.jpg)
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរី ថ្លែងនាពេលកន្លងមក។ រូបថត ហ្វេសប៊ុក
រតនគិរីៈ អាជ្ញាធរខេត្តរតនគិរីបានចុះត្រួតពិនិត្យចំណុចបង្គោលលេខ ២៧ ស្ថិតក្នុងភូមិភិក្រោម ឃុំសេសាន ស្រុកអូរយ៉ាដាវកាលពីថ្ងៃទី ១៥ មេសា ដើម្បីស៊ើបអង្កេតបទល្មើសព្រៃឈើឆ្លងដែនខុសច្បាប់ បន្ទាប់ពីមានពាក្យចចាមអារ៉ាមជុំវិញការលួចដឹកឈើតាមផ្លូវទឹកទៅកាន់ប្រទេសវៀតណាម ប៉ុន្ដែសកម្មជនការពារព្រៃឈើគ្មានជំនឿលើអាជ្ញាធរទេ។
លោក ថាវ យ៉េន មេបញ្ជាការកងរាជអាវុធហត្ថខេត្តរតនគិរីប្រាប់កាលពីថ្ងៃទី ១៥ មេសា ថា កម្លាំងកងរាជអាវុធហត្ថលើផ្ទៃប្រទេស កងរាជអាវុធហត្ថខេត្ត មន្ត្រីបរិស្ថាន ខេត្ត វរការពារព្រំដែនគោកលេខ ៦២៣ និងកម្លាំងសមត្ថកិច្ចចម្រុះស្រុកអូរយ៉ាដាវដឹកនាំដោយលោក លន់ សុភាព អភិបាលរងខេត្តរតនគិរីបានចុះត្រួតពិនិត្យចំណុចបង្គោលលេខ ២៧ ស្ថិតភូមិភិក្រោម ឃុំសេសាន ស្រុកអូរយ៉ាដាវ បន្ទាប់ពីទទួលព័ត៌មានថា មានសកម្មភាពលួចដឹកជញ្ជូនឈើខុសច្បាប់តាមផ្លូវទឹកទៅកាន់ប្រទេស វៀតណាម។
លោកបញ្ជាក់ថា៖ «យើងបានឮព័ត៌មានមកថា មានបទល្មើសព្រៃឈើប្រព្រឹត្តនៅតាមខ្សែក្រវាត់ព្រំដែនហ្នឹង តែដល់យើងចុះទៅគឺអត់ឃើញមានទេ។ ក្រោយមកយើងបានអញ្ជើញភាគីវៀតណាមមកពិភាក្សាគ្នារឿងបង្ក្រាបបទល្មើសតាមព្រំដែនរួមគ្នាត្រូវតែជួយបង្ក្រាបគ្នា ហើយវៀតណាមក៏គេយល់ព្រមសហការទប់ស្កាត់ បទល្មើសនានា មិនត្រឹមតែបទល្មើសព្រៃឈើទេគឺគេធ្វើជាមួយយើង»។
លោកបន្ថែមថា ក្រោយពេលពិភាក្សាគ្នាជាមួយភាគីវៀតណាមចប់ ក្រុមគណៈកម្មការចម្រុះបានចុះស្រាវជ្រាវតាមតំបន់ដែល ថា មានករណីលួចដឹកជញ្ជូនឈើឆ្លងដែនខុសច្បាប់។ ប៉ុន្ដែជាលទ្ធផលមិនមានអ្វីគួរឲ្យកត់សម្គាល់ទេ ហើយក៏មិនមានឃើញសកម្មភាពដឹកជញ្ជូនឈើតាមផ្លូវទឹកដែរ ដោយមានសភាពស្ងៀមស្ងាត់ធម្មតា និងគ្មានបទល្មើសអ្វីកើតឡើងតាមព្រំដែនទេ។
លោក ផុន ខេមរិន្ទ ប្រធានមន្ទីរបរិស្ថានខេត្តរតនគិរីថ្លែងថ្ងៃទី ១៥ មេសា ថា មន្ត្រីនៃមន្ទីរបរិស្ថានបានចូលរួមក្នុងប្រតិបត្តិការនេះដែរ ប៉ុន្ដែលោកមិនទាន់ទទួលរបាយការណ៍ស្ដីពីលទ្ធផលនេះនៅឡើយ។ លោកថា មិនទាន់អាចនិយាយពីលទ្ធផលបានទេ។
លោកបន្តថា៖ «មន្ត្រីមន្ទីរបរិស្ថានខេត្តរតនគិរីបានទៅចូលរួមការងារនេះជាមួយសមត្ថកិច្ចចម្រុះយើងដែរ តែខ្ញុំមិនទាន់ដឹងលទ្ធផលយ៉ាងណាទេ ព្រោះពួកគាត់មិនទាន់ផ្ដល់ដំណឹងមកខ្ញុំទេ»។
លោក លន់ សុភាព អភិបាលរងខេត្តរតនគិរីពីម្សិលមិញមិនទាន់អាចទាក់ទង ដើម្បីសុំអត្ថាធិប្បាយ ជុំវិញករណីនេះបានទេ។
ប៉ុន្ដែ Fresh News បានដកស្រង់សម្តីលោកនៅថ្ងៃទី ១៥ មេសា ថា ក្រុមការងារបានជួបជជែកពិភាក្សាជាមួយខាងភាគីវៀតណាម ព្រោះសមត្ថកិច្ចកម្ពុជាសង្កេតឃើញមានឈើជាច្រើនដុំកំពុងលាក់ទុកក្នុងទន្លេខាងដែនទឹកប្រទេសវៀតណាម។
ប៉ុន្ដែភាគីវៀតណាមបញ្ជាក់ថា ឈើទាំងអស់នេះមិនទាន់ដឹងច្បាស់ថា ដឹកតាមកាណូតមកពីដីខ្មែរ ឬឈើកាប់ក្នុងដីវៀតណាមនៅឡើយទេ។ លោកបន្តថា ករណីលួចនាំឈើទៅវៀតណាមតាមផ្លូវទឹកនឹងរង់ចាំក្រុមការងារប្រជុំវាយតម្លៃជាមុនសិន។
Fresh News បានដកស្រង់ប្រភពមិនបញ្ចេញឈ្មោះមួយទៀតថានៅទឹកដីវៀតណាម គ្មានព្រៃឈើសម្រាប់ឲ្យក្រុមជនល្មើសកាប់នោះទេពោលគឺ ឈើដឹកតាមកាណូតដែលចតលាក់ទុកក្នុងទន្លេដែនទឹកវៀតណាមគឺពិតជាឈើចេញពីដីខ្មែរយ៉ាងពិតប្រាកដ ប៉ុន្ដែពួកគេអូសឡើងលើគោកមិនទាន់។
ប្រភពដដែលបន្តថា ឈើស្រឡៅ ឈើគគីរ ឈើកកោះ ដែលកំពុងត្រូវប៉ាន់ខ្លាំងក្នុងទីផ្សារវៀតណាមត្រូវបានក្រុមឈ្មួញវៀតណាម និងសមត្ថកិច្ចខិលខូចមួយចំនួននៅកម្ពុជាយកលុយជួលកម្មករជនជាតិដើមភាគតិច កាប់ អារក្នុងព្រៃសហគមន៍ភូមិបាដលនៅជិតមាត់ទន្លេសេសាន ដាក់កាណូត និងដឹកតាមម៉ូតូចូលទៅឲ្យឈ្មួញវៀតណាមនៅពេលយប់។
លោក ហេង ស្រស់ សកម្មជនការពារព្រៃឈើថ្លែងថា តាមគោលដៅដែលអាជ្ញាធរកម្ពុជាចុះទៅស៊ើបអង្កេតនេះជាកន្លែងរសើបបំផុតចំពោះបទល្មើសព្រៃឈើ។ លោកថា ក្រុមឈ្មួញនាំគ្នាកាប់ឈើនៅតំបន់នោះរួចហើយបានគរជាគំនរទុកសម្រាប់ដឹកជញ្ជូននៅពេលយប់ដោយឈ្មួញកម្ពុជា និងវៀតណាម សហការគ្នាដឹកជញ្ជូនតាមកាណូត ឬពួកគេបណ្ដែតតាមទឹក ហើយយកម៉ាស៊ីនទូកអូសឈើទាំងនោះ។
លោកថា តាំងពីឆ្នាំ ២០១៦-២០២០ សកម្មភាពកាប់ឈើនៅតំបន់កន្ទុយនាគនៃខេត្តរតនគិរីនៅតែបន្តសកម្មភាពគ្មានការថមថយ។ លោកមិនជឿលើការបង្ក្រាបរបស់មន្ត្រីមូលដ្ឋានទេ ព្រោះពួកគាត់គ្រាន់តែដើរល្បាតយូរៗម្ដង។
លោក ស្រស់ ថា៖ «សមត្ថកិច្ចយើងគាត់ចុះល្បាត គ្រាន់តែនាំគ្នា ១០ ឬ ២០ នាក់ជិះឡានតាមផ្លូវលំ ឬផ្លូវជាតិធម្មតាពោលគឺដូចពួកគាត់នាំគ្នាទៅដើរលេងកម្សាន្ដអារម្មណ៍ដែរ។ បើចង់ចាប់បទល្មើសព្រៃឈើទាល់តែចូលក្នុងព្រៃទើបអាចរកឃើញបទល្មើសព្រៃឈើ តែបើគាត់ជិះតែឡានលេងតាមផ្លូវបែបនេះ ខ្ញុំគ្មានសង្ឃឹមថា អាចបង្ក្រាបបទល្មើសព្រៃឈើបានទេ»៕
