ភ្នំពេញៈ កម្លាំងនគរបាលអន្តោប្រវេសន៍កម្ពុជាបានបណ្តេញចេញជនជាតិចិនចំនួន ៦១ នាក់ ចេញពីប្រទេស កម្ពុជា នៅព្រឹកថ្ងៃទី ៨ មករា តាមច្រកទ្វារអាកាសយានដ្ឋានអន្តរជាតិភ្នំពេញដោយសារពួកគេពាក់ព័ន្ធនឹងបទល្មើសឆបោកតាមប្រព័ន្ធទូរគមនាគមន៍ និងពាក់ព័ន្ធល្បែងស៊ីសង។
លោកឧត្តមសេនីយ៍ទោ វឌ្ឍនៈ មង្គល ប្រធាននាយកដ្ឋានស៊ើបអង្កេត និងអនុវត្តនីតិវិធីនៃអគ្គនាយកដ្ឋានអន្តោប្រវេសន៍កាលពីថ្ងៃពុធបានបញ្ជាក់ថា កម្លាំងនគរបាលអន្តោប្រវេសន៍កម្ពុជាបានសហការជាមួយប៉ុស្តិ៍នគរបាល ច្រកទ្វារអាកាសយានដ្ឋាន អន្តរជាតិភ្នំពេញ បណ្តេញចេញជនជាតិចិនចំនួន ៦១ នាក់ ស្រី ៦ នាក់ ត្រឡប់ទៅស្រុកកំណើតវិញ។
លោកបានបញ្ជាក់ថា៖ «ជនសង្ស័យខាងលើ យើងទទួលមកពីនាយកដ្ឋានប្រឆាំងបទល្មើសល្បែងពាណិជ្ជកម្មនៃអគ្គស្នងការដ្ឋាននគរបាលជាតិពាក់ព័ន្ធនឹងបទល្មើសឆបោកតាមប្រព័ន្ធទូរគមនាគមន៍។ ពួកគេត្រូវបានបណ្តេញចេញតាមយន្តហោះពិសេសចំនួន ២ គ្រឿងមកទទួលតាមប្រកាសក្រសួងមហាផ្ទៃ ហើយហាមចូលកម្ពុជារយៈពេល ៣ ឆ្នាំ»។
លោកបន្ថែមថាជនជាតិចិន ៦១ នាក់នោះ ត្រូវបានឃាត់ខ្លួនប្រហែលជាក្នុងអំឡុងពេល ២ សប្តាហ៍ពាក់ព័ន្ធនឹងបទល្មើសឆបោកតាមប្រព័ន្ធទូរគមនាគមន៍ក្នុងរាជធានីភ្នំពេញ និងតាមបណ្តាខេត្តផ្សេងៗ។
ករណីដោយឡែកមួយទៀតសមត្ថកិច្ចខេត្តព្រះសីហនុ បានបង្ក្រាបក្លិបល្បែងស៊ីសង ៣ ទីតាំងក្នុងសង្កាត់លេខ ៣ ក្រុង-ខេត្ត ព្រះសីហនុកាលពីយប់ថ្ងៃទី ៦ មករា ក្នុងនោះសមត្ថកិច្ចក៏បានឃាត់ខ្លួនមនុស្ស ៣០ នាក់ដែលមានទាំងជនជាតិខ្មែរ និងចិន។
លោក ជួន ណារិន្ទ ស្នងការនគរបាល ខេត្តព្រះសីហនុឲ្យដឹងពីម្សិលមិញថា កម្លាំងសមត្ថកិច្ចរបស់លោកបានចុះបង្ក្រាបល្បែងស៊ីសងចំនួន ៣ ទីតាំង បន្ទាប់ពីមានការស្រាវជ្រាវពីសមត្ថកិច្ចជំនាញរបស់លោកផងដែរ។
លោកប្រាប់ថា ចំពោះលទ្ធផលនៃការបង្ក្រាបនេះរហូតដល់ថ្ងៃទី ៧ មករា លោកមិនទាន់ធ្វើកំណត់ហេតុដើម្បីបែងចែកប្រភេទទូហ្គេម និងទូស្លុតម៉ាស៊ីន រួមទាំងជនសង្ស័យនៅឡើយទេ ព្រោះមនុស្សដែលត្រូវឃាត់ខ្លួននោះមានទាំងជនជាតិចិន និងជនជាតិ ខ្មែរហើយក៏នៅមិនទាន់បែងចែកថានរណាជាម្ចាស់នរណាជាបុគ្គលិកឲ្យបានច្បាស់នៅឡើយដែរ រួមទាំងចំនួនមនុស្សផង។
លោកថ្លែងថា៖ «ខ្ញុំនៅបែងចែកពីប្រភេទមនុស្ស។ យើងបែងចែកមានចិន មានខ្មែរប៉ុន្មាន គឺយើងញែកឲ្យអស់សិន ហើយម្ចាស់ទីតាំងក៏មិនជាក់លាក់ដែរ»៕