ភ្នំពេញៈ ចៅក្រមស៊ើបសួរតុលាការក្រុងភ្នំពេញបានបិទបញ្ចប់ការស៊ើបសួរករណីអ្នកផលិតភាពយន្តជនជាតិអូស្ត្រាលីឈ្មោះ James Ricketson ដែលកំពុងជាប់ពន្ធនាគារព្រៃសក្រោមបទចោទប្រមូលផ្តុំព័ត៌មានជាអាទិ៍ដែលអាចធ្វើឲ្យអន្តរាយការការពារជាតិ ខណៈអតីតនាយករដ្ឋមន្ត្រីអូស្ត្រាលី Tony Abbott ចូលរួមគាំទ្រឲ្យមានការដោះលែងរូបគាត់។
អ្នកស្រី ពីង យក់ហៀប មេធាវីការពារ James Ricketson បានថ្លែងប្រាប់ភ្នំពេញ-ប៉ុស្តិ៍ពីម្សិលមិញថា ចៅក្រមស៊ើបសួរលោក ពេជ្រ វិជ្ជាធរ បានបិទបញ្ចប់ការស៊ើបសួរហើយកាលពីសប្តាហ៍មុន តែមិនទាន់កំណត់ថ្ងៃជំនុំជម្រះ ឬត្រូវដោះលែងទេ។ ហើយការសន្និដ្ឋានរបស់ចៅក្រមស៊ើបក្នុងករណីនេះប្រហែលធ្វើក្នុងខែមិថុនាខាងមុខ។
អ្នកស្រី យក់ហៀប ថ្លែងថាតុលាការបានច្រានចោលនូវសំណើរបស់មេធាវីសាជាថ្មីដែលបានដាក់កាលពីសប្ដាហ៍មុនគោលបំណងសុំឲ្យកូនក្ដីរបស់អ្នកស្រីបាននៅក្រៅឃុំ។
អ្នកស្រីមេធាវីបានឲ្យដឹងថាលោក Ricketson ត្រូវបានពន្ធនាគារអនុញ្ញាតឲ្យប្តូរបន្ទប់មកសម្រាកនៅក្នុងបន្ទប់ព្យាបាលជំងឺនៃគុកព្រៃសដោយចេញពីបន្ទប់ឃុំឃាំងដែលចង្អៀតណែន ក្រោយពេលសុខភាពគាត់ធ្លាក់ចុះយ៉ាងខ្លាំង ហើយបន្ទប់ថ្មីមានសភាពគ្រាន់បើជាងមុន។
បើតាមប្រភពដែលសុំមិនបញ្ចេញឈ្មោះបានថ្លែងប្រាប់ថាលោក Ricketson មានជំងឺជាច្រើនដូចជា ហើមកូនកណ្ដុរ ស្រកគីឡូខ្លាំង កើតរមាស់ ឈឺក្នុងទ្រូង។
លោក James អាយុ ៦៨ ឆ្នាំត្រូវបានសមត្ថកិច្ចឃាត់ខ្លួនកាលពីខែមិថុនា ឆ្នាំ ២០១៧ ខណៈពេលដែលកំពុងប្រើម៉ាស៊ីន drone ដើម្បីថតយុទ្ធនាការឃោសនាបោះឆ្នោតឃុំសង្កាត់របស់គណបក្សសង្គ្រោះជាតិនាពេលនោះ។
លោកត្រូវបានចោទប្រកាន់ពីបទ «ប្រមូលផ្តុំព័ត៌មានជាអាទិ៍ដែលអាចធ្វើឲ្យអន្តរាយការការពារជាតិ» តាមមាត្រា ៤៤៦ ដែលបទនេះគាត់ប្រឈមជាប់ពន្ធនាគារដល់ទៅ ១០ ឆ្នាំ។ កាលពីថ្ងៃទី ២៣ លោក Tony Abbott អតីតនាយករដ្ឋមន្ត្រីអូស្ត្រាលីបានសរសេរនៅក្នុងការធ្វើញត្តិតាមអនឡាញ change.org ថា៖ «James Ricketson មិនគួរត្រូវបានចាប់ដាក់គុកដោយការបង្ហោះត្រូនផ្តិតយករូបភាពនៃការជួបជុំនយោបាយនៅក្នុងប្រទេសកម្ពុជាទេ ហើយគាត់មិនគួរត្រូវបានដាក់ពន្ធនាគារ ១២ ខែ ដោយគ្មានការចោទប្រកាន់ទេ»។
លោកបន្ដថា៖ «រដ្ឋាភិបាលយើងគួរតែបញ្ជាក់ឲ្យបានច្បាស់ទៅរដ្ឋាភិបាលកម្ពុជាថា វាជាអតីតកាលសម្រាប់គាត់ ហើយត្រូវតែដោះលែងដោយផ្អែកលើមូលដ្ឋានមនុស្សធម៌ ហើយអនុញ្ញាតឲ្យគាត់ត្រឡប់មកអូស្ត្រាលីវិញ»៕