ភ្នំពេញៈ ជែលលាងដៃសម្លាប់មេរោគប្រមាណ ២ ០០០ លីត្រ ត្រូវបានចែកជូនដល់ពលរដ្ឋក្នុងខេត្តមួយចំនួន ហើយជែលលាងដៃចំនួន ៥ ០០០ លីត្របន្ថែមទៀត នឹងត្រូវផលិតសម្រាប់ចែកជូនដោយឥតគិតថ្លៃ ដើម្បីអាចប្រើប្រាស់ក្នុងការការពារខ្លួនស្របពេលកម្ពុជាកំពុងទទួលរងដោយជំងឺកូវីដ ១៩ ដែលកំពុងរាតត្បាតនៅទូទាំងប្រទេស។
លោក ហែម ហេម៉ា ដែលជាស្ថាបនិកយីហោបោកអ៊ុតយក្សា និងលោក តាន់ គីមសួរ ស្ថាបនិក ក្រុមបៃតង វ៉ររៀលរស៍ ដែលជាក្រុមចូលរួមដាំកូនឈើនៅក្នុងប្រទេសបានរួមសហការគ្នាផលិតជែលសម្លាប់មេរោគនេះ ខណៈបច្ចុប្បន្នជំងឺរលាកផ្លូវដង្ហើមប្រភេទថ្មី ឬកូវីដ ១៩ កំពុងតែបន្តរាតត្បាតទៅលើប្រទេសជាច្រើនជុំវិញពិភពលោកដោយក្នុងនោះក៏មានប្រទេស កម្ពុជា ផងដែរ។
លោក តាន់ គីមសួរ ថ្លែងពីម្សិលមិញថា ជំងឺកូវីដកំពុងផ្ទុះឡើងដែលបញ្ហានេះតម្រូវឲ្យពលរដ្ឋទាំងអស់ត្រូវមានការថែរក្សាអនាម័យឲ្យបានល្អជាប្រចាំ។ ជាពិសេសត្រូវលាងសម្អាតដៃជាមួយអាល់កុល ឬជែលសម្លាប់មេរោគ ដើម្បីការពារខ្លួនតាមការណែនាំរបស់អ្នកជំនាញ។ បញ្ហាទាំងនេះបានធ្វើឲ្យទឹកអាល់កុល និងជែលសម្លាប់មេរោគមានតម្រូវការយ៉ាងខ្លាំងសម្រាប់ពលរដ្ឋគ្រប់រូបនាពេលបច្ចុប្បន្ន ដែលជាហេតុនាំឲ្យផលិតផលទាំងនេះមានតម្លៃថ្លៃនៅលើទីផ្សារ។
លោកបន្ថែមថាដូច្នេះសម្រាប់ការចែកជូននេះមិនប្រាកដថាអាចចូលរួមកាត់បន្ថយការឡើងថ្លៃផលិតផលទាំងនេះបានកម្រិតណានោះទេ។ ប៉ុន្តែអ្វីដែលក្រុមលោកបានធ្វើគឺរំពឹងថា ពលរដ្ឋដែលគ្មានលទ្ធភាពនឹងទទួលបានផលិតផលល្អយកទៅប្រើប្រាស់ក្នុងគ្រាអាសន្ននេះ។
លោកប្រាប់ភ្នំពេញប៉ុស្តិ៍ថា៖ «៥ ០០០ លីត្របន្ថែមទៀត នឹងបញ្ជូនទៅខាងរោងចក្រកាត់ដេរតែម្តង ព្រោះខ្ញុំទទួលបាន [ការ] ស្នើមកជាហូរហែថា កម្មករ-កម្មការិនី នៅទីនោះទទួលការខ្វះខាតមែនទែន។ ពាក់ព័ន្ធនឹងការយល់ដឹងរបស់ប្រជាពលរដ្ឋមួយចំនួនដែលយើងចុះទៅគឺមិនទាន់យល់ច្បាស់ពីជំងឺកូវីដនោះទេ ដែលក្នុងឱកាសនោះយើងក៏ចូលរួមពន្យល់បន្ថែមដល់ពួកគាត់ផងដែរ»។
លោក តាន់ គីមសួរ បញ្ជាក់ថាជែលលាងសម្លាប់មេរោគដែលផលិតបានពីសិប្បកម្មផលិតសាប៊ូមួយនៅខេត្តសៀមរាបត្រូវបានបែងចែកជាដបតូចៗចំណុះ ៥០ មិលី្លលីត្រ និងពីដុងធំៗចំណុះ ៣០ លីត្រដើម្បីចែកជូនដល់ពលរដ្ឋតាមបណ្តោយព្រំដែនឡែម និងមន្ទីរពេទ្យក្នុងខេត្តបាត់ដំបង។ ក្រៅពីនេះក៏នឹងចែកជូននៅក្នុងព្រះវិហារខ្មែរអ៊ិស្លាមនៅតាមបន្ទាត់ព្រំដែនប៉ោយប៉ែត ខេត្តបន្ទាយមានជ័យ។ ជាងនេះទៀតក៏ត្រូវផ្តល់ជូនទៅដល់ពលរដ្ឋមួយចំនួនដូចជាអ្នកធាក់ស៊ីក្លូ ពលរដ្ឋក្រីក្រមួយចំនួននៅក្នុងរាជធានីភ្នំពេញ ខេត្តសៀមរាប និងខេត្តកំពង់ស្ពឺផងដែរ។
លោក ហែម ហេម៉ា ដែលបានចំណាយថវិកាផ្ទាល់ខ្លួនរាប់ម៉ឺនដុល្លារ ដើម្បីទិញម៉ាស៊ីនផលិតជែលលាងដៃសម្រាប់ចែកជូនពលរដ្ឋទូទាំងប្រទេសដោយឥតគិតថ្លៃប្រាប់ភ្នំពេញប៉ុស្តិ៍ពីម្សិលមិញ ដែរថាក្នុងអំឡុងពេលមិនដល់ ១ ខែក្នុងខែមីនានេះលោកបានផលិតជែលអាល់កុលលាងដៃប្រមាណ ២ ០០០ លីត្រ។
បុរសវ័យ ៤០ ឆ្នាំ ដែលមានទីលំនៅ ឯខេត្តសៀមរាបរូបនេះបន្តថា៖ «ជែលលាងដៃយើងបានផលិតបានចំនួន ២ ០០០ លីត្រ ចែកជូនពលរដ្ឋរួចហើយ។ យើងនឹងបន្តផលិតចំនួន ៥ ០០០ លីត្របន្តទៀត ដើម្បីចែកជូនពួកគាត់ ដើម្បីឲ្យអ្នកដែលគ្មានលទ្ធភាពបានប្រើប្រាស់ទាំងអស់គ្នា។ បន្ទាប់ពីយើងបានផលិតហើយ ជែលលាងដៃការពារមេរោគនេះ យើង [បញ្ជូន] ទៅក្រសួងសុខាភិបាលដើម្បី ពិនិត្យ និងទទួលបានការអនុញ្ញាត»។
លោក ហេម៉ា ដែលមានបទពិសោធផលិតសាប៊ូជាង ៥ ឆ្នាំបញ្ជាក់ថា រូបមន្តដែលលោកបានផលិតជែលនេះគឺមានគុណភាពល្អត្រូវតាមបទដ្ឋាន ដោយបានប្រើប្រាស់អាល់កុលសុទ្ធពី ៦០ ទៅ ៦៥ ភាគរយ និងវត្ថុធាតុដើមមួយចំនួនទៀត។ កម្រិតដែលលាយបញ្ចូលគ្នាជាល្បាយគឺជាប់លើស្បែកដល់ទៅ ២០ វិនាទី និងមិនប៉ះពាល់ដល់ស្បែកនោះទេ។
ស្របពេលពលរដ្ឋកម្ពុជាកំពុងមានតម្រូវការ និងការប្រឈមបញ្ហាជីវភាព លោក ហេម៉ា អះអាងថាលោកនឹងចំណាយថវិកាផ្ទាល់ខ្លួនដើម្បីផលិតជាសាប៊ូលាងដៃបន្ថែមទៀតសម្រាប់ចែកជូនប្រជាពលរដ្ឋដែលខ្វះខាត។ លោកក៏រំពឹងដែរថា អ្នកមានធនធានច្រើននឹងចំណាយធនធានដែលពួកគេមានជួយដល់ពលរដ្ឋខ្មែរក្នុងគ្រានេះដែរ។
លោកថា៖ «លុយគ្រាន់តែជាក្រដាសនោះទេ អ៊ីចឹងបើយកតែក្រដាសទៅ ក៏គ្មានបានប្រយោជន៍អីដែរ។ ដូច្នេះយើងសុខចិត្តទុកស្នាដៃនៅក្នុងសង្គមខ្លះទៅ ដើម្បីឲ្យគេឃើញប្រៀបដូចជាប្រាសាទអង្គរវត្តអ៊ីចឹង។ ខ្ញុំរស់នៅតំបន់អង្គរត្រូវចាត់ទុកខ្លួនឯងដូចជាប្រាសាទអង្គរវត្តតទៅគេនឹងចងចាំយើង។ បើសិនជាលុយផុតពីយើងទៅក៏ផុតទៅតាមហ្នឹងដែរ។ ចូលរួមទាំងអស់គ្នាទៅ ដើម្បីចែករំលែកម្នាក់បន្តិចៗយើងនឹងសុខសប្បាយទាំងអស់គ្នា ព្រោះយើងរស់តែម្នាក់ឯងលុយក៏លែងមានតម្លៃដែរ»៕