The Phnom Penh Post Search

Search form




Logo of Phnom Penh Post newspaper Phnom Penh Post - ចោរ​លួច​ម៉ូតូ​ឌឺ​ម្ចាស់​ឲ្យ​ប្តឹង​ប៉ូលិស​ត្រូវ​បញ្ជូន​ទៅ​តុលាការ




ចោរ​លួច​ម៉ូតូ​ឌឺ​ម្ចាស់​ឲ្យ​ប្តឹង​ប៉ូលិស​ត្រូវ​បញ្ជូន​ទៅ​តុលាការ

ចោរ​លួច​ម៉ូតូ​ឌឺ​ម្ចាស់​ឲ្យ​ប្តឹង​ប៉ូលិស​ត្រូវ​បញ្ជូន​ទៅ​តុលាការ

កណ្តាលៈ ជន​សង្ស័យ​ម្នាក់​ត្រូវ​ប៉ូលិស​ខេត្ត​កណ្តាល​ចាប់​បញ្ជូន​ទៅ​តុលាការ​ខេត្ត​ភ្លាមៗ កាល​ពី​ម្សិល​មិញ​បន្ទាប់​ពី​លួច​ម៉ូតូ​បាន​ហើយ​ឌឺ​ឲ្យ​ម្ចាស់​ទៅ​ប្តឹង និង​គំរាម​ថា បើ​មិន​ប្តឹង​គេ​នឹង​ដុត​ផ្ទះ​ចោល។

លោក សឹង សេងលី មន្ត្រី​នគរបាល​ព្រហ្ម​ទណ្ឌ​ខេត្ត​ប្រាប់​ពី​ម្សិលមិញ​ថា ជន​សង្ស័យ​ដែល​ប៉ូលិស​ស្រុក​ស្អាង​បញ្ជូន​មក​នោះ បាន​កសាង​សំណុំ​រឿង​បញ្ជូន​ទៅ​តុលា​ការ​ខេត្ត កាល​ពី​ម្សិល​មិញ​ហើយ​ពី​បទ​ចោរកម្ម។

លោក លុច ចាន់ថា អធិការ​រង​ស្រុក​កោះ​ធំ ប្រាប់​ថា ជន​សង្ស័យ​ត្រូវ​ចាប់​ខ្លួន បន្ទាប់​ស្រ្តី​ម្ចាស់​ម៉ូតូ​ឈ្មោះ​ជឿន ចាន់​ណា អាយុ​២៦​ឆ្នាំ នៅ​ភូមិ​ត្រើយ​ត្រឹង ឃុំ​ព្រែក​អំបិល ស្រុក​ស្អាង បាន​ដាក់​ពាក្យ​ប្តឹង កាល​ពី​ថ្ងៃ​ទី​៧​មករា។ ឯ​ជន​សង្ស័យ ចក់ លាង​សេង អាយុ​២៩​ឆ្នាំ មុខ​របរ​មិន​ពិត​ប្រាកដ រស់​នៅ​ភូមិ​ត្រើយ​ត្រឹង ឃុំ​ព្រែក​អំបិល ស្រុក​ស្អាង។ ជន​នេះ​ធ្លាប់​ជាប់​គុក២ លើក​ហើយ ទី១​ជាប់​ពី​បទ​ប្លន់​នៅ​ក្នុង​ឆ្នាំ​២០១០ លើក​ទី​២ ជាប់​ពី​បទ​លួច​ក្នុង​ឆ្នាំ​២០១១។

តាមសម្តីម្ចាស់ម៉ូតូថា នៅ​យប់​ថ្ងៃ​ទី៦ ខែ​មករា នាង​បាន​យក​ម៉ូតូ​ម៉ាក​ហុង​ដា​គប់​ជ្រុង​សេ៩០ ពណ៌​ទឹក​ប៊ិក ពាក់​ស្លាក ភ្នំពេញ 1B-0491 ទៅ​ចត​ទុក​ក្បែរ​ផ្ទះ ហើយ​ក៏​នាំ​កូន​ចូល​ដេក តែ​មួយ​សន្ទះ​បាត់​ម៉ូតូ ក៏​ដើរ​រក​មើល​និង​ឃើញ​ជន​សង្ស័យ​កំពុង​បណ្ដើរ។ ម្ចាស់​ម៉ូតូ​ស្រែក​ឲ្យ​គេ​ជួយ​និង​ទៅ​ដណ្ដើម​ម៉ូតូ​មក​វិញ ​តែ​ជន​នេះ​ប្រវាយ​ប្រតប់​មិន​ព្រម​ឲ្យ​ម៉ូតូ​វិញ​ទេ ថែម​បាន​ដេញ​ម្ចាស់​ម៉ូតូ​ឲ្យ​ទៅ​ប្តឹង​ប៉ូលិស និង​គំរាម​ថា បើ​មិន​ប្តឹង​ទេ គេ​នឹង​ដុត​ផ្ទះ​ផង លុះ​ព្រឹក​ឡើង​នគរបាល​ក៏​ចាប់​ខ្លួន​តែ​ម្តង៕

អត្ថបទគួរចាប់អារម្មណ៍