយការណ៍ពីប្រជាពលរដ្ឋដែលរស់នៅក្បែរទីតាំងកើតហេតុនោះដែលពលរដ្ឋបានរាយការណ៍ប្រាប់សមត្ថកិច្ចរបស់លោកថា នៅក្នុងទីតាំងភូមិសាស្ត្រដែលបង្កបទល្មើសខាងលើគឺជាផ្ទះល្វែងថ្ម ២ ជាន់ និងមានជនជាតិចិនមួយក្រុមបានចាប់ជនជាតិចិនដូចគ្នាបង្ខាំងនៅក្នុងផ្ទះ។
លោក ហេង ប៊ុនទី មេបញ្ជាការ កងរាជអាវុធហត្ថខេត្តព្រះសីហនុបានដឹកនាំបញ្ជាកម្លាំងជំនាញនៃកងរាជអាវុធហត្ថខេត្តសរុបចំនួន ៥៥ នាក់ សហការជាមួយកម្លាំងតំបន់ប្រតិបត្តិការសឹករងខេត្ត និងដោយមានការសម្របសម្រួលផ្លូវច្បាប់ពីលោកព្រះរាជអាជ្ញារងអមសាលាដំបូងខេត្តព្រះសីហនុផងដែរ។ កម្លាំងអាវុធហត្ថបានធ្វើការឡោមព័ទ្ធជុំវិញផ្ទះកើតហេតុនៅវេលាម៉ោងជាង ៨ ព្រឹកថ្ងៃទី ១៣ ខែវិច្ឆិកា និងបានចូលទៅក្នុងផ្ទះនោះដោយឆែកឆេររកឃើញជនរងគ្រោះចំនួន ៤ នាក់ផង។
លោកបន្តថា ក្នុងប្រតិបត្តិការនោះសមត្ថកិច្ចរបស់លោកបានធ្វើការចាប់ខ្លួនបុរសចិន ២ នាក់ ជាជនសង្ស័យហើយ ក្រោយចាប់ខ្លួនក្រុមជនសង្ស័យមកសមត្ថកិច្ចបានពិនិត្យលើខ្លួនប្រាណជនរងគ្រោះទាំង ៤ នាក់ ឃើញមានស្នាមវាយឲ្យរបួសក្បាលបែកនៅលើផ្ទៃមុខមានស្នាមជាំខៀវភ្នែកជនរងគ្រោះត្រូវក្រុមជនសង្ស័យវាយត្រូវខ្លួន និងដៃ ជើង។
លោកប្រាប់ថា៖ «រឿងនេះក្រុមជនសង្ស័យបានទទួលប្រាក់ពីក្រុមគ្រួសារជនរងគ្រោះបានខ្លះៗហើយដោយវេរលុយឲ្យពួកគេ មុនពេលសមត្ថកិច្ចខ្ញុំធ្វើការបង្ក្រាប។ ប៉ុន្តែដោយមិនទាន់គ្រប់ចំនួនទើបក្រុមជនសង្ស័យបង្ខាំងជនរងគ្រោះបន្តទៀត»។
លោក ហេង វុទ្ធី បញ្ជាក់ប្រាប់ថាក្រោយចាប់ខ្លួនក្រុមជនសង្ស័យក៏ដូចជាក្រុមជនរងគ្រោះមក សមត្ថកិច្ចបន្តសាកសួរជនសង្ស័យទាំង ២ នាក់នោះ ដោយស្វែងរកអ្នកបកប្រែភាសាចិនយកមកបកប្រែភាសាឲ្យបានច្បាស់លាស់ពាក់ព័ន្ធនឹងករណីនេះ។ ដូច្នេះលោកមិនទាន់ដឹងថា តើទាំងក្រុមជនរងគ្រោះ និងក្រុមជនល្មើសជាក្រុមអ្នកលេងល្បែងកាស៊ីណូ ឬយ៉ាងណានៅឡើយទេ។ ជាជំហានដំបូងនៃការចាប់ខ្លួនគឺសមត្ថកិច្ចគ្រាន់តែដឹងថា ជាបទល្មើសបង្ខាំងមនុស្ស ជំរិតទារប្រាក់តែប៉ុណ្ណោះ៕