ភ្នំពេញៈ មនុស្សប្រុស-ស្រីចំនួន ២៨៥ នាក់ ត្រូវបានកម្លាំងសមត្ថកិច្ចនគរបាលរាជធានីភ្នំពេញឃាត់ខ្លួន និងប្រមូលបានពីការចុះបង្ក្រាបក្លិបកម្សាន្ត ១ កន្លែង ដែលល្មើសនឹងការណែនាំរបស់ក្រសួងសុខាភិបាលក្នុងការប្រឆាំងនឹងជំងឺកូវីដ ១៩ ស្ថិតក្នុងសង្កាត់ភ្នំពេញថ្មី ខណ្ឌសែនសុខ កាលពីវេលារំលងអធ្រាត្រ ឈានចូលថ្ងៃទី ២៨ កក្កដា ខណៈពួកគេកំពុងសប្បាយក្នុងក្លិបកម្សាន្តនោះ។
លោក ប៊ុន សត្យា នាយការិយាល័យព្រហ្មទណ្ឌកម្រិតស្រាលនៃស្នងការដ្ឋាននគរបាលរាជធានីភ្នំពេញ ប្រាប់ភ្នំពេញ ប៉ុស្តិ៍ ពីម្សិលមិញថាកាលពីវេលាម៉ោងជាង ១២ រំលងអធ្រាត្រឈានចូលថ្ងៃទី ២៨ កក្កដា កម្លាំងសមត្ថកិច្ចរបស់លោក និងដោយមានការសម្របសម្រួលផ្លូវច្បាប់ពីលោក សាយ ណូរ៉ា ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញបានចុះបង្ក្រាបក្លិបកម្សាន្តមួយកន្លែងឈ្មោះ ហ្គោលឡាញ នៅតាមបណ្តោយ ផ្លូវ ១៩៨៦ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។ ក្នុងប្រតិបត្តិការនោះ សមត្ថកិច្ចប្រមូលមនុស្សប្រុស-ស្រីបានចំនួន ២៨៥ នាក់ ដែលជាអ្នកចូលទៅកម្សាន្តនៅទីនោះ។
លោកបន្តថា មូលហេតុដែលលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការរាជធានីភ្នំពេញបានប្រគល់ភារកិច្ចឲ្យលោកដឹកនាំកម្លាំងចុះបង្ក្រាប ដោយសារម្ចាស់ក្លិបកម្សាន្តមួយនេះមិនអនុវត្តទៅតាមបទបញ្ជារបស់រាជរដ្ឋាភិបាលក៏ដូចជា ក្រសួងសុខាភិបាល និងការណែនាំរបស់សាលារាជធានីភ្នំពេញ ដែលមិនអនុញ្ញាតឲ្យបើកក្លិបកម្សាន្ត និងខារ៉ាអូខេមួយរយៈអំឡុងពេលមានជំងឺកូវីដ១៩។
លោក ប៊ុន សត្យា ថ្លែងថា៖ «បទបញ្ជារបស់សម្តេច ហ៊ុន សែន មិនឲ្យបើកក្លិប និងខារ៉ាអូខេទេ អ៊ីចឹងយើងត្រូវបិទទីតាំងនោះចោលហើយ»។
លោកបន្តថា មនុស្សដែលសមត្ថកិច្ចប្រមូលបានទាំងអស់មានចំនួន ២៨៥ នាក់ ក្នុងនោះគឺមានស្រី ៨១ នាក់ផងដែរ។ មនុស្សមួយចំនួនត្រូវបានអនុញ្ញាតឲ្យត្រឡប់ទៅផ្ទះវិញ ក្រោយពីធ្វើការអប់រំណែនាំរួចហើយ។ ចំណែកអ្នកនៅសល់មួយចំនួនទៀត សមត្ថកិច្ចកំពុងសាកសួរ។ បើមិនពាក់ព័ន្ធនឹងបទល្មើសផ្សេងទៀតទេនឹងត្រូវអនុញ្ញាតឲ្យពួកគេត្រឡប់ទៅផ្ទះវិញដូចគ្នា។
លោកប្រាប់ថា ចំពោះអ្នកខ្លះដែលនៅក្នុងចំណោមមនុស្សដែលប្រមូលបានពីទីតាំងក្លិបនៅពេលដែលសមត្ថកិច្ចសាកសួរទៅមានជាប់ពាក់ព័ន្ធនឹងបទល្មើសគ្រឿងញៀននោះគឺបុគ្គលនោះនឹងត្រូវមានចំណាត់ការបន្តទៀតតាមនីតិវិធីច្បាប់។
មន្ត្រីនគរបាលរូបនេះបញ្ជាក់ថា៖ «ចំណែកឯម្ចាស់ទីតាំងក្លិបកម្សាន្តនោះវិញ សមត្ថកិច្ចរបស់ខ្ញុំកំពុងស្រាវជ្រាវរក ព្រោះមិនរស់នៅក្នុងមូលដ្ឋានខណ្ឌសែនសុខទេ តែក្លិបនោះសមត្ថកិច្ចត្រូវបិទជាបណ្តោះអាសន្នសិន»។
ពាក់ព័ន្ធនឹងការបើកក្លិបកម្សាន្ត និងខារ៉ាអូខេនេះពីម្សិលមិញភ្នំពេញប៉ុស្តិ៍ បានទាក់ទងលោក មាន ច័ន្ទយ៉ាដា អភិបាលរងរាជធានីភ្នំពេញ ដែលបានចុះទៅបង្ក្រាបទីតាំងក្លិបកម្សាន្តហ្គោលឡាញនោះ ដើម្បីសុំការបញ្ជាក់បន្ថែមដែរ តែលោកប្រាប់ឲ្យសួរទៅអ្នកនាំពាក្យសាលារាជធានីភ្នំពេញលោក ម៉េត មាសភក្តី ដែលទូរស័ព្ទលោកហៅចូលតែគ្មានអ្នកទទួល។
ភ្នំពេញប៉ុស្តិ៍បានទូរស័ព្ទទៅលោក ម៉ូវ ម៉ានិត អភិបាលខណ្ឌសែនសុខ ដើម្បីសុំការបកស្រាយពាក់ព័ន្ធម្ចាស់ក្លិបកម្សាន្ត ហ្គោលឡាញ នេះដែរ ប៉ុន្តែលោកមិនធ្វើអត្ថាធិប្បាយទេ ដោយប្រាប់ថា ជាប់ប្រជុំនៅក្រសួងមហាផ្ទៃ។
គួររំឭកផងដែរថា ក្រសួងសុខាភិបាលបានចេញសេចក្តីណែនាំចុះថ្ងៃទី ១៧ ខែ មីនា ឆ្នាំ ២០២០ ដោយតម្រូវឲ្យអនុវត្តតាមការណែនាំរបស់លោកនាយករដ្ឋមន្ត្រី ហ៊ុន សែន ដែលបានបញ្ជាក់ថា៖ «បិទ KTV ក្លិបកម្សាន្ត រោងភាពយន្ត និងសារមន្ទីរទូទាំងប្រទេសចាប់ពីថ្ងៃទី ១៧ ខែ មីនា ឆ្នាំ ២០២០ រហូតដល់ពេលជំងឺកូវីដ១៩បានធូរស្រាល»៕