ភ្នំពេញៈ ជនជាតិចិន ៣ នាក់ ត្រូវបានចោទប្រកាន់ និងឃុំខ្លួនបណ្ដោះអាសន្នកាលពីម្សិលមិញ ពីបទលាងសម្អាតប្រាក់ និងប្រឆាំងហិរញ្ញប្បទានភេរវកម្ម ក្រោយពីពួកគេត្រូវបានចាប់ខ្លួនជាមួយទឹកប្រាក់ចំនួនជាង ៣,៥ លានដុល្លារសហរដ្ឋអាមេរិក ដែលព្យាយាមឆ្លងកាត់ព្រលានយន្តហោះអន្តរជាតិភ្នំពេញចូលមកភ្នំពេញកាលពីចុងសប្ដាហ៍មុន។ ខណៈសមត្ថកិច្ចអះអាងថានេះជាការនាំចូលសាច់ប្រាក់ជាលើកដំបូងបង្អស់ដែលមានទ្រង់ទ្រាយធំ។
ជនសង្ស័យជាជនជាតិចិន ៣ នាក់ មានឈ្មោះ Wang Shiping កាន់លិខិតឆ្លងដែនលេខ EC9259330 ឈ្មោះ Wang Lichao កាន់លិខិតឆ្លងដែន លេខ ED4367915 និងឈ្មោះ Zhang Jian កាន់លិខិតឆ្លងដែនលេខ E35414034 ដែលពួកគេ មានមុខរបរមិនពិតប្រាកដ ត្រូវបានឃាត់ខ្លួន និងវត្ថុតាងជាសាច់ប្រាក់សរុបចំនួន ៣៥២០០០០ ដុល្លារអាមេរិក កាលពីថ្ងៃទី ២៣ ខែមេសា ឆ្នាំ ២០១៩។
លោក លី សុផានណា អ្នកនាំពាក្យសាលាដំបូងរាជធានីភ្នំពេញ បានឲ្យដឹងថា៖ «ក្រោយពីបានពិនិត្យសំណុំរឿង និងការសាកសួរចម្លើយលើឈ្មោះ (ជនជាតិចិនទាំង ៣ នាក់នោះ) រួចមក តំណាងអយ្យការបានសម្រេចបើកការស៊ើបសួរដោយចោទប្រកាន់ពីបទ សម្អាតប្រាក់ តាមមាត្រា ៣ ថ្មី និងមាត្រា ២៩ ថ្មី នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ហើយបញ្ជូនបុគ្គលទាំងនោះ និងសំណុំរឿងពួកគេ ទៅចៅក្រមស៊ើបសួរដើម្បីបន្តចំណាត់ការតាមនីតិវិធី»។
យោងតាមច្បាប់ស្ដីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ខ្លឹមសារមាត្រា ២៩ បានឲ្យដឹងថា ជនល្មើសអាចនឹងត្រូវផ្ដន្ទាទោសដាក់ពន្ធនាគារចន្លោះចាប់ពី ៦ ថ្ងៃ ដល់ ១ ឆ្នាំ និងពិន័យជាប្រាក់ចន្លោះពី ១ សែនរៀល ដល់ ៥ លានរៀល ដោយពុំទាន់គិតដល់បទល្មើសទាំងឡាយណាដែលមានបញ្ញតិ្តក្នុងច្បាប់ព្រហ្មទណ្ឌផ្សេងទៀត។
តាមរបាយការណ៍របស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ បានបង្ហាញលទ្ធផលនៃការសាកសួរថា ជនសង្ស័យ ២ នាក់ គឺឈ្មោះ Wang Shiping និងឈ្មោះ Wang Lichao ពិតជាបានយកសាច់ប្រាក់ទាំងនេះចេញពីទីក្រុងហុងកុងមកកាន់ប្រទេសកម្ពុជាមែន ដោយអះអាងថា ដើម្បីវិនិយោគលើវិស័យអចលនទ្រព្យ និងសណ្ឋាគារ ដោយពួកគេអះអាងថា ប្រភពនៃសាច់ប្រាក់ទាំងនោះ គឺបានមកពីការឈ្នះល្បែងនៅម៉ាកាវ ខ្ចីបងប្អូន និងខ្លះទៀតបានមកពីផលចំណេញក្រុមហ៊ុន ប៉ុន្តែសុទ្ធតែគ្មានឯកសារបញ្ជាក់ ។ លិខិតដដែល បានបន្តថា ចំពោះជនសង្ស័យម្នាក់ទៀត គឺឈ្មោះ Zhang Jian គឺគ្រាន់តែជាអ្នកមកទទួលជនសង្ស័យទាំង ២ នាក់នោះតាមការគ្រោងទុកប៉ុណ្ណោះ។
របាយការណ៍ដដែលនេះបានឲ្យដឹងថា៖ «ផ្អែកតាមលទ្ធផលសាកសួរ និងការត្រួតពិនិត្យឯកសាររបស់ជនសង្ស័យទាំង ៣ រូបនោះ អគ្គនាយកដ្ឋាន បានសន្និដ្ឋានថា ជនសង្ស័យចំនួន ២ នាក់ ពិតជាបាននាំសាច់ប្រាក់ជាង ៣ លាន ៥ សែនដុល្លារនោះ ចូលមកប្រទេសកម្ពុជា ដោយគ្មានប្រភពហិរញ្ញវត្ថុច្បាស់លាស់ ដែលសង្ស័យជាការសម្អាតប្រាក់ប្រាកដមែន។ ចំណែក ឈ្មោះ Zhang Jian ក៏សង្ស័យជាប់ពាក់ព័ន្ធនឹងករណីនេះដែរ»។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ភ្នំពេញប៉ុស្តិ៍កាលពីម្សិលមិញថា នៅចំពោះមុខជនទាំងនេះ ត្រូវបានចោទប្រកាន់ដោយសំអាងទៅលើច្បាប់របស់កម្ពុជា។ កម្ពុជា ស្វាគមន៍ចំពោះការនាំលុយចូលកម្ពុជា តែត្រូវប្រាកដថា លុយទាំងនោះ មិនជាប់ពាក់ព័ន្ធនឹងបទល្មើសផ្សេងៗ និងច្បាប់ថា លុយទាំងនោះមានប្រភពច្បាស់លាស់។
លោកបញ្ជាក់ថា៖ «យើងរីករាយការនាំលុយចូលមកកម្ពុជាឲ្យតែវាស្របច្បាប់ ព្រោះការនាំលុយចូលមក គឺជាការចំណេញដល់សេដ្ឋកិច្ចកម្ពុជា ព្រោះជាធម្មតាយើងទៅប្រទេសណាក៏ដោយ គឺគេឲ្យកាន់លុយសុទ្ធត្រឹមតែ ១ ម៉ឺនដុល្លារប៉ុណ្ណោះ។ ក៏ប៉ុន្តែ បើលើសពី ១ ម៉ឺនដុល្លារ ត្រូវប្រកាសនៅក្នុងប្រព័ន្ធច្បាប់របស់គេ ដូច្នេះអ្នកដែលនាំមកជាង ៣ លាននេះ មិនបានប្រកាសទេ។ បើគ្រាន់តែប្រកាសថា ខ្ញុំមានប្រាក់ប៉ុណ្ណេះៗ ហើយប្រាប់មូលហេតុមក ថាបានលុយពីណាមក ហើយបង់ពន្ធត្រឹមត្រូវតាមច្បាប់គេទៅ»។
លោក ថា៖ «ករណីរឹបអូសប្រាក់ជាង ៣ លានដុល្លានេះ គឺជាបទល្មើសទី១ និងការចរាចរលុយសុទ្ធដ៏ច្រើនដែលមិនធ្លាប់មានពាក់ព័ន្ធនឹងការលាងលុយកខ្វក់ដែលបង្ក្រាបបាននៅកម្ពុជា»។
លោក ព្រាប កុល នាយកប្រតិបត្តិអង្គការតម្លាភាពកម្ពុជាថា ជាទូទៅការសម្អាតសាច់ប្រាក់មានការពាក់ព័ន្ធបទល្មើសឧក្រិដ្ឋផ្សេងទៀត និងអាចគំរាមកំហែងដល់សន្តិសុខជាតិ និងសន្តិសុខក្នុងតំបន់។
លោក កុល ថ្លែងថា៖ «ខ្ញុំស្វាគមន៍ចំពោះវិធានការរបស់សមត្ថកិច្ចដែលបានឃាត់ខ្លួន និងដកហូតសាច់ប្រាក់ដ៏ច្រើនសន្ធឹកសន្ធាប់ពីជនសង្ស័យ។ ករណីនេះជាសញ្ញាដ៏គួរឲ្យព្រួយបារម្ភបំផុតមួយ សម្រាប់កម្ពុជាទាក់ទងទៅនឹងវិសាលភាព និងលទ្ធភាពនៃការលាងលុយកខ្វក់ ឬសម្អាតប្រាក់។ ប្រសិនបើជនល្មើសហ៊ានយកលុយមករាប់លានដុល្លារតាមយន្តហោះ ដែលមានការត្រួតពិនិត្យតឹងរុឹង យើងត្រូវតែប្រុងប្រយ័ត្ន និងយកចិត្តទុកដាក់ខ្ពស់បំផុតនៅតាមច្រកព្រំដែនផ្លូវគោក និងផ្លូវទឹក ឬតាមកំពង់ផែ»។
ថ្មីៗនេះក្រសួងមហាផ្ទៃបានណែនាំដល់សមត្ថកិច្ចទាំងអស់ត្រូវត្រួតពិនិត្យបទល្មើសគ្រឿងញៀន និងការសម្អាតប្រាក់៕