.jpg)
មន្ត្រីបរិស្ថានចុះល្បាតដែនជម្រកសត្វព្រៃភ្នំព្រេច ស្ថិតក្នុងភូមិសាស្ត្រខេត្តមណ្ឌលគិរី នាពេលកន្លងមក។ រូបថត ក្រសួងបរិស្ថាន
ភ្នំពេញ៖ ក្រសួងបរិស្ថាន និងក្រសួងរៀបចំដែនដី នគរូបនីយកម្ម និងសំណង់ បានចុះបញ្ជីដីរដ្ឋនៃដែនជម្រកសត្វព្រៃពាមក្រសោប ខេត្តកោះកុង និងដែនជម្រកសត្វព្រៃភ្នំព្រេច ខេត្តមណ្ឌលគិរី ដើម្បីលុបបំបាត់បទល្មើសការទន្ទ្រានយកដីរដ្ឋធ្វើជាកម្មសិទ្ធិឯកជន។ នីតិវិធីនេះមានការគាំទ្រ ពីពលរដ្ឋសហគមន៍ ដោយពួកគេរំពឹងថា បទល្មើសព្រៃឈើនឹងថយចុះ។
សេចក្ដីជូនដំណឹងរបស់ក្រសួងបរិស្ថានចុះថ្ងៃទី ១៦ មេសា ដែល ភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ក្រសួងបរិស្ថានបាននិងកំពុងអនុវត្តការចុះបញ្ជីដីរដ្ឋនៅក្នុងតំបន់ការពារធម្មជាតិចំនួន ២ គឺ «ដែនជម្រកសត្វព្រៃពាមក្រសោប ស្ថិតក្នុងភូមិសាស្ត្រ ខេត្តកោះកុង និងដែនជម្រកសត្វព្រៃភ្នំព្រេច ស្ថិតក្នុងភូមិសាស្ត្រខេត្តមណ្ឌលគិរី»។ ការអនុវត្តនេះ អនុលោមតាមច្បាប់ និងលិខិតបទដ្ឋានគតិយុត្តពាក់ព័ន្ធ ជាពិសេសច្បាប់ស្តីពីតំបន់ការពារធម្មជាតិឆ្នាំ ២០០៨ និងច្បាប់ភូមិបាលឆ្នាំ ២០០១។
លិខិតបន្តថា នីតិវិធីនិងដំណើរការនៃការចុះបញ្ជីដីរដ្ឋនៅក្នុងតំបន់ការពារធម្មជាតិនេះ គឺដើម្បីកំណត់ និងបែងចែកតំបន់គ្រប់គ្រងតំបន់ការពារធម្មជាតិ ដូចជាតំបន់ស្នូល តំបន់អភិរក្ស តំបន់ប្រើប្រាស់ដោយចីរភាព និងតំបន់សហគមន៍សម្រាប់តំបន់ការពារធម្មជាតិនីមួយៗ។ លើសពីនេះ ដើម្បីរៀបចំឲ្យមានវិញ្ញាបនបត្រសម្គាល់ម្ចាស់អចលនវត្ថុច្បាស់លាស់សម្រាប់ដែនជម្រកសត្វព្រៃ ទាំង ២ សំដៅកាត់បន្ថយ និងលុបបំបាត់ករណីបទល្មើសកាប់រុករានទន្ទ្រានយកដីរដ្ឋធ្វើជាកម្មសិទ្ធិឯកជនតាមរយៈការរឹតបន្តឹងវិធានការច្បាប់។
លិខិតបន្ថែមថា សកម្មភាពអនុវត្តគម្រោងចុះបញ្ជីដីរដ្ឋនេះ ត្រូវបានចាប់ផ្តើមតាំងពីដើមឆ្នាំ ២០១៨ ហើយមកដល់ពេលនេះសម្រេចបានលទ្ធផលសំខាន់ៗ ដូចជា ទី១-ក្រុមការងារបានបញ្ចប់នីតិវិធី និងដំណើរការចុះបញ្ជីដីរដ្ឋសម្រាប់តំបន់ស្នូល និងតំបន់អភិរក្សនៃដែនជម្រកសត្វព្រៃទាំង ២ និងទី២-ក្រសួងរៀបចំដែនដី នគរូបនីយកម្ម និងសំណង់បានចេញវិញ្ញាបនបត្រសម្គាល់អចលនវត្ថុជូនក្រសួងបរិស្ថានចំនួន ១៨ បណ្ណ។
ក្នុងនោះ ១០ បណ្ណ សម្រាប់សម្គាល់កម្មសិទ្ធិដីរដ្ឋក្នុងតំបន់ស្នូល និងតំបន់អភិរក្សនៃដែនជម្រកសត្វព្រៃពាមក្រសោប ខេត្តកោះកុងដែលគ្របដណ្តប់លើ ផ្ទៃដីសរុប ៤ ៦៧២,៦១ ហិកតា។ រីឯ ៨ បណ្ណទៀតសម្រាប់សម្គាល់កម្មសិទ្ធិដីរដ្ឋក្នុងតំបន់ស្នូលនៃដែនជម្រកសត្វព្រៃភ្នំព្រេច ខេត្តមណ្ឌលគិរី គ្របដណ្តប់លើផ្ទៃដីសរុប ៤៥ ៥១៩,២៦ហិកតា។
លោក នេត្រ ភក្ត្រា អ្នកនាំពាក្យ និងជារដ្ឋលេខាធិការក្រសួងបរិស្ថានថ្លែងពីម្សិលមិញថា សកម្មភាពនេះ គឺជាលទ្ធផលប្រវត្តិសាស្ត្រសម្រាប់កម្ពុជាដែលរាជរដ្ឋាភិបាលបានគាំទ្រ។ រដ្ឋាភិបាលជំរុញឲ្យមានការចុះបញ្ជីដីរដ្ឋក្នុងតំបន់ការពារធម្មជាតិជាលើកដំបូង ហើយក៏ឆ្លុះបញ្ចាំងអំពីការយកចិត្តទុកដាក់ និងការប្តេជ្ញាចិត្តខ្ពស់របស់រាជរដ្ឋាភិបាលលើការងារការពារ និងអភិរក្សធនធានធម្មជាតិនៅកម្ពុជា។
លោក នេត្រ ភក្ត្រា បញ្ជាក់ថា៖ «នៅថ្ងៃខាងមុខទៀត គឺគោលដៅរបស់យើងនឹងបន្តចុះបញ្ជីដីរដ្ឋនូវរាល់តំបន់ការពារធម្មជាតិទាំងអស់ដែលស្ថិតក្រោមការគ្រប់គ្រងក្រសួងបរិស្ថាន»។
លោកបន្ថែមថា៖ «ជាពិសេសគម្រោងនៅថ្ងៃខាងមុខនេះ យើងកំពុងរៀបចំចុះបញ្ជីដីឧទ្យានជាតិគិរីរម្យ ហើយបន្ទាប់មកទៀត យើងកំពុងសិក្សាជាមួយដៃគូអភិវឌ្ឍន៍នានា ចុះបញ្ជីដីព្រៃឡង់បន្ថែមទៀត ហើយក្រៅពីនេះ យើងនឹងធ្វើបន្តបន្ទាប់នៅតំបន់ផ្សេងៗទៀត»។
លោក សៀក សាបុណ តំណាងសហគមន៍ពាមក្រសោប ខេត្តកោះកុង គាំទ្រចំពោះការចុះបញ្ជីតំបន់អភិរក្សពាមក្រសោបជាដីរដ្ឋ ដោយថាតំបន់នោះកំពុងរងការគំរាមកំហែងដោយការកាប់ទន្ទ្រានដីព្រៃធ្វើជាកម្មសិទ្ធិឯកជន។ តំបន់ពាមក្រសោបនេះ ធ្លាប់ត្រូវបានគេទន្ទ្រានជាច្រើនលើកមកហើយ ប៉ុន្ដែប្រជាសហគមន៍ចុះទៅហាមឃាត់ទាន់ពេល។
លោកឲ្យដឹងថា៖ «នៅតំបន់ពាមក្រសោបសព្វថ្ងៃនេះ មានប្រជាពលរដ្ឋប្រមាណជាង ៣០០ គ្រួសារ កំពុងអាស្រ័យផលដូចជា នេសាទមឹក បង្គា ចាប់ក្ដាម និងមួយចំនួនទៀតលក់ដូរនៅមាត់សមុទ្រ។ ពួកខ្ញុំសង្ឃឹមថា នៅពេលចុះបញ្ជីដីនេះរួច នឹងមិនមានអ្នកមកកាប់ទន្ទ្រានយកដីនេះទៀតទេ ហើយពួកខ្ញុំនៅតែមានឱកាសអាស្រ័យផលពីតំបន់នេះ»។
លោក ប្រុង ណច តំណាងសហគមន៍ជនជាតិដើមភាគតិចព្នងដែលតែងតែចុះល្បាតនៅតំបន់ដែនជម្រកសត្វព្រៃភ្នំព្រេចនិយាយពីថ្ងៃម្សិលមិញថា លោកគាំទ្រការចុះបញ្ជីដីនៅតំបន់ភ្នំព្រេចនេះ។ ប៉ុន្ដែលោកថា មិនទាន់ជឿជាក់លើសមត្ថកិច្ចអាចលុបបំបាត់បទល្មើសព្រៃឈើបាននោះទេ បើទោះជាមានការចុះបញ្ជីក៏ដោយ។ ប្រសិនមន្ត្រីដែលទទួលខុសត្រូវនៅតំបន់មិនបង្ក្រាបទេ បទល្មើសព្រៃឈើក៏នឹងមិនអាចថមថយបានដែរ។
លោកបញ្ជាក់ថា៖ «ព្រោះបទល្មើសព្រៃឈើភាគច្រើន កើតឡើងដោយសារមន្ត្រីអង្គុយចាំប្រមូលលុយពីបទល្មើសព្រៃឈើ។ ប៉ុន្មានថ្ងៃមុននេះ ពួកខ្ញុំចុះល្បាត ហើយបានជួបបទល្មើស ដោយជនល្មើសបានអះអាងថា គាត់បានបង់លុយឲ្យមន្ត្រីក្នុង ១ គោយន្ត ១០ ម៉ឺនរៀលរួចរាល់ហើយ អ៊ីចឹងខ្ញុំគ្មានជំនឿលើមន្ត្រីហ្នឹងទេ»។
គួររំឭកថា បច្ចុប្បន្នប្រទេស កម្ពុជា មានតំបន់ការពារធម្មជាតិចំនួន ៥៧ កន្លែង និងរបៀងអភិរក្សជីវចម្រុះចំនួន ៣ តំបន់ដែលគ្របដណ្តប់លើផ្ទៃដីសរុបប្រមាណជាង ៧,២ លានហិកតា។ ការចុះបញ្ជីនេះក៏ដូចជាការរួមចំណែកដល់ការពង្រឹងប្រសិទ្ធភាពនៃការគ្រប់គ្រងប្រព័ន្ធតំបន់ការពារធម្មជាតិទាំងអស់៕
