កណ្តាលៈ ចៅក្រមស៊ើបសួរនៃសាលាដំបូងខេត្តកណ្តាលពីម្សិលមិញ បានសម្រេចឃុំខ្លួនបុរសម្នាក់នៅពន្ធនាគារ ក្រោយពីចោទប្រកាន់ពីបទរំលោភសេពសន្ថវៈមានស្ថានទម្ងន់ទោសទាក់ទងនឹងជនរងគ្រោះតាមមាត្រា ២៤១ នៃក្រមព្រហ្មទណ្ឌ។ នេះបើតាមលោក ទិន សុចិត្រា ព្រះរាជអាជ្ញារង និងជាអ្នកនាំពាក្យនៃអយ្យការអមសាលាដំបូងខេត្តកណ្តាល។
លោក ទិន សុចិត្រា បានថ្លែងថា៖ «ចៅក្រមស៊ីបសួរលោក គឹម រ័ត្នណារិន បានសម្រេចឃុំខ្លួនឈ្មោះ ហាន រ៉េត ហើយ នៅព្រឹកថ្ងៃអង្គារពីបទរំលោភសេពសន្ថវៈមានស្ថានទម្ងន់ទោសតាមមាត្រា ២៤១ នៃក្រមព្រហ្មទណ្ឌ» ។
យោងតាមមាត្រា ២៤១ នៃក្រមព្រហ្មទណ្ឌ បទល្មើសសេពសន្ថវៈនឹងត្រូវផ្តន្ទាទោសដាក់ពន្ធនាគាររយៈពេលពី ៧ ឆ្នាំទៅ ១៥ ឆ្នាំកាលបើអំពើនេះប្រព្រឹត្តទៅលើ ៣ ចំណុច។ ទី១ បុគ្គល ដែលទន់ខ្សោយ ពិសេសដោយមូលហេតុអាយុនៃបុគ្គលនោះ ទី២ នារីមានគភ៌ កាលបើគភ៌ត្រូវបានគេឃើញជាក់ស្តែង ឬកាលបើជនល្មើសដឹង។ ទី៣ បុគ្គលដែលទន់ខ្សោយ ពិសេសដោយមូលហេតុនៃជំងឺ ពិការភាព កាលបើស្ថានភាពនៃបុគ្គលនេះត្រូវបានគេមើលឃើញជាក់ស្តែង ឬកាលបើជនល្មើសបានដឹង។
លោក យី វណ្ណដា អធិការនគរបាលក្រុងតាខ្មៅបានប្រាប់ ភ្នំពេញ ប៉ុស្តិ៍ កាលពីថ្ងៃទី ១៩ ខែតុលា ថា មានករណីរំលោភសេពសន្ថវៈមួយបានកើតឡើងជាច្រើនថ្ងៃមកហើយ ប៉ុន្តែឪពុកម្តាយរបស់ជនរងគ្រោះមិនហ៊ានប្តឹងសមត្ថកិច្ចឱ្យចាប់ខ្លួនជនបង្កនោះទេ ដោយសារខ្លាចអស់លុយ ព្រោះជីវភាពខ្វះខាតខ្លាំង ហើយគាត់មិនធ្លាប់ដឹងពីរបៀបនៃការប្តឹងឱ្យសមត្ថិច្ចជួយអន្តរាគមន៍។
លោក វណ្ណដា បានថ្លែងថា រឿងរំលោភសេពសន្ថវៈនោះបានកើតឡើងប្រហែលរយៈពេល ១ អាទិត្យកន្លងមកហើយ ដែលជនរងគ្រោះមិនហ៊ានប្រាប់ឪពុកម្តាយរបស់គាត់ឡើយ។ ប៉ុន្តែជីដូនរបស់ជនរងគ្រោះមានការងឿងឆ្ងល់ ព្រោះពេលចៅស្រីរបស់គាត់បត់ជើងតូចម្តងៗចេះតែឈឺ និងមានហូរឈាម គាត់ឆ្ងល់ក៏បានយកចៅទៅពេទ្យ។ នៅមន្ទីរពេទ្យ គ្រូពេទ្យជំនាញស្ត្រីបានប្រាប់គាត់ថា ចៅស្រីរបស់គាត់ត្រូវបានគេរំលោភសេពសន្ថវៈ។
ក្រោយពេលគ្រូពេទ្យបានទូរស័ព្ទរាយការណ៍ប្រាប់លោកក៏បានចាត់កម្លាំងសមត្ថកិច្ចដែលមានអធិការរងម្នាក់រួមជាមួយមេប៉ុស្តិ៍ ដើម្បីទៅចាប់ជនល្មើសយកមកសាកសួរ។ លទ្ធផលនៃការសួរនាំ គឺជនសង្ស័យបានសារភាពថា ពិតជាបានរំលោភសេពសន្ថវៈលើក្មេងស្រីពិតមែន [ចំនួន ២ ដង] ប៉ុន្តែជនសង្ស័យមិនបានបញ្ជាក់ថ្ងៃណាច្បាស់ទេ [មើលទៅដូចបែកថ្នាំ]។ ប៉ុន្តែបើតាមលទ្ធផលនៃការពិនិត្យរបស់គ្រូពេទ្យបញ្ជាក់ថា ការរំលោភនោះអាចកើតឡើងប្រហែល ១ អាទិត្យកន្លងមកហើយ។
ទោះយ៉ាងណាលោកអធិការបានបន្តថា លោកនឹងចាត់វិធានការតាមផ្លូវច្បាប់ភ្លាមៗ ប្រសិនបើដឹងថា មេប៉ុស្តិ៍ក្នុងក្រុងតាខ្មៅរូបណាហ៊ានទារប្រាក់ពីប្រជាពលរដ្ឋ ករណីពួកគាត់មកដាក់ពាក្យបណ្ដឹង ដើម្បីសុំឱ្យជួយអន្តរាគមន៍។
លោក ឡោ សុខៃ មេប៉ុស្តិ៍នគរបាលរដ្ឋបាលស្វាយរលំបានឱ្យដឹងថា រឿងចាប់រំលោភសេពសន្ថវៈនេះគឺមិនមែនទើបតែកើតឡើងភ្លាមៗហើយសមត្ថកិច្ចចុះចាប់នោះទេ គឺបានកើតឡើងមួយរយៈហើយ ប៉ុន្តែទើបតែថ្ងៃទី ១៨ ខែតុលានេះ ទើបលោកទទួលបញ្ជាពីអធិការដើម្បីចុះទៅចាប់ខ្លួនជនសង្ស័យ។
លោក សុខៃ ថ្លែងថា៖ «រឿងហ្នឹងពលរដ្ឋគាត់អត់បានទៅប្តឹង ទៅអីទេ។ គាត់បាននាំជនរងគ្រោះទៅដេកពេទ្យ រួចហើយពេទ្យក៏បានទូរស័ព្ទទៅអធិការទើបបានអធិការបញ្ជាចុះមកខ្ញុំវិញ»។
បើតាមលោក សុខៃ ជនសង្ស័យឈ្មោះ ហាន រ៉េត ភេទប្រុស អាយុ ២៤ ឆ្នាំ ជនជាតិខ្មែរ មុខរបរកម្មករសំណង់ស្នាក់នៅបន្ទប់ជួលភូមិលេខ ៤ សង្កាត់ស្វាយរលំ ក្រុងតាខ្មៅ។
រីឯជនរងគ្រោះឈ្មោះ ថ ម រ ឌ ភេទស្រី អាយុ ១០ ឆ្នាំជនជាតិខ្មែរ ជាសិស្សរស់នៅសង្កាត់ស្វាយរលំ ក្រុងតាខ្មៅ ខេត្តកណ្តាល។ ម្តាយអាយុ ៣៥ ឆ្នាំ មុខរបរលក់បន្លែ និងឪពុកអាយុ ៣៨ ឆ្នាំ មុខរបរនេសាទត្រី៕