.jpg)
អ្នកតវ៉ាទាមទារឲ្យដោះលែងលោក រ៉ុង ឈុន។ ហ៊ាន រង្សី
ភ្នំពេញៈ បន្ទាប់ពីជំនុំជម្រះជាអសាធារណៈចៅក្រមសាលាឧទ្ធរណ៍កាលពីម្សិលមិញបានសម្រេចច្រានចោលភ្លាមៗ បណ្តឹងសុំនៅក្រៅឃុំបណ្តោះអាសន្ន និងបណ្តឹងប្រឆាំងនឹងដីកាឃុំខ្លួនរបស់លោក រ៉ុង ឈុន ប្រធានសហភាពសហជីពកម្ពុជាពាក់ព័ន្ធបទចោទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម។
ខណៈតុលាការកំពុងបើកសវនាការនៅខាងក្រៅសាលាឧទ្ធរណ៍កាលពីព្រឹកម្សិលមិញមានសកម្មជនអង្គការសង្គមស៊ីវិល និងក្រុមយុវជនប្រមាណជាង ២០ នាក់ បានឈរលើកបដាស្រែកទាមទារឲ្យតុលាការទម្លាក់ចោលបទចោទប្រកាន់ និងដោះលែងលោក រ៉ុង ឈុន។
បើតាមលោក ជូង ជូងី មេធាវីការពារសិទ្ធិឲ្យលោក រ៉ុង ឈុន បានថ្លែងនៅក្រៅបន្ទប់សវនាការ បន្ទាប់ពីចូលរួមសវនាការអស់ពេលជាង ២ ម៉ោងមកថា ការជំនុំជម្រះនេះមានចៅក្រម ៣ រូបដែលមានលោក ឃុន លាងម៉េង ជាប្រធានក្រុមប្រឹក្សាជំនុំជម្រះ និងមានលោក អ៊ឹម សុផាន ជាតំណាងមហាអយ្យការ។ ចំណែកឯមេធាវីការពារសិទ្ធិឲ្យលោក រ៉ុង ឈុន មានលោក ឡោ ជុនធី លោក សំ សុគង់ និងមានរូបលោកផ្ទាល់។
លោក ជូងី បានថ្លែងជំទាស់នឹងសាលដីកាថា សេចក្តីសម្រេចរបស់សភាស៊ើបសួរសាលាឧទ្ធរណ៍គឺបានគាំទ្រចំពោះចំណាត់ការរបស់សាលាដំបូងរាជធានីភ្នំពេញ ខណៈសាលាដំបូងរាជធានីភ្នំពេញបានគាំទ្រចំណាត់ការរបស់នគរបាលយុត្តិធម៌ ដែលអនុវត្តកន្លងមក។
លោកបានថ្លែងថា៖ «ចំណាត់ការរបស់សាលាឧទ្ធរណ៍នេះគឺអត់ត្រឹមត្រូវ ព្រោះប៉ះពាល់ធ្ងន់ធ្ងរដល់សិទ្ធិសេរីភាពរបស់លោក រ៉ុង ឈុន។ ក្រុមមេធាវីខ្ញុំនឹងជួបលោក រ៉ុង ឈុន ដើម្បីប្តឹងទៅតុលាការកំពូលទៀត»។
លោកបន្តថា អ្វីជាមូលហេតុដែលសាលាឧទ្ធរណ៍បដិសេធលោក រ៉ុង ឈុន នៅក្រៅឃុំនោះ ដោយសំអាងថាលោក រ៉ុង ឈុន ត្រូវបានចោទប្រកាន់ពីបទបង្កឲ្យមានភាពវឹកវរដល់សង្គម និងសំអាងថា ដើម្បីបញ្ចប់បទល្មើស និងបង្ការបទល្មើសកុំឲ្យកើតឡើងសាជាថ្មី និងរក្សាលោក រ៉ុង ឈុន ទុកជូនតុលាការដើម្បីចាត់ការតាមនីតិវិធី។ លោកបន្តថា ដោយសារសាលាឧទ្ធរណ៍យល់ឃើញបែបនេះ ទើបសម្រេចច្រានចោលទាំងបណ្តឹងប្រឆាំងនឹងដីកាឃុំខ្លួនក៏ច្រានចោលទាំងបណ្តឹងប្រឆាំងនឹងដីកាមិនព្រមដោះលែងឲ្យនៅក្រៅឃុំ គឺរក្សាដីកាទាំង ២ ខាងលើទុកជាបានការដដែល។
លោកបានពន្យល់ថា ការដែលសមត្ថកិច្ចចាប់លោក រ៉ុង ឈុន គឺអនុវត្តផ្ទុយនឹងច្បាប់ ព្រោះនៅក្នុងក្រមនីតិវិធីព្រហ្មទណ្ឌបានចែងច្បាស់ថា មិនអនុញ្ញាតឲ្យមានការចាប់ខ្លួនមនុស្សពេលយប់ដូច្នេះទេលើកលែងតែករណីកំពុងប្រព្រឹត្តបទល្មើសដូចជាគ្រឿងញៀន គឺជាបទល្មើសជាក់ស្តែងទើបអាចអនុវត្តការចាប់ខ្លួននៅពេលយប់បាន។ «ដូច្នេះនីតិវិធី គឺមិនអនុញ្ញាតឲ្យចាប់ខ្លួនគាត់ទាំងយប់បានទេ តែបែរជាសមត្ថកិច្ចចាប់បំពានលើគាត់»។
លោក ជូង ជូងី បានបញ្ជាក់ថា សាលាឧទ្ធរណ៍បានជំនុំជម្រះលោក រ៉ុង ឈុន ក្នុងសំណុំរឿង ២ ក្នុងពេលតែមួយដែលសំណុំរឿងទី ១ ជាបណ្តឹងឧទ្ធរណ៍ ប្រឆាំងនឹងដីកាសម្រេចឃុំខ្លួន និងទី ២ គឺបណ្តឹងឧទ្ធរណ៍ប្រឆាំងនឹងដីកាសម្រេចមិនព្រមដោះលែងឲ្យនៅក្រៅឃុំ។
បើតាមលោក ជូងី នៅក្នុងសវនាការជាអសាធារណៈនោះ លោក រ៉ុង ឈុន បានរៀបរាប់ប្រាប់ចៅក្រមថា គាត់មិនបានធ្វើអ្វីខុសទេ ព្រោះថានៅអំឡុងខែកក្កដាឆ្នាំ ២០២០ គាត់បានចុះទៅពិនិត្យមើលបង្គោលព្រំដែនពីបង្គោលលេខ ១១៤ ដល់ ១១៩ នៅខេត្តត្បូងឃ្មុំ ហើយក្នុងនាមជាតំណាងក្រុមប្រឹក្សាឃ្លាំមើលកម្ពុជាគាត់បានសរសេរសារបង្ហោះតាមបណ្តាញសង្គមហ្វេសប៊ុកពាក់ព័ន្ធបញ្ហាព្រំដែននេះ។
មានន័យថា សុំឲ្យមានការតវ៉ា ព្រោះថាប្រទេសវៀតណាមបានរំលោភបូរណភាពទឹកដីខ្មែរ និងសុំឲ្យរាជរដ្ឋាភិបាលពង្រឹងការការពារបូរភាពទឹកដី និងសុំឲ្យរដ្ឋាភិបាលកម្ពុជាប្រគល់ដីទំនាស់ ៦០ ហិកតាឲ្យប្រជាពលរដ្ឋខ្មែរគ្រប់គ្រងវិញទៅតាមសំណើរបស់ពលរដ្ឋ។
លោកប្រាប់តាមសម្តីលោក រ៉ុង ឈុន ថា៖ «គាត់ទៅមើលព្រោះគាត់ចង់ឃើញការពិត ហើយមានការត្អូញត្អែរពីប្រជាពលរដ្ឋពាក់ព័ន្ធនឹងដីទំនាស់ ៦០ ហិកតានោះ។ គាត់ថា គាត់គ្មានញុះញង់ឲ្យកើតវឹកវរអីទេ ហើយអំពើរបស់គាត់ ដើម្បីបម្រើសង្គមប៉ុណ្ណោះ»។
មិនអាចទាក់ទងលោក ឃុន លាងម៉េង ប្រធានក្រុមប្រឹក្សាជំនុំជម្រះដើម្បីសុំអត្ថាធិប្បាយបន្ថែមលើបញ្ហានេះបានទេកាលពីម្សិលមិញ។
បើតាមលោក ជូង ជូងី នៅក្នុងអង្គសវនាការពីម្សិលមិញនោះដែរ សហមេធាវី ការពារសិទ្ធិឲ្យលោក រ៉ុង ឈុន បានលើកសេចក្តីសន្និដ្ឋានជាទឡ្ហីករណ៍ច្បាប់មួយចំនួនដើម្បីការពារសិទ្ធិលោក រ៉ុង ឈុន ដោយទាមទារឲ្យសាលាដំបូងរាជធានីភ្នំពេញក៏ដូចជា សាលាឧទ្ធរណ៍ដែរ គឺត្រូវអនុវត្តឲ្យបានត្រឹមត្រូវ តាមច្បាប់ដើម្បីជាប្រយោជន៍ដល់សង្គមទាំងអស់គ្នា។
លោក រ៉ុង ឈុន ត្រូវបានសមត្ថកិច្ចចាប់ខ្លួននៅយប់ថ្ងៃទី ៣១ ខែកក្កដាឆ្នាំ ២០២០ នៅក្នុងផ្ទះរបស់លោក ហើយនៅថ្ងៃទី ១ ខែសីហា ត្រូវបានចៅក្រមសាលាដំបូងរាជធានីភ្នំពេញចោទប្រកាន់ពីបទញុះញង់ឲ្យប្រព្រឹត្តបទឧក្រិដ្ឋជាអាទិ៍តាមមាត្រា ៤៩៥ នៃក្រមព្រហ្មទណ្ឌ៕
