.jpg)
បុរសជនជាតិចិន ៣ នាក់ ត្រូវបញ្ជូនទៅតុលាការរឿងប្លន់ប្រាក់។ រូបថត នគរបាល
ភ្នំពេញ: អគ្គស្នងការដ្ឋាននគរបាលជាតិពីម្សិលមិញបានបញ្ជូនបុរសជនជាតិចិនចំនួន ៣ នាក់ ទៅសាលាដំបូងរាជធានីបន្ទាប់ពីចាប់ឃាត់ខ្លួនកាលពីថ្ងៃទី ៤ ខែឧសភា ពាក់ព័ន្ធករណីប្លន់លុយជាង ១១ ម៉ឺនដុល្លារពីជនជាតិចិនដូចគ្នា។
លោក មុំ ចេក នាយការិយាល័យរដ្ឋបាលនៃនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិបានថ្លែងពីម្សិលមិញថា ជនសង្ស័យជាជនជាតិចិនទាំង ៣ នាក់ ដែលសុទ្ធតែជាបុរសត្រូវបានបញ្ជូនទៅតុលាការនោះ រួមមានឈ្មោះ Shan Shiquan ឈ្មោះ Wei Bingwen និងឈ្មោះ Zeng Merng។
ពួកគេទាំង ៣ នាក់ បានធ្វើសកម្មភាពប្លន់ជនជាតិចិនដូចគ្នាយកលុយបានជាង ១១ ម៉ឺនដុល្លារ និងសម្ភារមួយចំនួនទៀតនៅសង្កាត់ទួលស្វាយព្រៃទី ១ ខណ្ឌបឹងកេងកង កាលពីថ្ងៃទី ៣០ ខែមេសា ដោយភ្លាមៗនោះជនរងគ្រោះបានប្ដឹងសមត្ថកិច្ច។ ប៉ុន្ដែរហូតដល់ថ្ងៃទី ៤ ខែឧសភា ទើបសមត្ថកិច្ចបានឃាត់ខ្លួននៅចំណុចផ្លូវព្រលានយន្តហោះក្រុងសៀមរាប ខេត្តសៀមរាប។ លោក មុំ ចេក បញ្ជាក់ថា៖ «ខ្ញុំមិនទាន់ដឹងថា តុលាការសម្រេចយ៉ាងណាទេ ទាល់តែសួរខាងតុលាការទើបដឹងរឿងនេះ»។
លោក គុជ គឹមឡុង ព្រះរាជអាជ្ញារង និងជាអ្នកនាំពាក្យសាលាដំបូងរាជធានីបានថ្លែងពីម្សិលមិញថា លោកមិនទាន់បានទទួលសំណុំរឿងនេះទេ។
បើតាមរបាយការណ៍របស់នគរបាល ជនសង្ស័យបានសារភាពថា នៅថ្ងៃទី ៣០ ខែមេសា ឆ្នាំ ២០២០ ពួកគេពិតជាបានធ្វើសកម្មភាពប្លន់ជនរងគ្រោះ បានប្រាក់ ១១ ម៉ឺនដុល្លារ និងទូរស័ព្ទ ៥ គ្រឿងពិតប្រាកដមែន។ ក្រោយធ្វើសកម្មភាពប្លន់បានសម្រេចពួកគេបានជិះរថយន្ដ ១ គ្រឿងម៉ាក Tacoma ពាក់ស្លាកលេខភ្នំពេញ 2AW-4483 យកទៅប្លុងចោលនៅខេត្តសៀមរាបបន្ទាប់មកជិះតាក់ស៊ីទៅខេត្ដបន្ទាយមានជ័យក្នុងគោលបំណងទៅប្រទេសថៃ ប៉ុន្ដែច្រកព្រំដែនត្រូវបានបិទមិនឲ្យចេញ-ចូល ហើយពួកគេស្នាក់នៅទីនោះរយៈពេល ២ ថ្ងៃទើបធ្វើដំណើរបន្តត្រឡប់ទៅខេត្តព្រះសីហនុ។
របាយការណ៍របស់នគរបាលបន្ថែមថា លុះដល់ថ្ងៃទី ៤ ខែឧសភា ពួកគេបានធ្វើដំណើរពីខេត្តព្រះសីហនុមករាជធានីភ្នំពេញ ហើយក៏បន្ដដំណើរទៅខេត្តសៀមរាប ដើម្បីទៅយករថយន្ដដែលពួកគេបានចតទុកនៅទីនោះ ប៉ុន្ដែនៅពេលទៅដល់ក៏ត្រូវបានសមត្ថកិច្ចចាប់ឃាត់ខ្លួនតែម្ដង៕
